Ningani (October 30,2014) khan sorkar laipuia finance ministry chuan sorkar sum hmanral tam lutuk titlem turin inrenchem dan tur ruahmanna a tichhuak a. Department hrang hrangte sum hmanral tih tlemna atana Modi-a sorkar thuchhuah khauh tak hian ngaihtuah a tithui a, state hrang hrangte a kangkai zel a nih chuan keini pawh hi min rawn nang ve thuai lo ang tih a sawi theih loh. Nakinah chuan kan thawhchhuah phu lo a sorkarin sum a hman nasat zia te, sum hmanral dan felfai lo te, ram hruaituten sum renchemna kawnga hma an lak dan emaw hma an lak loh dan emaw te, sorkarin sum a enkawl dan leh a tuak dan te, ram hruaitute leh official-ten an hlawh baka hamthatna an dawn zozai zia te leh a dang te hi ngaihtuah chunga inrenchem leh inhrek tura tun aia nasa zawk a hmalak a la ngai ngei ang. Sorkar laipui chet dan han en hian state sorkarte hi a dimdawi lo tial tial maithei a ni. Hetia sorkar laipuia finance ministry-in department hrang hrangte sum renchem leh inhrekna tur (Austerity measures) a ruahman sak chhan hi ministry/department hrang hrangten an sum hman ral (Non-plan expenditure) tam thin lutuk za zela 10 a titlem a tum vang a ni ber a. 'Non-plan expenditure' hian sorkar hnathawk hlawh bakah sorkar inrelbawlna a sum hman hrang hrang te, lirthei enkawlna senso, minister zin veivahna senso, office mamawh chi hrang hrang leina, etc., a tawi zawngin hma thar lakna tur ni lo a sum hman chi reng reng hi a huam a ni. Heti zawnga sum senso tam lutuk hi keini pawh kan buaina a ni ve tho. Inrenchemna leh inhrekna atana thuchhuahah chuan sorkar hnathawkte ram danga zin chhuah khap a ni a, ram danga mite nena sawiho ngaiah video conferencing hmang tangkai tura tih an ni. Tul bik thil a nih loh chuan official-ten five star hotel-a meeting an koh phal a ni lo a, sorkar hotu liante thlawhna first class a an chuan khap a ni bawk. Anni sorkar thar chuan car manto aiin sum harsatna an vei zawk a nih hmel a, ram venhimna lam atan a nih loh chuan motor thar lei an khap bawk. A tlaran zawnga chetna leh sum luang ral tam tura thil tih an khap a ni ber. Helaia tul vak lo a sum luan ralna pakhat ram hruaitute zin kual nasa lutuk te, CM leh minister zin official-hoin an zui dul dul ang chi te hi an remtih chi a nih vak hmel loh. Modi-a sorkar thuchhuah tharah hian ram chhung leh ram pawn a zinna khuahkhirh tur a ni anga, budget a zinna senso tura dah chin bak hman phal a ni lo bur a. Officer-te thlawhnaa an zin pawhin First class-a an chuan phal a ni tawh lo a, a chuan man tlem thei ang ber thlang tura tih an ni. Mizorama kan buaina pakhat sorkar hna lak chungchangah pawh thutlukna khauh tak an siam a, helaia advertisement chhuah loa tu tute emaw an inthun thin ang hi vairam lamah kan hruaitute chuan an phal dawn lo, sorkar hna thar (Plan & Non-plan post) siam khap a ni. State sorkarte sum hman dan pawh tunhma aia vil uluk an tum ta niin a lang. Tun atang chuan state sorkarte hian plan sum an hman dan thla tin sorkar laipuiah an hriattir tur a ni. State annual plan sum leh CSS sum hmuh leh hman dan an rawn vil tha viau a nih chuan kan sorkar pawh a tan mar pat a ngai dawn a ni, thla tin an sum hmuhna ministry/department hnenah an hman dan hi an hriattir a ngai dawn a. Hei hian sorkar hmalakna a tichak zualin a rinawm. State hrang hrangte sum hman dan hi The Chief Controller of Accounts-in a lo vil dawn a ni. Helaia sorkar sum hman dan chik deuhten an vei em em thin pawisa kum tawp dawn a department hrang hrangin sum an hmang chiam thin ang hi khu lamah pawh an buaipui ve tho mai a, mahse anni chuan a pumpelh dan an zawng a, ruahmanna hrang hrang an siam a. Keini pawhin sorkar laipui rilru ang hi pu a hmalak ve a hun khawp mai. Pawisa kum ang zawnga chhut chuan kum chanve hnu lam kan thleng der tawh a, nakum February leh March thla vela sum hman chiam a nih lohna tura inven lawk a hun viau ang. Thla hlui (October) thla tir lam khan Finance Minister Pu Lalsawta hoin sorkarin kumin chhunga sum a hman dan thlir letna an nei a. Chumi tum chuan, sorkar laipuiin a buaipui ang tho non-plan senso pung zel chungchang an sawiho a, a theih anga khuahkhirh chhunzawm zel an rawt a. Dawng pha chin ni lo, an department-in an kawl avanga lirthei hmangtu - joint director, deputy director, deputy secretary, under secretary leh officer dangte tam tak an awm thu leh hei hian nasa takin POL mamawhna a tisang a, sorkarin sum tam tak a sen a ngaih phah thu chumi tum chuan an sawi a. Tihtawp a nih thuai nan leh lirthei chuang liam department-ten an kawl mek 200 aia tam mah chu awmze neia hman a nih theih nana hmalak a tul thu pawh an sawiho a ni. Heng bakah hian department thenkhat CSS kalpui ten vantlang inkhawm an huaihawtin DA an sem thin thu leh chhuichiana dan kalh a nih chuan tihtawp rawt a ni a. Tui in tur pek chhuahna atan sum hman leh mipui tui bill chhun luh inmil lo lutuk leh chawi belh nasa ta lutuk pawh enfiah rawt a ni. Department tam zawkin an hmanral tura sum tuk te hmang tha fu siin sorkar a revenue an chhun luh ve tur erawh an ngaihthah tlang pui tih chumi tuma Finance Department Report-ah tar lan a ni bawk. He meeting thuchhuak hi zawm a ni em? puanzar a ni em? tih te hi ngaihtuah zui tham a ni. Kan state sum harsatna leh indaihlohna kan vei rual hian sum hmanna lam hi ngaihtuah tel a ngai a, chumi atana ngaihtuahna fim tak seng a, huai taka hmala ngam hruaitu kan mamawh hle a ni. Chutiang ang chu vaiho zinga an awm a nih chuan Mizo pa pawh kan nei ve tur a ni. A tawpna atan chuan tun hnaiah Mizoram sorkarin Planning a kalpui danah thil lawmawm lampang hmuh tur a awm tan a. Planning Board kalphung her danglam niin member ni sa bakah member thar mi thiam pathum - Prof. Tlanglawma, Prof. Lianzela (Development economist), Prof. Vanlalchhawna (Public finance expert) te ruat thar an ni a. Secretary, Planning Department leh Planning Board functional secretary atan sorkar laipui a Finance ministry lama tawn hriat ngah tawh, la thalai tak leh economics thiam tak ruat a ni ta bawk a. Beiseina a sang thar viau a, sorkar hian ram hmasawnna tak tak buaipui tumin team tha tak a din mek niin a lang thei a, a lawmawm khawp mai. Mahse, mithiam awm khawmte ngaihdan leh mi thahnemngaite duh dan aiin politician-te ngaihdan hi a lal zawk avangin ram hruaitute hi a pawimawh ber chu an ni thung.