3. Eizawnna hna thar siam: Eizawnna tlak hna vang (employment problem) hi kan buaina a ni mek. Nu leh pate thawh chhuah ring thalai an tam viau chuan ram hmabak a eng vak lo a. Rei lo teah kum upa zawkte an til anga, chhungkuain harsatna an tawk mai dawn tihna a ni. Thalai kum 20 atanga kum 40 inkar hian eizawnna tling hnathawh nei deuh vek ta ila, chhung tinah hian nu leh pa, kum upa zawkte thawhchhuah aiin thalaite thawhchhuah hi tam zawk bawk se kan economy a nghet anga, kan hmabak pawh a eng viau tur a ni a. Mahse, tun dinhmunah chuan thalai hna nei lo tam lutuk hi a manganthlak hle a ni.   Tun hnaiah Europe ram hrang hrangah thalai lehkhathiam an thiamna phu tawk hna hmu lo an tam hle a - hetia an vanglai taka eizawnna nei lo a an awm reng chuan an thiamna leh theihna a tlahniam zel anga, thangthar an lo chhuak zel bawk si anga, an la bo pil mai dawn a, chuvang chuan ‘Europe’s Lost Generation’ an ti a. Anni anga chhuan bo pil mai tur hi kan rama thalaite hi an ni ve mai ang tih a hlauhawm. Chhanchhuak tura hmalak tak tak a ngai ta. Sorkar hi eizawnna hna ngaihtuahtu tur a ni a, policy an siam anga, budget-ah telh tur a ni a, eizawnna tlak hnathawh tur vang (Unemployment problem) sut kian hi sorkar mawhphurhna a ni hrim hrim.   Thalaite tha hrui leh an thiamna hmanga ram hmasawnna thlentir tura hmalak a hun ta. Singapore ram indin chhoh tirh lai vela an dinhmun kha tuna kan ram dinhmun ai hian kawng tam takah a chhe daih zawk. Mahse, hruaitu tha tak mai Lee Kuan Yew an nei a, thangkhat lian a vei meuh chuan ram hausa leh changkang takah an invawrh hman. An ram mipui, a bikin thalai rualte thiamna theihna tipung (skill development) zawngin hma an la a, eizawnna hna siam chhuak tura hma an lak bakah hnathawk tlak (taima, hna thiam, mahni hnaa inpe zo) turin an inchher, an chhehvel ram danga chengte aiin an hlawh tlem mahse an thawkhlawk (productive) zawk a. Chutianga thalai, zirlai rualte an inhrual tak tak chuan eizawnna hna a lo awm mai a, an ramin hmasawn bak hmabak a nei lo.   Sorkar tum party hruaitute pawh hian eizawnna hna thar siam hi thupui pawimawh ber pawlh nei se a duhawm khawp ang. Kan ram leilung, thing leh mau behchhana eizawnna kawng thar siam te, tourism industry te leh a dang dangte hi thalaite tan eizawnna tlaka siam a hun ta. Suahsualna leh pawikhawihna, zu leh ruihhlo hluar ta lutuk te hi thalai hnathawh nachang hre lo leh thawh tur hre lo tam vang a ni thei, thawhchhuah neih ngei tum tura inzirtir te pawh a ngai ta viau. Sorkar hna bak hna dang siam zawnga hmala thiam ram hruaitu kan mamawh tak zet ta e.   4. Ram leh Hnam himna: Hnam la naupang tak kan nih bakah pi pu atanga kan rochun ram ngeia awm kan ni chungin mahni a ro inrel erawh kan ni lo a, sorkar lian tak hnuaia awm kan ni. Khawvel hmun hrang hrangah hnam tenau, mahni rama cheng tho; mahse, sorkar lian zawkte awpna hnuaia awm, hnam lian takte karcheh a awm - tualto hnamte (Indigenous peoples) hi an him lo hle a. Chim buai, chim pil, chim ral theih mai dinhmunah an ding hlawm. Mizote pawh hi kan inven reng loh chuan kan himna hi a derthawng viau. British haw hnu, India hnuaia kan awm tak hnu hian kan pi pu chena kan ram chu India, Burma leh Bangladesh-ah thendarh a ni a, India ram chhungah pawh kan ram zau tak chu a mi chengte nen state hrang hranga thendarh a ni bawk. Kan ram leh kan hnam hi engtikah tak inzawmkhawm leh ang i maw..   Rei lo te chhunga min chim ral mai thei hnamten min hual vel a, kan hnamzia leh kan sakhua pawh hi humhim a ngai tial tial bawk. Kan inhumhimna kulhpui ILP te pawh a derthawng mai ang tih a hlauhawm ta. Sorkar laipuia rorel mek party hian ‘New India 2022’ tih an sawi ta fo a. An duh angin India ram hi hruai ta se, kan sakhua leh kan hnam inhumhimna te hi a nghing mai ang em? ‘One nation, One tax, One market,’ tih te, ‘One Election’ tih te an sawi ta fo mai. Nakinah hian ‘One Nation, One culture, One religion’ te hi an la ti lo ang tih a sawi theih loh. Sorkar thar hian ngaihtuahna fim a neih a ngai dawn.   Khawvel hmasawnna hrang hrangte hi sumdawnna nena inkungkaih vek a nih avangin inven thiam a ngai tial tial a. Sorkar laipui hmalakna liantham thenkhat te, hmasawnna hmingpui thil chi hrang hrangte hi kan ram leh hnam himna tiderthawng thei a nih leh nih loh te kan thliar thiam a ngai ta khawp mai. Vanneihthlak takin state sorkar hian thuneihna zau tak a nei a, chung chu hman thiam chuan kan ram leh hnam humhalhna atan a tangkai thei viau. Mahni ram humhalh te, mahni hnam hmangaih te, hnam danga laka inven him te hi tunlai khawvelah an uar thar leh ta viau a. Kum tawpa sorkar lo ding tur tan pawh hian heti zawnga hmalak hi tihmakmawh a ni ang.   5. Hlemhletna Umbo: Corruption hi a zung chawpa kar phawi a, phoro theih a ni. Chumi tur chuan ram hruaitu lu ber a dik a, a rinawm a, a huaisen ngai a, hlemhletna chi hrang hrang lakah amah leh a hote an fihlim phawt a ngai. Kan rama corruption hluar tawh zia hi phat rual a ni lo a. Ram hruaitu ni mekte leh nih tumte hausak dan uchuak lutuk te hian an corrupt ru hle a nih te min rintir fo thin. Kum 2008 inthlan dawna an thil neih an puanzar leh 2013-a an puanzar inthlauh nasatzia kha corruption ngaih theih lohna ram a thil thleng ni ta sela chuan thubuai lian tak awrhtir a lung ina khung chi maw le! Eiruk hluar ta lutuk hi ven a ngai a, tih tak taka beih chuan a rem duak thei ang. Nikum lam atanga budget a pawisa an dah tawh, an din duh tak tak lo emaw tih mai tur Lok Ayukta te hi din a hun tawh khawp mai.   Sorkar inrelbawlna lamah te hian eirukna kawngkhar ven a ngai a. Thuneihna hmang dik lo leh sum leh pai eiru te hi tu pawh nise an phu tawka hrem hrim ngei ngei a ngai. MLA/Minister an nih avanga hausa chak thin lutuk te pawh hi chhui chiang thei tur (institution) kan mamawh. Kan kawngpui chhiat chhan te, kut hnathawktute an bet tlawk tlawk mai te, MIP/NLUP hlawhtling lo em em mai te hi corruption nen a inzawm tih hai rual a ni lo. Thil dik lo kan ngaizam ta lutuk te, suahsualna leh pawikhawihna hluar ta lutuk te, dan an palzut fo te pawh hi hlemhletna nen a inkungkaih vek ang. Engpawh nise, theihtawp chhuaha hmala tur sorkar lo piang se a duhawm hle.   6. Good Governance: Sorkar inrelbawlna tha lo leh kalphung tha lo kan tawrh nasat zia hi kan chhut ngai lo maithei. Dan chunga leng anga inngai, dan leh hrai pawisa lo tak tak an tam hle a. Traffic jam kara (VIP nih vanga) traffic rules kalha tlan kan hmu fo a, duhsak zawngte hnaa thun te pawh kalphung pangngaiah kan ngai titih der ta. Heng hi dan bawhchhiatna a ni a, inrelbawlna that loh vang a ni. Ram hruaituten an duh duh dana mipui sum an hmang hek lutuk te hi mipui rawkna a ni. Mipui hi kan thikthu a chhe lo hlauh a, chuti ni lo se an helicopter hmang nasa lutuk te, an chet velna hautak lutuk te hi kawngzawhpui tham a tling.   Kan rama harsatna hrang hrang kan sawite hi governance tha kan neih loh vang a ni. Langtlang sorkar kan nei lo a, mipui harsatna sut kian nghal zung zung a ni lo fo a, dan leh hrai bawhchhiatna a hluar a, hmasawnna a rualkhai lo a, hruaitute leh mipui inkar a zau em em bawk. Sorkar inrelbawlna tha (Good Governance) hi ram changkang te neih theih chauh anga kan ngai a nih chuan kan hre sual a ni ang. Ram hruaitu tha kan neih chuan kan ban phak leka hnaia awm a ni. Kan mamawh em em a ni bawk. Sorkar tharah beisei leh phawt ang.