Kum sawmthum kal ta (1989) atang khan kum sawm danah mipuiin sorkar an thlak thin a. MNF leh Congress an insorkar chhawk a tih theih a, Pu Lalthanhawla leh Pu Zoramthanga te chief minister an in nih chhawk pawh a tih theih ang. Hetia sorkar MLA term hnih hnu a sorkar an inthlak thin chhan hi mipuiin (sorkar) an nin hman em vang a ni thei a, sorkar an inluling hman viau a, mipui tana hneawm khawpin an tal hman viau tihna a ni thei bawk.
Chutiang avang chuan kum 1998 ah khan rorel lai congress party hnawlin MNF thlan tlin an ni a. Mahse, kum sawm a vei meuh chuan mipuiin an chungah kut an thlak a, chiang takin an tla a, 2008 atangin congress kaihhruai sorkar a ding a. Kum sawm chhung Pu Hawla kaihhruai sorkar ngelnghet tak a ding a, mahse, mipui duh loh zawng thil an tih avang leh an party chhungkaw buai avangin mipui kutthlak an tuar ve leh a. An vanglai a pel thut a, chiang takin an tla ve leh ta mai a.
Kum sawm sul a liam a mipuiin sorkar an thlak chhan hi sorkar lai nin vang ngawr ngawr bakah kalphung thar beiseina vang a ni thin. Ram hmasawnna te, mipui hamthatna te, sorkar inrelbawlna tha te, ei bar a intodelh te, retheite dinhmun chawi kan te, thalaite hmakhua ngaihtuah te, kawngpui leh hmasawnna ruhrel tha siam te hi inthlan dawn hnaih a thupui bera an neih thin avangin mipuiin sorkar tharah beiseina an nei sang thin. Nikum kum tawp lamah pawh khan beiseina sang tak nen mipuiin kum sawm chhung bet tawh MNF an kaitho a, an sorkartir a nih kha.
MNF party hi kum sawm chhung an bet a, an party a palian ho pawh MLA a tling zo awm bar lo khawpin an tlu sawp a nih kha. Chutiang dinhmuna an din lai chuan anmahni leh an party dinhmun an inhmu chiang viauin a rinawm a, eptu party ni chungin rorel lai party leh sorkar pawh an bei na hleithei lo a nih kha. Eptu party dang nen thawhho chang nei mahse an huikhawm zo tak tak lo a, an awp khawm hleithei lo a ni ber. Kum sawm chhungin mipui rin hlawh leh turin beihpui an thlak a, danglam an tum a, insiamthat pawh an tum fu niin a lang. Sorkar thar siam turin an inbuatsaih a, kalphung thar leh tha zawk hun engemaw chen an buaipui hnuah SEDP an duang chhuak a. Chumi hmang chuan ram tha zawk siam an tum thu an puang chhuak a. Tichuan, mipuiin thuneihna an pe ta a ni.
SEDP hi MNF sorkar innghahna tur bera ngaih a ni a. He ruahmanna hrang hrang tihhlawhtling tur hian sorkar tuk atangin hma an la nghal turah kan lo ngai a. Mahse, beisei aiin an sawi ri khat leh ta riau mai a, minister pahnih khat hian an sawi zauh zauh bak chu mi dang hian an sawi lang ngai meuh lo. Tunhnaia committee peng hrang hrang din te kha SEDP hmalakna nen a inrem chho dawn nge a insubuai zawk ang tih pawh hriat thiam a la har. MLA inthlan dawn hnaih a manifesto leh SEDP a an tarlan, sorkar hmalakna tur te kha kum nga chhung hian kan keu leh thin anga, kan sawi chhuak leh thin dawn a. An tihhlawhtlin chhoh zel chuan thuneihna pawh an chang zui zel anga, Mizoram history a sorkar tha leh ropui anga sawi an ni reng tawh bawk ang.
Zep thu a cheng lo sorkar thar lak luh ni a minister-te leh an chanpual rem khawm danah kha chuan ram hmasawnna leh ram siamthatna tak tak aiin department lian leh sum hmang tam deuh te thei sem a ang zawk mah. A minister leh a department chan inmil lem lo tak tak a awm nawk mai hian mi tam tak beng a tithlep deuh. Tunhnaiah sorkar officer lian siksawi kual an ni a, hei pawh hi chik taka lo thlirtu tan chuan politics eng emaw a awm deuh a ang. Sorkar hian a thatpui ang nge a chhiatpui ang, tih a ngaihtuah theih. Officer tha leh thiam, dik leh rinawm, taima leh thawk rim te an theihna tur taka dah ngam hi sorkar tan hian a har viau a, mahse, sorkar tha neih tum tak tak a, hnathawh tum tak tak chuan chu chu tihmakmawh a ni. Sorkar tha kan tih (good governance) hian ken tel a nei nual a : e-governance te, smart governnance te an ti a, sorkar department khaipa chin tur te hi mahni inzir peih, hetiang man thiam, rinawm leh taima an nih loh chuan sorkar a mualpho thuai ang.
Inhek leh intlawn kual vel hian sorkar kalphung a tibuai fo thin a, chutianga sorkar hnathawk thenkhatin an chaih kawi theih ministry chu a mualpho thuai ang. Tuna kan ministry thar pawh hi official-te enkawl thiam tak, an thiamna leh theihna hmang tangkai thiam tak, mi hlemhle leh dik lo te khuahkhirh a hrem ngam a nih a ngai. Chutiang tur chuan chief minister hian adviser fing tak a neih a ngai a, council of minister-te an hawi harh a ngai bawk a, party a hotu lawkten sorkar an venpui pawh a ngai ang. A pawimawh ber chu chief minister leh a minister/MLA te hi taima se, inzir peih se, a tul hunah mi thurawn la hreh lo se, dik se, rinawm bawk se, hlemhletna lakah fihlim ngam se.
Tun tum ministry hian mipui hnawl nih hreawmzia an hre chiang viauin a rinawm, chief minister mai bakah a minister-te hi mipui hnawl tawh hnu kha an ni hlawm a. Ram hmasawnna leh sorkar inrelbawlna mai bakah ram leh hnam thil lian tham eng eng emaw an hmachhawn chho leh ngei anga. Chakma chungchang te, ramri chungchang te, etc., hi a lo irh chhuak leh ngei ang. Chutiang hunah pawh chuan kan ram leh hnam tan huai taka an din ngam a ngai ang. Citizenship (Amendment) Bill 2016 chungchanga an hmalakna erawh beisei a pha chiah lo a. Engpawhnise, kan pute ho hian MLA an nih loh chhung khan thil tam tak an zir chhuak hman turah ngai ila. Beiseina sang tak nen ram leh hnam tan an thawk chho turah ngai ang.