Sorkar ngei tumin party hrang hrangin hma an la mek a, lal chak thenkhatte candidate nih tumin politics-ah an zuang lut a; lal nih leh tum thenkhat lah party dangah an inpe bawk a. Tuna MLA nih tum zingah hian kan ramin a mamawh tak tak ngaihtuah thleng ngai lo an kat nawk maithei a, ram hmasawnna tur leh hnam himna tur chungchanga bangbo tak tak, ngaihtuahna la seng ngai miah lo te an awm nual maithei. Sum leh pai, vua leh vang, chi leh kuang vel vanga langsar chho a, ram hruaitu atana party hoin an vawrh chhuah ve ngawt te hi kan ram thanmawhbawk an ni thei. Kan hma lawk MLA inthlanah hian mi tak tak, huaisen leh taima, Pathian tih mi, inzir peih, rinawm leh dik, chapo lo, thuneihna hman sual leh eirukna (Corruption) laka fihlim tur 'Ani hi a Zopa ania' kan tih ang chi hi, eng party mi pawh nise se, MLA sawm tal han thlang tling ila chuan kan ram rorelna hian kawng dik a zawh phah anga, ram hruaitute dinhmun pawh a zahawm sawt anga, ram hmasawnna tak tak a thleng ngei ang maw le. America ram khu an vanneihna em em chu an indin chhuah tirh te atangin Pathian thuawih, mi tak tak ram hruaitu an nei thin a. Europe khawmualpui a kohhran siamthat hun laia England-a pawl pakhat an kohhran kalphung khirhkhiap lutuk duh loh vanga America-a pem lut, rim taka hnathawh dah pawimawh a, mahni inthunnunna ngaisang em em, fir taka Pathian thu zawm tum pawl 'Puritan' an tih mai te kha U.S.A lo ropui chhohnaah hian an pawimawh hle a ni. Zalenna an sual lai leh an sual chhuah hlim a colony hrang hranga an hruaitute kha kohhran rawngbawltu pawimawh tak tak an ni hlawm a. An ram an indin chhoh tirh a an hruaitu langsar tak takte kha Pathian tihmi, kohhran mi an ni hlawm a, thutlukna pawimawh tak tak (an hun lai mai ni lo, a hnu lam tun hun thlenga an ram tana pawimawh em em) an siam changin Pathian an rawn nasa thin, an ti. Ram leh hnam hmangaihna tak tak nei lo, mipui harsatna ngaihtuah thleng pha lo, inzir zui peih si lo, MLA/Minister/CM nih a lungawi tawk em em te hi kan ram hian a mamawh tawh lo. Ram hruaitu atan hian lehkhathiam leh zir sang an that viau rual hian zir sang lem lo pawh ram hruaitu tha tak an ni thei tho. A pawimawh ber chu mahni mawhphurhna hria a, ngaihtuahna fim tak nen taima taka hna thawh hi a ni. Chutiang mihring chu ram hruaitu atan kan mamawh tak zet a, mipuiin an zawng mek a, an hmuh loh chuan tling tura rin ber an vote leh mai dawn a nih hmel. Kum dang ang a nih leh chuan rei lo teah MLA nih tumte leh an thuihhruaiten mipui min tlawn leh dawn a. An inphah hnuai anga, thenkhat phei chuan sum leh pai, therhlo hmangin vote an rawn zawng anga, puan hnuai thil an rawn paipawn leh ang. Chutiang mite chu hmusit ang u. Timualpho ngam ang u. Kan ram politics-ah hian mahni chhia leh tha hriatna fim phatsan duh khawpa thuneihna duhtu MLA an lo awm tawh a, a pawi khawp mai. Lal duh vanga sum leh pai therhlo ilo leklam a, sorkarna siam pawh an awm tawh. Kan politics history chhe tak hi nawh reh theih a ni tawh lo a mahse, a thlen nawn tawh lohna tura ngaihtuahna sen erawh a ngai. Tun inthlanah hian candidate pakhatin Cheng nuai 20 thleng hman phal a ni a, a tam khawp mai. Heti zat kher hi hman tum lo vek se, inthlanna a fel fai leh zual ang. Pawisa leklam a, vote lei tuma che nasa apiang hian mipui an hmusit ru tihna a ni a, mipui inthurual hian han titla phak phak mai se la. Thlan tur ber pawh la hre lo, politics pawh la ngaihtuah lem lo kan la tam viau anga. Party-ho pawhin an manifesto an la puangzar lem lo bawk a. Sorkar thar siam tura kan inbuatsaih mek lai hian kan ramin a mamawh em em, a hmaa kan tarlan bak pahnih khat han sawi belh leh ila. 1. Hmasawnna tlo (Sustainable development): Ram hmasawnna hi party hrang hrangten tawktarh atan an hmang leh dawn a, an sawi thiam leh viau anga, an thu a awihawm leh viau ang. Kum 2014 a khati khawp a BJP an chak chhan langsar taka an sawi chu an auhla 'Hmasawnna' (Vikas) kha a ni, Modi-a'n a sawi thiam bawk si a, ram an la duai duai mai a ni. Mahse, keini chuan hmasawnna kan tih hian kan tuipui ber tur chu 'Hmasawnna Tlo' (Sustainable Development) ni se. Kan hlawkpui tur emaw kan tih te hi khuarei a kan chhiatpui tur leh kan tana tha lo tur thil a ni thei. Entirnan, oil palm te hi ramngaw zau tak thiatin kan ching a. Ram dangah chuan environmentalist-hoin an dodal nasa thin. Chutiang bawkin hmunphiah te, sawhthing te pawh hi ramngaw tihchereu nan kan hmang thin. Kan rama tha duh thlai kan ching dawn a nih pawhin environment khawih pawi lo tur zawnga chin dan zawn a ngai. Lo neih hi kan ram eizawnna pui ber a ni a, NLUP hmanga kum sawm dawn lai hma an lak hnuah pawh kut hnathawktuten an ban san hleithei lo. Hlawk zawk a lo neih dan tur te, environment tichhe nasa lo zawnga lo neih dan te, lo neitute din chhuah theih dan tura hmalak tak tak a hun ta hle mai. Chutiang bawkin hmasawnna hmingpu thil dang reng reng pawh ngun zawk leh uluk zawka lo thlir a ngai. Hmasawnna kan tui hian Hmasawnna Tlo hi ni ber zel se. 2. Decentralisation of powers/wealth: Thuneihna sem zai hi a ngai khawp mai. Kan ram inrelbawlna kalphungah hian ministry hi an lian lur mai a, minister-te kutah khawtlang thil pawimawh zawng zawng thlengin a awm a. Anni lahin intihlal na atan an hmang a, an mi leh sate duhsakna leh eptu lam hrekna atan an hmang thin a nih hi. Mizoram Finance Commission pakhatna Report kha sorkar hian a hmang tangkai lo a, a uihawm khawp mai. Eptu lam lahin an ngaihtuah zui lem hlei lo a. Kha report kha a nihna takah chuan sorkar hian a ngai pawimawh tur a ni a, rawtna a siamte phei chu an zawm tur a ni nghe nghe. Tuna kan inrelbawl dan phungah hi chuan khawtlang inawpna/sorkar tenau Village Council/Local Council kan neih te hian thuneihna leh tih theih an nei tam lo hle mai. Hei vang hian duh khawp lohna pawh a awm a, vai rama an neih Panchayati Raj ang chi te neih ve duhna pawh a awm a nih hi. Kan village council kalphung hi tihdanglam a ngai a, Finance Commission rawt anga thuneihna sang zawk neia a thuam a ngai. Khawtlang tan budget siamin, khawtlang hmasawnna hna an kutah lut tam zawk se. Ministry nen an inkara District level-ah thuneihna (development committee/council) te awm thei se. Khawtlang level leh district level-ah budget siam hian hmasawnna hnathawh pawh a kal tha zawk ang. Thuneihna sem zai ngam ministry neih kan mamawh. 3. Mipui himna: Mipui himna hi ngaih pawimawh a ngai ta hle mai. Hetia zu an thlah zalen a, sorkar berin a zawrh takah phei hi chuan pawikhawihna leh tharum thawhna laka mipui venhim hi a ngai zual hle a ni. MLPC Act hi a nihna angin an lekkawh duh si lo a, khuahkhirhna hnuaia zu zuar tura kan lo ngaih kha zalen taka zawrh a ni a, ualau takin an in a, langsar takin an rui tak sup sup mai a. Chhun khaw engah, khawlai lun lai leh puipunna hmunah pawh rui tawng tak tak hmuh tur an tam a, rui chunga lirthei khalhte kan hmu ta fo a, damdawi inah zu vanga enkawl ngai an pung hluai bawk. Mipui himna hi thupui a neih a hun ta, zu leh thil dang ruihhlo lakah hian nunau, kum upa zawkte hi venhim an ngai. Pawikhawihna leh dan bawhchhiatna chi hrang hrang - rukruk, tharum thawhna, etc., hi a tam ber hi chu ven theih niin a lang. Aizawl bik pawh hi sorkar hian ngai pawimawh tak tak se, city police bakah police dangte hian chhun zan zawmin khawpui dung hi suartlan thin se la. Lirthei khalhtu rui an awm leh awm loh te hi check ngun zualin rui chunga khalhte phei chu hrem tak tak thin se. Danin a phal lohna hmun a zu in leh rui reng reng chu hrem nghauh nghauh bawk se. YMA kumpuan duty hian theihtawp chhuahin hmala lo phei se chu Aizawl khawpui hi a him lo  zual ngawt ang. Mipui himna tura tih tak taka hmalak chuan khawpui nuam tak a ni thei. Heng bakah hian ram dang mi dan lo a lo lut te, state dang atanga lo lut ru te dap chhuah a, thawn haw te hi a tul tak zet. Kan sakhua leh kan hnam himna tura hmala ngam sorkar kan neih ngei ngei a ngai tawh. Chutiang sorkar nei thei tur chuan mipui kan harh a ngai a, politician-te hi a pawimawh hlei hlei an ni bawk.