India Happiness Report, 2020-in a tar lan dan chuan India ram State leh Union Territory zingah Mizoram chu state hlim ber (happiest state) kan ni a, kan hnuai chiahah Andaman & Nicobar Island leh Punjab an awm a ni. He report hi Professor Rajesh K Pillania, management strategy lama mi thiam takin a buatsaih a ni a, survey report hi mi 16,950-te ngaihdan lakkhawm atanga buatsaih a ni. Mizo te hi kan lo hlim viau emaw ni dawn ni? Nge, pawn lam mi hian hlim viau turah min lo ngai zawk?

2. Tin, ei bar deh chhuah kawngah nise kan intodelh lo hle mai si a. Assam ramriah buaina a awm apianga sawrkar hotute’n mipui min hnemna chu, ‘Kudam-ah thla thum ei buhfai kan chhekkhawl, mipui lo lungngai suh u’ tih a ni thin. Thla thum ei kan chhekkhawl pawh chu kan thar chhuah pawh ni lo, ram pawn (state dang) atanga kan lak luh tho a ni. Ei bar deh chhuah kawngah keini aia intodelh lo state hi India ramah an awm kher lo ang. Heti chunga state hlim ber kan ni mauh mai hi a mak viau mai. Kan lo hlim ber a nih tak tak chuan, chawmhlawm ni chungin, zah nachang hre loin kan lo khau phar thawven ve mai maite hi a ni lek ang a?

3. Tehna pawimawh tak dang leh chu taksa leh rilru hriselna chungchanga kan dinhmun hi a ni. Tlangrama cheng kan ni a, ram dangte ngaihtuah chuan nipuiah a lumlutuk lo a, thlasikah a vawt lutuk hek lo. Kan boruak hip luh hi a la thiang em em a, kan chief minister tih dan takin, hralh theih ni phei se a man a tam tham ngawt ang. Phaiah chuan boruak a bawlhhlawh tawh em em a, zan khawthiang an nei ve ngai lo. Arkai den zanah meuh pawh boruak bawlhhlawh vangin thla a lang sen rûm a, lung tileng chi ziazang a ni lo.
Kan boruak hip inthlauhzia ngaihtuahin phaia awmte ai chuan kei Mizote chu hrisel zawk fe tur kan ni. Mahse, kan hrisel lo hle mai si. Mihring tam dan atanga tehin India ramah cancer vei tam naber state kan ni a, HIV/AIDS veitamna ber kan ni bawk. Nu naupai, HIV positive phei chu India ram pum chawhrual (national average rate) aiin a let sawmin kan sang zawk! Thisen sang, zunthlum, kal tha lo kan tam em em bawk. Damna inkhawmah kan natna lai kan khawih sup sup a, na lai khawih tur nei lo pawh kan awm mang lo.

4. Rilruhriselna (mental health) lamah nise kan chim chin a sang lo khawp mai. Rilru hah kan tam em em a, depression tihtawngkamchu kan hre lar ta hlemai. Kum tinin Kulikawn Hospital-ah hian rilru natna vei, depression nei mi 500 chuang an hmuchhuak ziah thin. National Crime Record Bureau record-ah pawhMizoram hian India ram puma mahni intihlum (suicide rate) punna sang ber dinhmunte pawh kan lo luah tawh a ni. Record-a lan dan chuan kum 2019 khan Mizoramah mahni intihlum mi 70 an awm a, Manipur leh Nagaland chu hei aia hniamah hian an la awm a ni. Rilru hah, depression nei leh mahni intihlumkan tam em em chung pawha state hlim ber kan la ni thei hi a mak viau mai.

5. Chhungkua leh thenawm khawveng inlaichinna hi tehna pawimawh tak a ni bawk a. Hemi kawnga kan dinhmun pawh hi ngaihtuah chian a tulkhawpmai. Mihring nuai sawm awrh chennaahhiannupa inthen, chhungkaw kehchhia leh enkawltu nei lo fahrah kan tam em em a. Fahrah enkawlna inte chu engtik lai pawhin a lun em em a, Zuangtuia TNT phei chu ram dang khualzin (foreign tourist) te hnenah chhuang takin kan lo kawhhmuh a, kan tlawhpui chawt thin. Ngaihtuah chian chuan kristian hlang awmna kan state mualphona a ni mah zawk.

6. Thenawm khawveng nena kan inlaichinna thu-ah pawh ramri avanga intihthiam lohna a tam em em a, ram inchi hnih khat lek vangin thenawm khawveng kan inhmumawh fo mai. Mizoram tluka LSC inbawhthuah tamna ram, ram inchuh vanga thenawm khawvengte nena innghirngho tamna ram hi awm ve tak maw? Ram neih chungchangah kan duham em em a, chhungkaw thenkhat chuan an chhungkaw hming kimin LSC-te zuk nei thei a maw le! Mahse, a duham am hi an hlim lo emaw tih mai tur a ni. Ram ngah ngah, LSC nei tam tam hi intibuai tam, court-a unau inkhing uaih uaih an ni duh khawp mai.

7. Sakhuana, thlarau lama kan chim chin hi tehna pawimawh tak a ni bawk a. Hemi kawnga kan dinhmun pawh hi ngaihtuah chian a tul viau mai. Kan sakhua-Kristianna hian nun hlimna, chhungrila lungawina tak tak hi min thlen em le? Kohhran leh KTP/TKP-a kaninhman chhanah hian kan chiang tak zet em? Rual pawl nan, fel nih hlawh nan, a langa mawiah, nupui pasal zawn nana inhmang hi kan ni lek mai lo’ng maw? ‘Mi an inhmang emaw, inhmang lo emaw, mi an inkhawm emaw, inkhawm lo emaw, Pathian fak leh chawimawi hi ka tih tur a ni a, amah pawl turin a biakbukah ka kal a ni’ tia conviction fel tak neia inkhawm, kohhrana inhmang hi engzat tak awm ang maw?

Kan inkhawm tlut tlut a, Mizote aia inkhawm nasa hi hnam dang an awm kher lo ang. Mahse, kan inkhawm nasatna hian a tha lamin kan nunah nghawng a nei tak tak lo em ni a tih theih. Kuminah hian Covid-19 vangin kum chanve aia tam kan inkhawm thei ta lo a. Mak deuh mai chu, police record-a a lan dan chuan kan inkhawm loh chhung, thla ruk chhung hian Mizoramah sualna (crime rate) a tlahniam hlauh zawk mai! Kan inkhawm loh vanga crime rate tlahniam chu a ni hauh lo ang a. Mahse, kan inkhawm thin lai aia kan inkhawm theih loh laia crime rate a tlahniam a nih chuan kan inkhawm tlut tlut thinnate khan a tha lamin kan nunah nghawng a nei tak tak lo a va ni mai awm em? Kristianna sakhua hi a tha lo ni loin, keini Mizo Kristiante hi chuan ngaiah kan neih vel mai mai a, kan sakhuanna hi thatpui thamin kan nunah kan seng lut lo pawh a ni mahna.