Zawhna: Kapu, nikum lockdown atanga vawiin ni thleng hian veng tin leh khaw tinah, thalai leh kan milar (doctor)-te zingah stroke leh heart attack avanga thih thut thutna ang chi hi atam em em a (Lungphuchawlte, muhlum te!). Hengte hi lockdown avanga kan taksa kan sawizawia kan chet tam loh avang leh kan awm awl leh kan ei tui lutuk luat avanga he natna hi rawn hluar ta hluai a ni thei ang em?

Chhanna: I zawhna hi chhan thiam a har viau mai le. Lockdown hma atang tawh khan kum naupang lamah stroke (thluaka thisen zam chat emaw, thisen zam block emaw vanga thisen kal thei lo) leh heart attack (lung chawmtu thisen zam inblock) hi a tam chho telh telh niin kan lo hre thin a. Chung zingah chuan doctor-te an tam ve kher em tih erawh sawi mai a har ang a. A nawlpui ang zawnga sawi pawh a chi zawk mai thei. Survey-te ti ta ila, stroke leh heart attack vanga thihna hi lockdown chhung leh hnu lamah a tam leh tam lohte pawh a hriat theih mahna; chuti chung pawh chuan lockdown hmaa chung thihna thleng (pre-lockdown baseline data) chu engzat nge kan hriat loh chuan lockdown vanga puh ngawt chu a har hmel bawk.

Engpawhnise, lockdown kha chuan mihring tam zawk min tithatchhe ngei tih a hriat a, inah kan tawm a, ei leh in lamah kan intuituah nasa a, kan taksa a che tlemin kan insawizawi tlem sawt bawk ang a, zu leh zuk leh hmuam lam ti mi phei chuan an tih nasat phahte pawh a rinawm viau mai. Chung kan han sawite chu stroke leh heart attack thlen tamtu leh thlen chhan common ber berte an ni bawk. TV kan en nasa a, zan kan meng rei tlangpui a, men rei chuan zanriah ei hnuah pawh hmawmsawm leh ei leh in lam chhunzawm a lo awl nge nge bawk a, taksa tan chuan stress a tam duh viau mai thei.

Heng natna pahnihte hi khawvelah pawh thih chhan (cause of death) common ber berte an ni tawh a. Tun hma deuh kha chuan kum upa lamah a awm tam tlangpui a; mahse, tun hnaiah erawh chuan kum naupang tete, a bik takin kum 35-50 inkarah kan hmu ta fo mai. Zunthlum natna pawh hi kan pung hle niin kan doctor thiamte chuan an sawi. Chuvang tak chuan ei leh in kan uluk a ngai hle a, hriselna kawngah kan harh thar a pawimawh a, taksa sawizawi lam kan intihhmuh zual deuh deuh a ngai a, office leh khawi ilo kal velnaah pawh lirthei chelek lova kea kal tam kan intihhmuh a tha hle mai. Chuti a nih loh chuan ruihtheih thil kaihhnawiha a thi kan tam tawh nak alaiin thalai deuh deuh stroke leh heart attack avanga thi kan pung zel ang. In check-up nachang pawh kan hriat thar a tul hle mai.