Thawhlehni chawhma khan Pu Lalsawta, finance minister-in kum 2014-15 chhunga sorkar sum ruahmanna a pharh a, he mawhphurhna a chelh hnu a regular budget hmasa ber a pharh ruala a thusawi dan atang khan Mizoram sum dinhmun that loh zia a hriat thei a. "Sum leh pai dinhmunte pawh a nihna bak sawi ka tum lova," ti a sawitu minister hian huaisen taka Mizoram sum dinhmun tarlan a tum niin a lang a. Tunhma khan hetiang deuha budget speech a sum harsatna chungchang puang chhuak ngam hi an lo awm tawh a, Pu J. Lalsangzuala (RIP), Finance Minister hlun khan sum harsatna namen lo state sorkarin a tawhna chhan chu sorkara mawhphurtute’n nuam an chen vang, sum dinhmun phak bak sum an hman vang a ni, tiin rilru na takin a lo chham tawh a ni. Tuna kan finance minister thung hi chuan sum harsat chhana a mawhpuh ber chu mipui mamawh ngawih ngawih atana sorkarin sum tam tak a sen thin vang leh sorkar hnathawk hlawh pung hi a ni thung. Ngun taka kan state sum dinhmun leh sorkarin a enkawl dan han chhut hi chuan Pu J. Lalsangzuala sawi khi tuna sum harsatna thlentu lian ber pawl a nih ve tho hmel a, finance minister hian a sawi lang lo mai mai a nih hmel. Finance minister-in sum harsatna thlentu langsar tak buhfai leina senso chungchang a sawi dan chuan sorkar hian buhfai leina atan thla tin Cheng vbc 22 vel a seng ziah a, mipuiin an lei chhawn hnua sorkarin a la chawi zat chu Cheng vbc 13 lai a la tling a. Kum khat chhunga sorkarin buhfai avanga a hloh zat chu Cheng vbc 156 lai a tling a ni. Hei bakah hian kum kal ta 2013-14 chhunga electric power leina atana sorkarin Cheng vbc 183.14 lai a hmang a, mipui hnen atanga electric hman man a hmuh let zat chu Cheng vbc 109 a ni thung. Sorkar hian thlatina a senral zat chu Cheng vbc 6.18 a ni a, kum khat chhungin Cheng vbc 74.14 a tling bawk. Sum hmanna langsar dang mipui tana tui thianghlim a peknaah hian thla tin Cheng vbc 5 a seng ziah anga chhut ni bawk. Heng thil pathum avanga sorkarin thla tina sum a hloh zat chu Cheng vbc 24.18 vel lai a tling a ni. Finance minister chuan heng lei leh hman man hi tihsan a sawi lang nghe nghe a ni. Mahse, mipui mamawh phuhruk sak hi sorkar tih tur a ni a, mi tlemte hamthatna tur ni lo, mipui nawlpui hamthatna tur thil a nih dawn chuan in sengso deuh pawh a tih hram tum ni se, tul vak lo thil danga senso hi inhrek zawk ta se a tha in a rinawm. Heti khawpa sum dinhmun a tha lo a, mipui hamthatna atana hman thleng a an ui takah hi chuan kumin kum tir lam, sum harsat vang lai tak a Minister rualte car thar leina atan Cheng nuai 341 zet an hmang mai te kha a uihawm thar riau a ni. Sum harsatna chungchang sawi apianga mi thenkhatin an sawi fo thin chu sorkar hian parliamentary secretary pasarihte hi a mamawh tak tak em, tih hi a ni. Minister-te department chan han en hian mahni pawh a enkawl theih mai tur tawk vek an chang a, state dang leh sorkar laipui ngaihtuah phei chuan an hah lutuk loin a rinawm a. Chuti chunga parliamentary secretary pasarih ngawt mai (Minister tluk deuhthaw) an awm avanga sum senso tam phah lutuk te hi a uihawm ang reng. Heng bakah hian chief minister atanga MLA thleng a an hamthatna dawn thenkhatte leh official-ho hamthatna dawn te pawh tihtlem deuh a, mipui phurrit siam zawnga pawisa lak luhna lam tih tam ngawt aia inrenchem zawngin hma lak hmasak phawt hi a thain a rinawm. Kum liam ta 2013-14 chhung khan sum enkawlna lamah sorkar a che tha lo hle tih budget document atang hian a hmuh theih a. 13th Finance Commission hun chhunga awm kan ni a, anni (13th FC hian) Mizoram sum indaih lohna (fiscal deficit) kum tina tih tlakhniam a duh a, a tlakhniam dan tur rawtna pawh a nei sa vek a. State sum lak luh zawng zawng (GSDP) atanga chhut a sum indaih lohna hi tlahniam hret hret tur a ni a, kuminah hian 3% a ni tur a ni nghe nghe. An ruahman ang chuan sum indaih lohna chu kum 2012-13 ah khan 5.2 % (5.2% of GSDP) ni tur a ni a; mahse, a takah chuan 7.21% a ni a. Kum liam ta 2013-14 khan 4.1% ni turin an rawt a, mahse a takah chuan sum indaih lohna hi 18.15% daih tling tura chhut a ni. Heti tak maia nikum lama sum indaih lohna a san dawrh chhan hi sawi fiah a ngaih hmel. Hetianga Finance Commission rawtna ang hi pha lo zel ta ila, tanpuina (Grants) kan hmuh tur ang te hian a tuar thei mai thei. Budget speech-ah khan August 2015 a Medical College din tur thu kha finance minister-in a sawi a. A nghahhlelhawm viau ruain he college hi sorkar laipui suma din tur nge state sorkar senso vek tur tih erawh sawi chian a ni lo a. Keini ang state pachhiain medical college tha tak kan din theih a rinawm chiah lo bawk a, sorkar laipui tum turin kan hruaitute hian hma an la turah ngai phawt ila. Kan budget-ah hian hmalakna kal mek hrang hrang tarlan a nih rualin thil thar diai hmuh tur a vang viau. Tunhnaia sorkar laipuiin a din, hmarchhak biala kawngpui siamtu tur National Highway Infrastructure Development Corporation Limited-in tun thla hian Meghalaya-ah hna an thawk tan dawn a, hetianga hmalakna thar tur chiang sa hi a awm ve a nih chuan kan budget-ah te hian lang ve thin ta se. Budget speech-a phaia hnathawk tura tirh liam thu leh sports tournament pahnih khat a lawmman lak avanga hlawhtling ta lua a insawi ai chuan kumin chhungin eizawnna thar chuti zat siam a ni ang tih te, loneitute tan khawl/hmanrua chuti zat sem a ni ang tih te, mirethei chuti zat chuan hamthatna an dawng ang tih te, sum harsatna kan tawh mek lai a thuneitute lam inhrek dan tur te, hi hmuh tur awm se, mipui harsatna tawh mek thil man to chak lutuk sutkian dan tur ruahmanna te tarlan tur awm se chu thalaiten kut kan beng ngei ang. A chunga sawi ang hian sum indaih lohna sang lutuk hi a veiawm a; mahse, heti taka veiawm si hi a sutkianna tur leh a siam thatna tura hmalak dan tur mumal tarlan a ni leh lo pek a. Chhiah thar lak tur a awm lo leh a, mipui tan chuan a lawmawm viau ang. Budget-ah hian chhiah lak thar tur te, lak tawh sa a bi (Rate) tih danglam dan tur te tarlan a ni thin a, chu chu India ram sorkar kalphung a ni. Mahse, tun budget-ah hian chutiang ang chu hmuh tur a awm lo leh pek a, ti hian budget a tarlang lem lo hian an duh hunah an duh angin thuneitute hian a rawn khawn leh pawp dawn pawh a ni maithei. Mipui nawlpui nghawng na lo zawng a sum hai luh dan hi sorkar hian a ngaihtuah tak tak lo a mi chu aw, a ti theih hial a ni. Annual plan sum pun thu tarlan a ni a; mahse, NLUP sum vang leh kum danga state annual plan a an dah tel ngai loh CSS leh a dangte an dah tel vang a tam hmel mai a ni. A nihna takah chuan kum dang aiin hma thar lakna tur sum hman tur a tlem mah maithei a ni. NLUP chungchang tarlan a ni a, tun sorkar hmalakna pui ber a ni leh dawn a, kumin hian Cheng vbc 317.32 senso tur sorkar laipuiin plan sum atangin a ruahman a. NLUP hi rei lo te a tawp mai tur a nih hmel a. A hlawhtlin dan leh mipuiin an chhawr dan hi chhui chian a hun tan khawp a, sorkar pawhin engtiang chiaha hlawhtling nge a nih, tih hi a la zir