Kamchhuak

SUM HARSATNA KARAH EI LEH BARA INTODELH

K. Lalrinchhana - Aug 04, 2022

Intodelh kan duh a, sawrkar pawhin ei leh bara intodelh a duh. Amaherawhchu, tun thlenga kan intodelh theih loh chhan hi enge ni ang? Intodelh tura kan hmalak danah hian tih fuh tawk lo kan nei a ni mai thei.

Tunlaia ti ti lar tak, social media lamah pawh sawi hlawh tak pakhat chu Mizoram sawrkar sum harsatna chungchang hi a ni awm e. Sawrkar laipui thupek angin Mizoram sawrkar chuan CSS sum tam tham tak mai chu a pechhuak (release) ta si a, cheng vaibelchhe 600 chuang teh meuh a han release takah chuan sawrkar sum bawm pawh a phai ta rawk rawk niin a lang. Sawrkar hnathawk te pawhin a hun takah hlawh an la thei dawn lo niin a lang ta a, sawrkar hotute lu pawh a hai ve viau ang.

Mizoramah chuan sawrkar hnathawk hlawh hi mipui nawlpui innghahna ber pakhat a ni a. Sawrkar hnathawk te’n a hun takah hlawh an lak loh chuan chawpchilhin tualchhunga sum leng vak a tlahniam nghal thin. Sum leng vak a tlem chuan sumdawng te an inhralh thei lo a, bazara chawhmeh zuar, nitina inhlawhfa leh lirtheia eizawng te pawhin an tuar nghal thin. Hei hi thil awmdan a nih vangin sawrkar pawh hian a hnathawk te hlawh bat sak emaw, a hun taka pek theih loh hi a hlau hle thin a, tun tumah pawh hian rei tak chu a bat sak lo turah ngai ila, keini mi vangtlangin kan ngaihtuah aia nasa hian sawrkar hotute hian an ngaihtuahna an seng nasa ang tih a rin theih a, tun ang dinhmun harsaah hian kan ding reng lo turah inngai phawt ang. 
    
Kan innghahna leh kan sum hnar ber sawrkar laipui hi a tlachhe ve thei tho a, tunah pawh India ram atanga foreign investor te an inhnukdawk nasa a, hei vang leh Russia-Ukraine War avanga oil man sang avang tein india pawisa hlutna chu a tlahniam mek a, tunah hian US dollar 1 leh India pawisa cheng 79.20 a intluk vel mek a ni. Hetiang hi thil awmdan a nih vangin sawrkar laipuia innghat pumpuhlum reng lo hian kan mamawh bulpui, ei leh bar tharchhuah kawngah te tal hian intodelh a tul ta hle mai. Kan mamawh engkim kan siam chhuakin kan thar chhuak thei hauh lo ang. Hetih rual hian kan nunna atana kan mamawh, chaw atana kan rin pui ber buh (rice) tal hi kan ei khawp thar chhuak thei ila tha tur.

Hman deuh khan mi langsar tak pakhat chu ram hmasawnna tur thil sawihona function pawimawh takah khuallianah an sawm a, (Chu khuallian chu tunah chuan Minister a ni tawh nghe nge a) Khuallian chuan chumi tuma a thusawiah chuan buh (rice) tharchhuah kawnga intodelh tum chu ho a tih thu te, sawrkar tan policy-a neih thama a ngaih loh thu te, keini state mipui eikhawp lek thar chhuak tum ai chuan lei mai a awlsam zawk thu te, kan eikhawp buhfai lei nan ngawr ngawr chuan sum a ngaih tam loh thu te a sawi a. Amaherawhchu, ramri buaina avang leh thil dang vang pawhin kan ei leh bar lakluhna kawngpui hi rei tak dan chah a ni palh thei a, dinhmun harsa takah pawh kan ding thei. Chutiang hun a lo thlen palh pawha kan chaw pui ber buh (rice) a kan intodelh miau chuan a tih dan dan a awm zawk dawn lawm ni?  

Kan vannei a, ram kan nei tha a, kan ram leilung hi thlai chitinin an ngeih emaw tih tur a ni. Khawkheng leh tuilianin min tibuai ve ngai lo bawk. Tuna kan thingtlang lo neih dan anga kumtin ram thar zuan zel hi a hahthlak a, a hlawk lo a, ram a uihawm em em bawk. Mithiam te leh kan ram hruaitu thenkhatin an sawi thin dan angin kan rama lui kam phai ram rai (low lying area) te hi buh chin nan, WRC ah let vek thei ila, khawl (machine) leh kawlphetha chakna nena kan tan kawp bawk chuan thingtlang lo neih bansanin kan kum khat ei buh kan thar chhuak thei ngeiin a rinawm. Chutiang tur chuan potential kan nei a, kan potential neih te hi a nih dan tur angin kan hmang tangkai lo mai zawk a ni. 

UT kan lai ata tawh sawrkar apiangin ei leh bara intodelh hi a an ngaipawimawh em em vek a, tun thlengin ei leh barah kan la intodelh thei si lo. Keini mi vangtlang chuan heti taka kan hotu te’n an ngai pawimawh chung pawha kan intodelh thei si lo hi thil harsa tak a nih dawn hi tih mai tur a ni. Pu M Lalmanzuala hi ei leh bara intodelh duh mi a ni a, Mizoram Chief Secretary a nih lai khan ei leh bara kan intodelh theih nan nasa takin hma a la a, thingtlang lo neih ban san a, buha kan intodelh theihna tur leilet siam nan Planning Commission atangin cheng vaibelchhe 12 a dil chhuak a. Khatih hun lai, kum 30 liam taa cheng vaibelchhe 12 chu tam el awl deuh a ni. Dik takin a hmanna tur takah hman nise awmze neia hna tangkai thawhna tham a ni. Mahse, chu pawisa, a hun laia kawngro su tham chu ruling MLA te chuan mahni bial theuha semah an it ta tlat a, sum tam tham tak chu awmze nei loin a luang ral leh ta a ni. 

Intodelh kan duh a, sawrkar pawhin ei leh bara intodelh a duh. Amaherawhchu, tun thlenga kan intodelh theih loh chhan hi enge ni ang? Intodelh tura kan hmalak danah hian tih fuh tawk lo kan nei a ni mai thei. Sum faia sem leh thawr hi kan that pui lo a ni mahna.

Sawrkar laipui sum bawm hi a phai thei a, India pawisa hlutna hi a tla hniam thei a, central atanga kan sum hmuh hi a tlem tial tial pawh a ni thei. Engpawh lo thleng se, kan mamawh bulpui ei leh barah kan intodelh chuan hun harsa kan tawh pawhin kan manganna a nep deuh tur. Thingtlang pa hian sum fai tam tak nei lo mahse, a buhzemah an chhungkaw kum khat tla zan tur buh a neih chhung chu a thlamuang thin.

Share now