Tun hnaiah hian India ram state tam berte hmasawnna (economic growth) hi a kal muang hle a, sorkar laipui sumah an innghat nasa tial tial bawk niin mi thiamte chuan an sawi a, beisei aia India ram hmasawnna a chak theih loh chhan ber pakhat pawh (thil dang bakah) state hrang hrangten sorkar laipui sum bawm an zenpui nasa tial hi niin an ngai bawk. State teho mai ni loin, a lianho hlei hlei hian sorkar laipui an hnik nasa zawk emaw tih tur a ni a, politics nen a inkaihnawih tlat avangin state lianhoten duhsak an hlawh bik fo lehnghal a. Chutiang chu ram pum dinhmun a nih mek laiin state te zawk leh rethei zawk Mizoram ang tan phei chuan sum harsatna hian kian lam a pan hlei thei lo a, a zual kai deuh deuh zawk mah a ni. ‘Sorkarin sum harsatna a tawk’ an tih kan hriat hian a ‘Sorkarin leiba a ngah’ tihna tluk a ni. Sum harsatna lo awm chhan chu sum indaih loh vang a ni a, chhungkaw rahbi tleu laklawh sum lak luhna a awm loh changa ni tin mamawh leh thil danga hman tur pawisa kan puk thin ang chiah hian sorkar pawh hian a thawh chhuah/lak luhin a daih baka sum hman tur a puk a ngai a, a pung awma a puk a ngaih leh thin avang leh leiba inchhek khawl zel hian harsatna a thlen tam tial tial thin. Sorkar laipui hian state hrang hrangte sum indaih lohna leh an leiba pung tial tial hi a vei hle a, chhiah leh thil danga sum lak luh tipung zel turin a duh bakah hlawkna thlen lo tur thil ho mai mai atana sum hman titawp tur te, sum thawk chhuak tur zawnga hmala turte hian a duh thin a. Chutiang hawi zawnga hma an lak theihna turin ruahmanna pawh a siam fo reng a ni. State sorkar sum hmuhna hnar pawimawh tak chu kum nga dan zela sorkar laipuiin a din Finance Commission-in an rawtnate hi a ni. Tunah hian 13th Finance Commission huam chhungah kan awm mek a, a thar tur 14th Finance Commission pawh din fel a ni tawh a, kum tawp lam October thlaah an rawtnate hi an theh lut dawn a ni. Finance Commission sawmpathumnain Mizoram tana a ruahman dan chuan kum 2011-12 atang khan revenue account a sum hman bang (Revenue surplus) kum tin a awm tur a ni a. Mahse, Mizoram budget ngun taka zir chuan tunhnaiah revenue account-ah hian sum indaih lohna (deficit) a awm leh zauh thin thung. Hei bakah hian kum tina leiba tlingkhawm titlem tur zawnga hma la turin a phut bawk a, leiba tling khawm hi state sum hmuh zawng zawng (Gross State Domectic Product) 74.8% aiin a tam tur a ni lo bawk. Tuna kan sorkar sum dinhmun hi a tha lo viau a ni awm a, sum bawm ruak leh huai thin avangin puk deuh reng a ngai a, Treasury-ah bill tang pawh a tam hle a ni. Kan state leiba tling khawm hi Cheng vaibelchhe 5400 chuang a tling tawh a, sum indaih lohna a nasat zel avangin leiba hi a pung chho zelin a rinawm bawk. Mipui nawlpui tan pawh heti em em a tam sorkarin leiba a nei leh sum harsatna nasa tial tial hi a veiawm a, ram hruaitute phei chuan a tak taka an vei a hun takzet a ni. Sum indaih lohna leh leiba chungchang a kan ngaihtuah fo tur chu a chhan hi a ni. Hmasawnna hnathawhna atan te, ro tling siamna atan te, mipui hamthatna tur thil atan te, nakin a hlawkpui tur thil atan te a sorkarin sum a puk teuh a nih chuan a lawmawm lam a ni a, phur rit a ni rei dawn lo tih a chiang. Chutiang ni lo a hmasawnna thlen tak tak lo tur thil a sum hman vang te, ram hruaitute chet hautak lutuk vang te, eirukna avang te a sum indaih lohna a pung zel a nih chuan a zia lo khawp ang. Sorkar hian sum harsatna sut kianna tura an ngaih pawimawh ber chu mipui hnen atanga chhiah lak belh hi niin a lang, mahse, chhiah atanga sum lak luh hi pung thur thur mahse thuneitute an inhrek duh miau loh chuan awmzia a awm thui tak tak chuang lo ang. Sum harsatna namen lo kan tawh mek lai a thuneituten a tlaran zawng a sum an hmang hiau hiau reng a nih chuan harsatna zual zawpui kan tuar ngei ang. Chutiang dinhmunah chuan kan ding mek ni pawhin a lang nghe nghe. Leiba tam tak neih lai a car thar changkang tak tak Cheng vbc 3.4 chuang senga lei an tum te, MLA zawng zawngin an mimal car leina tur an dawng thin te, an mamawh ni lem lo laptop/tablet an dawng thin te, pung tlem te a loan an lak te leh a dang te hi sum renchemna atan insum ngam rih se a lawmawm viau tur ania. Mahse, a harsa a ni ang e. Tuna kan ram dinhmunah hian chhiah atanga sum lak luh tihpun chiam ai chuan thil tul em em lem lo a sum luan ralna tur ven hi hna hmasa ber tur niin a lang. Chutianga, ram hruaitute an inhrek phawt chuan sum harsatna hi nasa takin a kiam ngei ang a, mipui pawhin kan fak khawp ang. - Lalthlamuana Ralte