Zawhna: Ka pu, kum 30 mi mipa ka ni a, drugs heroin khawih thin ka ni a, sex erawh ka hmang ngai lo. OST lain kum 3 dawn chu ka nghei ve tawh a. Kan inchiu thin lai khan Drop-In Centre-ah syringe a thlawna kan lak thin kha, veng chhung NGO-te khan min mansak zel mai si a, loh theih loha inhman tawm a ngaih chang hian tuiah chhum soin ka hmang mai zel a; mahse, Hepatitis C ka kai ta tho a, treatment kan la thei si lo a, engtianga inenkawl nge tha ber ang? Liv-R chu ka ei reng a, a aia tha zawk damdawi ei tur min hrilh theih em? Chuan HIV natna hi engtin nge taksaah a natna a rawn lan chhuah dan? Syringe inhman tawm atang hian kai theihna chance a sang em? Syringe mi hman hnu tuia chhum so hian natna hrik a that thei em?

Chhanna: Damdawi khawih thin, a bikin inchiu thin kan nih chuan mahni syringe bik neih a, mi dang ta tawm miah loh a, mahni ta pawh mi dang tawmtir loh hi a him ber a ni. Chutiang tur chuan inhmakhua thiam a ngai hle. NGO syringe thar an hman hlui nena thlengsak thin an awm a, he program hi MSACS hnuaia hmalakna a ni a, a tangkai hle. HIV leh Hepatitis B/C laka inven nan a pawimawh em em a ni. Chutih rualin drugs inchiu thinte hian laklawh an nei duh khawp mai; a damdawi ruih tur nei si, syringe nei bawk si lo hian an awm fo thin. Chutiang avang chuan an thian emaw, hmelhriat hnai emaw damdawi ti ve thinte syringe hi an hman tawm leh mai thin a, chhungte hian ning hle mah ila kan fate/unaute hi hri tha lo an kai loh nan syringe thianghlim leisak mai emaw, kawl reng nachang emaw hriat mai hi a him ber – an lo kai palh si chuan a hnu lama inenkawl a buaithlak em mai.

Drugs inchiu thinte hian an laklawh chuan an thiante syringe hman hnu hi tuia thuah thuak thuaka inchiu leh mai an ching a, a him lo hle. Chhum so tur pawh hian an hun neihin a daih tawh thin lo va, chuvang chuan HIV emaw, Hepatitis C emaw hi an kai awlsam em em a ni. Syringe hman hnuah hian a chhungah thi khar chhete bet awm ta se, chu chu chhum soa hrik thah theih mai a ni thin lo. Chutiang avang chuan HIV pawh hi inchiuna hmanrua intawm atanga kai hi kan ram bikah kan la thahnem hle; 27% emaw dawn hi chu an la ni. Chutiang bawkin Hepatitis C pawh hi inkai a awlsam a, tuna data kan neihah phei chuan drugs-a inchiu thin 80-90% hian Hepatitis C an kai a ni.

HIV hi an lo kai a nih pawhin a tam zawk chu insawiselna nei mang lovin rei tak an awm thei a. An CD4 cells (taksa vengtu) kha HIV hrikin a ei chhiat tam tial tial hnuah an immunity (natna vengtu) a lo tlahniam a, harsatna chi hrang hrang an lo nei ta thin a ni. Chutiang avang chuan mahni dinhmun hre si lova nungchang tha lo an neihte an bansan bawk si loh chuan hre lovin mi dang an kai nual thin reng a; chuvangin, mahni dinhmun hre tura thisen test nachang hriat hi a pawimawh hle. Drugs inchiu thin kan ni emaw, mipat hmeichhiatna lama kan lo inhmang tawh emaw a nih phei chuan HIV test hi ti ngei ngei ila, kan lo la fihlim hlauh a nih chuan fihlim reng tura inven nachang hriat bawk tur a ni. HIV kan lo kai palh tawh a nih chuan a enkawlna, ART damdawi ei thuai ila, mi dang tan kan hlauhawm nep bawk ang.

Hepatitis C (HCV) pawh hi a thawm a zawi hle. Thisen test loh chuan hriat dan vak a awm lo va, a rei hnua thin (liver) a lo khawih chhiat tan tawh hnua hre chhuak an ni fo thin. HCV hi i kai tawh a nih chuan RNA test, Viral Load leh Genotyping test te tih leh a ngai a, chumi azir chuan damdawi hmanga enkawl i mamawh em tih a hriat chauh ang. Tunhma khan a enkawl man a to thei hle mai a; mahse, thiamna sang zelah man man zawka enkawlna leh damdawi tha zawkte a lo chhuak ta zel a. Tunah phei chuan National Viral Hepatitis Control Program te sorkarin a lo buatsaih ta a, reilo teah HIV free treatment ang hian a enkawlna pawh a thlawn an la pek theih thuai a rinawm. Tin, Health Care Scheme hnuaia in-register i nih chuan a enkawlna hi a thlawnin a dawn theih bawk a, Civil Hospital lamah i lo ngaihven dawn nia. Pawimawh zawk erawhchu drugs inchiu thin i nih a, i la sim lo a nih bawk si chuan enkawlna dawngin dam mah la, a hnu lamah re-infection i nei leh thei a; chuvangin, i fimkhur hle a ngai a ni. Private Laboratory tam berah hian Hepatitis B leh C hi a in-test theih a, he natna vei hi kan tam tial tial mai a, mipuite pawhin mahni dinhmun hriat nan in-test nachang i hria ang u.