Brooklyn, New York khawpui daiféma mi retheiho chènna hmuna chêng ve chhúngkaw pakhat chu an thenawmte ang bawka rethei an ni. Chhúngkaw pa ber thla tin hlawh, dollar 200 chu chhúngkaw chàwm nán chuan a beitham thin hle. An fa upa ber Michael-a chuan retheihna ûm bo dàn tùr chu a ngaihtuah ru ve rân thin.

Tum khat chu, kum 13 mi a nih laiin a pa’n Michael-a chu a ko a. T-shirt hlui zet mai pêk pahin, ‘He kawr hi dollar eng zâta hralh theih nge i rin?’ tiin a zâwt a. Michael-a chuan T-shirt hlui chuar zet chu a’n thlêk vêl a, ‘Dollar khat chuan duh an awm mial mahnâ…’ a ti a. Chutah, a pa chuan, ‘Dollar hnihin va hralh rawh!’ a ti ta mai!

Michael-a chu a meng phâwk hle. Mahse, rilru hrisêl tak pú Michael-a chuan, chu T-shirt hlui leh ung zet chu dollar hniha hralh theih dàn tùr a ngaihtuah ta a. A su fai a, a pho ro a. A nawh marna tùr Istiri an neih ve loh avàngin kawr inchher chhuan rit hnuaiah a phah ta a. A tûkah chuan kawr chu a lo mar ve ta deuh.

Rél chawlh hmun hnai ber a pan a. Rei fé a zawrh hnu chuan chu T-shirt hlui chu dollar hnih chuan a hralh thei ta hlauh. A pa hnênah lãwm takin a hralhna pawisa chu a pe ta a.

Ni 15 hnuah a pa chuan Micahel-a chu a ko leh a. A hmaa a T-shirt zawrh ang thoa hlui leh ung chu pêk pahin a pa chuan, ‘Dollar 20-in va zuar leh rawh,’ a ti leh leh ta!

Michael-a chuan mak a ti tak zet. ‘Hetiang T-shirt hlui hi tuin nge dollar 20-in lei duh ang!?’ a ti ve. A pa chuan, ‘Hralh va tum phawt mai teh,’ a ti bur mai si. 

Michael-a chuan chu T-shirt hlui tawh tak, dollar 20-a hralh theih dàn tùr chu a ngaihtuah leh ta chiam a. A tûkah chuan khawpui laili-a a thianpate inah a va kal a. A thianpa chuan Mickey Mouse sticker a lo pe hlauh. Chu sticker chu a T-shirt hralh tùrah chuan a thui bet ta a. Mickey Mouse lem chuang T-shirt chu kengin, mi hausa fate luh tamna sikul lam chu a pan ta a.

Naupang sikul báng chuan Michael-a T-shirt zawrh chu an en sap sap hlawm a. An zínga mipa naupang pakhat chuan a awt ngang mai; amah rawn hruaitu a pa hnênah chuan ngen tak tê-in lei chu a ngèn a. A pa chuan leisakin a man dollar 20 bâkah ‘tip’ dollar 5 pêk belhin a leisak ta a. Lãwm takin dollar 25 chu a hàwn ta a ni.

Ni rei lo te hnuah chuan a pa chuan Michael-a chu T-shirt hlui dang zawrh tùr bawk chu a pe leh a. Chu ve thung chu dollar 200 a hralh tùr a ni thung. Mahse, a T-shirt lo hralh tawh aia a that viau bîkna a awm hran lo. A hlui dàn leh a un dàn paw’n a hmaa T-shirt a lo hralh tawh rual a páwl tho bawk si! Dollar 200-a hralh chu a huphurhawm dáwn hle mai. Mahse, Michael-a chu phunnawi lo leh eng mah sawi buai loin T-shirt chu zawrh tùrin a la leh ta a.

T-shirt a zawrh tum ní tak chuan New York-ah Hollywood lemchan thiam Farrah Fawcett-i a rawn kal dáwn tih a hre hlauh! Chu chu remchánga hman dàn a awm a ring tlat a; khawpui hulùm lam chu a pan ta a.

Hollywood actress chhe lo Farrah Fawcett-i hmuh tum mipui chu an lo páng-aw-inzial tup tup mai a. Ani Michael-a chu tum tha tak neia chu Hollywood star chu hmuh ve tum a nih avàng leh a thil tih tum chu a tum ruh êm avàngin police-ten daidanna an siam pawh chu engtin tin emaw a paltlang thei hlauh a. Farrah Fawcett-i chu a hmu ta!

Pen tui reh thei loin a T-shirt zawrh tùr hmaah chuan chu lemchan thiam autograph (hming ziak) chu a díl ta! Ani Fawcett-i’n chutiang naupang rethei, pawi sawi bawk si lo a hmuh chuan a khawngaih ta êm êm mai a. Nui var var chungin Michael-a T-shirt hlui ken lai chu lâksakin a hming chu lian hre hraw tak maiin a ziahsak ta a.

A tûkah chuan bazar lùn lam a pan ta a. Farrah Fawcett-i hming chuanna kawr chu dollar 200 chuan a zuar ta. Kawr inchuhin mipui an rawn pung khâwm chiam mai a. A hnuah phei chuan a man an inngam huaisiak ta hial! A tàwpah chuan sumdawng hausa pa pakhatin dollar 2000-in a leisak ta a ni.

In a thlena a pa hnêna report a pêk hnu chuan a pa chuan, ‘Ka fapa, i duh tak zet chuan he khawvêlah hian engkim i ti thei a ni!’ a ti ta a.

He kawr zuar, naupang rethei kan sawi hi, lei lung pian tirh atã vawiin thlenga basketball khêl tawh zínga mi ropui ber Michael Jordan a ni!

‘Mi thenkhat chuan hlawhtlinna hi an chunga thleng tùrin an duh ringawt a, mi dang leh chuan a thlen theih an ring chauh a, mi hlawhtlingte erawh chuan an chungah an thlentír thin,’ titu Michael Jordan hian professional basketball a khelh chhúngin tum 14 zet NBA All-Star game-ah a inlan a, tum ruk NBA Champion a ni. USA Basketball team tum li gold medal a lâkpui bawk.

‘Ka inkhelh chhúng khán tum 9,000 chuang ka thun thelh a, game 300 dáwn ka chak lo. Team ka chakpui ngei ngeina tur shot, ka chunga tla tum 26 ka hlah bawk. Ka nunah hian ka hlawhchham zing ve asin! Mahse, chûng zawng zawng chu ka hlawhtlinna chhan a ni,’ titu Michael Jordan hi a ni hlawhchhamna hmang tangkai thiam mi hlawhtling chu!