Kawmchhak awihtlanah chuan naupang te hi a inkhualtelem a. A motor lem kalna turin kawng a sial a, a hlim em em mai a. A kawng lem sialna laiah chuan lung lianpui hi a lo awm a. Kar phawn tumin a bei tauh tauh a, a kuai che dut dut thin a, mahse a phawng thei mai si lo. A beidawng chu a tap ta a. A pa, a ruka lo thlir rengtu chu a rawn tlan vat a. “Ka fapa, engati nge i theihna zawng zawnga i beih hmaa i tah mai le?” a rawn ti a. Naupang chuan, “Pa, ka theihna zawng zawngin ka bei asin, ka chakna zawng zawngin ka tum alawm,” a ti a, a tap pur mai a. A pa chuan, “Bawiha, i bei lo, nangmah pui turin min rawn sawm hlei nem!” a ti ta a. A fapa titaptu lung chu a phawng hlawk a, a motor kawng sial lai dal lo tur chuan a dah sawn sak ta nghal a. Mi tin hian chakna leh theihna kan nei teh meuh mai. Kan chakna leh kan theihna erawh a inchen lo. Ni tin nuna harsatna lungpui kan tawh thin lum sawn tur hian theihtawp chhuaha tang ve tur kan ni. Mahse tunge mahni chauha engkim hneh thei awm? Tunge mahni chauha engkim ti vek thei? Thiam zawng kan nei a, tih theih chin kan nei vek. Kan thiam loh zawng thiam an awm a, kan tih theih loh tithei an awm thin. Mi dang tanpuina zawn hi a tul hunah chuan hreh loh tur a ni. Mi dang puihna zawn nachang hriat hi a fin thlak fo. Mahniin kan tihtheih loh china mi dang puihna zawn hi nepna a ni lo. Keimaha theihna awm sawrchhuahna chikhat tho a ni. Tlawma lak chi a ni ngawt lo e. Mi pakhat nen kan inkawm a. Harsatna a nei nasa viau mai a; mahse, huaisen takin a paltlang mek a. Amah tanpuitu leh thurawn petute an awm zel dawn avanga a hma lam hun chu huphurh lutuk lo turin kan infuih ve a. Min chhanna chu, “Ka dinhmun anga awm hi tuman thurawn an pe tawh ngai lo, thurawn pek tur kan ni tawh lo,” a ti mauh mai a. Dinhmun sang tak leh awhawm taka ding a ni reng a. Chu dinhmun sang tak chu ka awt ta lo tawp mai. Thurawn pek phak loh khawp leh thurawn dawng thei lo khawpa dinhmun sang chu kei mi chak lo, mi dang tanpuina leh thurawn mamawh thin tan chuan awh chi a ni lo. Harsatna i tawhin i theihtawpin hneh tum la, bei ve rawh. I theihtawpa i beiha i hneh loh hian beidawngin tap nghal mai lo teh. Tanpuina zawng la, pui thei tur che zawng la, pan la, ko ta che. Tanpuitu sawm ngam khawpin i rilru huaisen rawh se. Mi dang puih ngai lo inti khawpin chapo duh suh. Mi dang pun ngam khawpin chak zawk teh. Mi dang i pun hi i theihtawp i chhuahna tho a ni alawm. Tanpuitu kut hi i chakna tho a ni asin.