Thingtlang lo neia ei zawng pa pakhat, intodelh thei reng reng lo, kum tin mi buh puk tur zawng kual thin hi a awm a. Chu pa intodelh theih loh chhan chu eng dang a ni law, fur hlo thawh tul lai chuan hlo tho turin a feh chhuak ve ziah a. Thlam a thleng a, thlam namthlak a hawng a, thilfim a in chhemtir hauh hauh a, meizial a tan a, a zu khu vang vang phawt thin. Chutih pah chuan a hnathawh tur chu a han mitthla kual vel a, “Naktukah thlam char lam hi ka thlo ang a, tuklehah thlam chhak lam hi ka thlo leh ang a, tuklehah thlam kawt lam, tuklehah thlam thlang lam. A…vawinah chuan thawh tur a awm lo a nih hi,” a ti a, a hawng daih a. A tukah pawh chuti bawk chuan a hisap kual leh a, thawk lo bawkin a hawng leh thin.

Chutianga thawh tur hisap kual reng renga hun a hman chhung chuan hun a kal zel a, a ni telin hnim a lo thang lian zel a, buh an dip na tial tial a, kum a lo tawp meuh chuan buh thar fumfe a nei ta thin lo a, phur za thar thei khan phur sawm emaw chauh a thar leh mai thin. Chaw tel loin a khawsa thei bik si lo, kum tin mi khawngaihna dilin mi buh puk tur a zawng kual dak dak thin. Chutiang taka intodelh lo a nih avang leh, kum tin mi buh puk chawp ringa khawsa ve mai thin a nih avang chuan mite pawhin an ngaisang lo a, an ngaisang lo mai ni loin a ruk takin an hmusit a, hnung lam atangin an nuih ru tet tet thin. Vantlang inkhawmnaah leh puipunnaahte chuan intifing takin thu tha tak sawi ve thin mah se, a dinhmun an hriat chian miau avangin mite’n a thusawi an bengkhawn tak tak ngai lo a, khawtlang inrelbawlnaah chanvo pawimawh an pe ve ngai lo.

Hringnunah hian tih tur dik leh ngaih pawimawh tur tak thiar thiam a, nghak khawtlai loa bawhzui zel mai hi a pawimawh viau reng a ni. Tih tur tak ti si lo leh, ngaih pawimawh tur tak ngai pawimawh hmasa si lo hian a behbawmah kan kal ral fo thin. Kan hmabak, kan koa tla, kan tih ngei ngei tur ni bawk si, thiltih chakawm tak ni bawk si lo hi kan hel kan hel duh khawp mai. Hel hel mah ila kan tlingtlak hma chu kan rilru chhungril a luah tlat a, puipunnaa pheikhawk tawt bun ang maiin min kam ru vang vang thin. Hmabak tih tur nghak khawtlai loa hlen mai thinte chuan buaina tam tak an pumpelh a, an chaw ei a tui a, an mut a tui thin. Hel kual hel kual thinte chu a tawpah pachhiatna leh mualphonain a nang nge nge thin.

Kan state dinhmun pawh hi i han ngaihtuah teh ang. Kum tam tak a liam hnuah pawh chawmhlawm state kan ni reng mai hi, ngaih pawimawh tur tak ngai pawi mawh hmasa loa a behbawm thil, tha ve deuh tho, tangkai ve deuh tho si kan buaipui nasat zawk vang a ni mai lo maw? State kan nih tirh ata tawh kan ram hruaitute hian ei leh bara intodelh dan tur kawng hrang hrang an sawi hnem ta khawp mai. Garden Colony, NLUP, NLUP tha mi, MIP, NEDP, SEDP, Aieng, Sapthei, Sawhthing, Mau etc. a va tam tawh tak em! Mahse, vawin thleng hian kan la intodelh thei si lo. Kum tin central-ah kut kan dawh a, an khawngaihna kan dil kumtluan ringawt mai a nih hi.

Eibara kan intodelhna khawp thar chhuak tur hian sap tawng takin potential kan nei tha tawk hlebawk si. Ram tha tak kan nei a, kum tin ruahtui tam tawk tak kan dawng a, kan leilung nise eng thlai pawhin an ngeih em em mai bawk si. Heti chunga kan intodelh thei ngang si lo hi khawi laiah emaw hian thil fel lo lianpui chu a awm ngei ang tih a rin theih. Mipui hian kan zir ngang lo em ni zawk? Intodelh hi kan zo ngang lo emni? Nge, kan ram hruaitute min hruai dan hi a fuh lo zawk? Kan ram hruaitute hian a ngaihna an hre lo ti dawn ila, inthlan dawnah meuh chuan kan ram that zia te, intodelh thei kan nihzia leh intodelh tura an hmalak dan tur te hi ngaihnawm takin, pulpit-a sawi chhawn tham khawpa thain an sawi thei bawk si.

Kan hruaitute hian intodelh hi ngaih pawimawh berah neih se, he lam kawngah hianna takin ke penin, hma la nghal char char se, mutmawh hnarmawha an neih phawt chuan kum 5 chhung emaw, a lo berah kum 10 chhung tal emaw chuan kan mamawh zualpui thar chhuah kawngah chuan kan intodelh ka va ring em. Chuti ni loa a sawi ringawta an ramtang a nih a, inthlan dawnah chauh intodelh pawimawhzia leh intodelh tura an tan lak nasat dan tur an tlangaupui leh hluai ringawt chuan engtikah mah kan intodelh lo ang a, chawmhlawm state kan nikumkhua mai ang. Chawmhlawm hnam kan nih chhung chu mi zah kan phur tak tak ngai bawk lo ang.