Dr Hrekima Titi

Tawp suh, tum zel rawh

Dr. C. Lalhrekima - Jul 19, 2014

Tawp suh, tum zel rawh

Nu pakhat hian a fapa chu a piano zirlaia hma a sawn lehzual theih nan Paderewski-a concert-ah a hruai a. An thutna tura an thut fel hnu chuan mipui zingah chuan a thiannu a hmu a, chibai tumin a zuk pan a. A nu a kal bo lai remchanga lain naupang hawkdak chuan hall chu a fang kual ta a. “Luh phal loh” tih an tarna pindan thleng chuan a va lut kual ta pek a. Concert an tan dawn a, eng an han tihthim tak ruihah chuan a nu chu an thutnaah chuan a lo let a, a fapa chu a lo awm ta hauh lo mai a. Mangang taka a hawi vel ruai lai chuan puanzar chu a rawn inhawng chawpchilh zui ta mai si a. Eng chuan dawhsan lai taka piano chu a zuk chhun ta kulh mai a. Chutah chuan a fapa chu a lo thu a, ‘Twinkle, Twinkle, little star’ tih chu a thiam ang angin a’n rawn tum leh ta nghal a! Chutih lai tak chuan piano lalpa, Paderewski chu dawhsanah chuan a rawn lut ve ta a, naupangin piano a tum lai chu a va pan a. A hau mai ang em tia an thlir thup lai chuan naupang beng bulah chuan, ‘Tawp suh, tum zel rawh,’ tiin a zuk hrilhru sap a. Naupang hnungah chuan dingin a zu kun hniam a, a kut vei lam chuan a bass part chu a zu tum pui a. A ban ding lam chuan naupang dar lehlam atanga kuah kualin part mawi danglam takin a zuk chawhpawlh belh leh ta bawk a. Naupang tein a thiam chhun rimawi nalh lem lo tak a tum mek chu ‘Piano lalpa’ puihnain rimawi danglam nalh takah a lo chang zui ta a. Mipui chu an ka ho ringawt mai a ni. _______________________ Kan nunah hian thiam loh, hneh loh, ngam loh kan ngah thin. Theihtawp pawhin han tang er ve teh thin mah ila, kan tih theih chin hi chu a hmuhnawm lo fo a, a nalh lem lo a, a ngaihnawm hran lo a, sawi tham pawh a ni lo. Kan theihtawp kan han chhuah ve pawh hian kan nun hian rimawi nalh tak hi a chhuah zo thin lo a, kan thlen chin hi a ropui tak tak thei thin lo. Mahse keini aia ropui, keini aia thiam, ‘Nun Lalpa’ nena kan tan dun chuan kan nun hian rimawi a chhuah nalh thei ta thin a ni. Kan nunah hian tih tur hautak tak tak, huphurhawm fe fe hmachhawn chang kan nei a. Kan thiam lutuk loh lam kan tih a tul tlat tumte a awm. Harsatna kan han tawh rap rap chang te, rilru haha han hui pawp pawp zan te, a ngaihna hre loa han kun ngaih ngaih nite kan nei fo. Puitu kan mamawh a, min pui maitu an awm lem loa kan hriat changte a awm thin. Mi thenkhat phei chuan Pathian meuh pawhin a hawisan ta niin an inhria a, beidawngin an thu tlawk tlawk fo. A chang chuan puitu hi kan beisei hma lutuk fo thin. ‘Nun Lalpa’ hian keimahni kaltlanga rimawi tum a duh. Harsatna kan tawhte kan tel lova min chinfelsak hmiah hmiah a tum kher lo mai thei. Rimawi hi aman min tumsak vek dawn lo. I theihtawpin tum ve la, a thiltihtheihna banin a rawn kuangkuah che ang a, i thiam loh lai part kha a rawn hnawhkhat ang a, i tel vena rimawi ngaihnawm a lo chhuak ang. Puitu hian thil zawng zawng hi min tihsak vek sela chuan kan hlim lo vang. Mahni insitna kan nei thuai ang. Tel ve, ti thei ve, tha thawh ve, thiam ve anga ka inhriatna hian min tihlim thin. Hlutna nei ve tein kan inhre zawk thin. Tih tur hautak tak i hmachhawn leh hunah chuan uluk takin i thinlung kha ngaithla teh aw. Rilru na leh manganga i rum ni khan fim takin han ngaihtuah la. Beidawnga chawlhsan mai i duh rum rum lai khan hei hi ngaihtuah ang che. Lalpa’n, “Tawp suh, tum zel rawh,” tiin a rawn hrilh ru che asin! A pui dawn che alawm. Tawp suh, tum zel rawh.  
Share now