Ka thianpa pakhat hian upa pahnih hming lam chhuakin, “An piangthar lo! Mihring thata tha ve tawp an ni mai!” a ti chiam a. Nurse pakhat hian an awmna group pakhatah ka pianthar leh thar loh an lo khel chiam thu min hrilh bawk a. Steve Goodier-a thuziak pakhat ka hre chhuak zawk a.

Mike-a leh Pat-a te chu Catholic tlangval an ni a. Tum khat chu kawngpui kama zu dawrah zu an in a. An awmna ep kawngpui an lehlama nawhchizawrhna in chu thlirin, a lut leh chhuakte chu titi nan an hmang dun a.

Nakinah chuan Methodist pastor hi a lut ve ta roh a. “Methodist ho saw en teh! An pastor ho ho hian an lo inang tlang vek a nih hi” an ti a. An nui dun kuk kuk a.

Lutheran Pastor chu a lo kal ve leh a, a lut ve ta zuk mai a. “Lutherans ho hi chu an va han nikhualo tak, an vai hian sex chiah an ngaihtuah pek a nih awm hi!” an ti a, an ner dun nasa mai a.

Nakin deuha chuan an khuaa Juda puithiam chu a lo kal ve leh ta pek a. “Judaho hian tisa châkna hi an do zo ngang lo a nih hi!” an ti a, an chek dun tlak tlak a!.

A tawpah chuan anmahni lawina parish-a an puithiam, Father Riley-a ngei mai chu a rawn lang ve a, nawhchizuar kawngkhar chu a kik a, a lut ve ta tlat mai a. An thian dun chuan sawi tur hre loin an ka hau mai a. Nakinah chuan Mike-a chuan Pat-a lam chu muangchangin a hawi a, “Khai aw! Nawhchizuar pakhat chu a dam lo a nih ngei dawn saw!” a ti ta a.

An thian dun tehna atang chuan nawhchizuar kawngkaa lut mi dang zawng zawng chu nawhchizuar kawm tura lut, mi tenawm vek an ni a, anmahni puithiam erawh chu tu emaw dam loh avanga an koh, mi thianghlima la ni ta bik zel a nih chu!

Mi tin hian ngaihdan sa hi kan nei roh a. Kan ngaihdan vawn ngheh sa atang hian tute emaw hi kan teh zut zut a. An lo kalna leh thil tih kan hriat chin inang rengah pawh kan thu vuakthlak duh dan a danglam mai thin. Mi thenkhat hi chu kan dem zung zung a, a then erawh an thiam thu kan sawisak mai zawk thin. Kan seilenna chhungkua, kan sakhaw vawn, kan kohhran awm mekna, kan political party tan zawng leh kan thil hriat chin zel atanga kan tehfung vawn sa hmang hian ‘kan mi leh sa’ leh ‘mi dang’ chu kan han bûk ta thin a nia! A tehtu rilru hi a neutral mawh viau ta ve ang!

Kan party mi leh sa ni lo CM leh Minister-te chu kan teh tling mawh viau a, kan party mi leh sa an lal tum chuan demna tur kan hre mang lo thung. Tute emaw chu an pianthar tawh hnuah pawh an tunhma nun hmanga buklung kan la khai luihsak tlat avanga teh tlin hleihtheih lohte pawh kan nei ta ve ang!

Mi tin hian buklung khai sa hi kan nei a, chumi hmang chuan engkim hi kan lo teh ve a. Thlirna dang leh tehfung dang hmang duh hauh loin roreltuah kan tang hmiah hmiah hlawm a. Roreltu tamna hmun hi tu tan mah a hlimawm thei thin lo.

Mi dang nunah hian a tha ber hmuh tum theuh ila, keimahnia a tha ber hi nun chhuahpui tum ta bawk ila, kan hlim tlang thei ta ber awm asin!