Mizoram Chief Minister hlui, Pu Lal Thanhawla kha, Congress leader a niha an party hotu ber a nih khân kum 34 mi chauh a la ni an ti. Vawiina kan MLA neih zínga a kum lama naupang ber Pu Lalrindika Ralte pawh hi kum 43 mi a nih laiin Hachhek biltu MLA a ni thei tlat. Keini thalai rual—ramin min ko a ni tih hre lo léka mu thlurh thlurhte hi kan pute hian min kai tho mawlh teh se!

Kum 2012, January 26-a Apollo Hospital, Chennai-a boral ta, M. O. Hasan Farook Maricar te kha … term thum Union Territory Pondicherry-ah a CM thei a;  ‘the youngest chief minister of any Union Territory of India’ tih a ni. Kum 30 mi chauh a nih laiin a CM dêr tawh! April 9, 1967 atanga March 6, 1968 chhúng a CM term hi chelhin, March 17, 1969 atanga January 3, 1974-ah leh 1985 atanga kum 1990 chhúng teh meuh a CM thei leh tlat bawk a nia. 

Lok Sabha MP, Keonjhar, Odisha atanga thlan tlin Chandrani Murmu khu a nuapang fál viauin ka hria—May 23, 2019-a a pisa a zawm khan kum 26 mi chauh zu nia! Tûnah hian Indian Member of Parliament-a a naupang ber a ni mék.

Indian Constitution-a a inziah dàn chuan MLA/MP ni tùr hian kum 25 tlin a ngai a (Article 173 of Indian Constitution). Indian musical artist, politician leh lemchan thiam ni bawk, Samajwadi party atanga Sultanpur, Uttar Pradesh-a MLA-a vawrh chhuah a nih khan Arun Verma kha kum 25 chauh a la a ni. He pa hi alãwm Indian student parliament-ten ‘Adarsh Yuva Vidhayak Puraskar (Awards for Best Young Legislator)’ chawimawina an hlan kha! 

Kan thenawm lawka awm Meghgalya Chief Minister, Congrad Shangma te khu January 27, 1978-a piang a ni a; a pa, Lok Sabha Speaker hlui PA Sangma hnung zuiin a khuti thei a nia. Zai a’n tui êm êm mai lehnghal a. Led Zeppelin-ho hla, ‘Stairway to Heaven’ te kha a lead chhuak thei vek lehnghal a. Iron Maiden fans ruhkawl ngat a ni a; an hla ‘Wated Years’ tingtanga a zùt tê-na pawh YouTube lamah a darh chiam kha!

Ram siam tha tùr hian sawi leh ziah hi a tâwk lo; a khêlmual chhúnga kan luh a ngaihna chen a awm. Kan ram hian putar pui pui hi a mawmawh ber a ni lo; thalai tha za rual hi min ko a nia…

Finland chuan khawvêla prime minister naupang ber, chu pawh hmeichhia lehnghal an nei a. An PM, Social Democrat hotu, Sanna Marin-i khu kum 34 mi ni chungin kum 2019 khan an ram Prime Minister a ni dêr tawh! Kum 30 mi a nih lai khan Marini hi Member of Parliament a ni daih tawh bawk. Kan kum 30 nih lai kha ngaihtuah teh ang u—kan va inthlau vai vai tak!

Chutia hmeichhe lam kan hawi dâwn a nih chuan New Zealand Prime Minister 40-na Jacinda Ardern te pawh hi sawi kai a ngai ve ang chu! October 19, 2017-a PM atâna thlan a nih khan kum 37 mi chauh a la ni nia!

An kum 30-na chhoh lai—an vànglaia khawvêl hriat khawp hruaitute pawh hi en ila: Ukraine chuan Oleksiy Honcharuk, kum 35 mi an nei a; North Korea chuan heti khawpa ‘lal’ tum êm êm Kim Jong Un an nei a; kum 35 mi a nihin ram a hruai thei tawh a nia aw … 

High school a graduate hlim hlawlin Tony Labranche chu Amherst’s Hillsborough County District 22 atangin ram roréltuah a thu thei a, kum 18 mi chauh a la ni! US history-ah ani aia nau hi state legislature an la awm ngai lo! Amah hi a mipatpui kawp chíng a la ni zui! “LGBTQ chhúngkua atanga hetiang dinhmun ka chang thei hi ropui ka va ti êm! Amherst bial atanga mahni nihna inpuanga gay ka tling thei hi ka lãwm a ni,”a la ti zui!

Queen of the United Kingdom & Other Commonwealth realms, Elizabeth II-te khu chîk ila, hetia lal ni rei thei ber dawttu ni tùr hian kum 26 mi a nihin a pisa a lo luahlum tawh asin! Tûnah kum 96 mi ni chungin a la luahlum ta fan a. 

Chile chuan an ram hruai tùrin duh takin, kum 36 mi, Gabriel Boric chu kumin March thla khan an thlang tling leh tlat! Ani hian an ram lo awp hrep tawh; an ram president tura an ruat chuawt, José Antonio Kast chu presidential elections-ah khing thla-in kumin March 11 khan a pisa a luah lum ve tan. February 11, 1986-a piang chauh kha a ni a; mahse, a ram mipuiten rintâkah an ngai tlat!

July 24, 1981-a piang ve chauh, Nayib Armando Bukele Ortez chu El Salvador chuan an president 43-na atân an thlan tlin leh kha—June 1, 2019 atangin pisa a kai tan a. A hma, kum 2015 atanga 2018 chhúng an ram khawpui San Salvador-ah mayor a lo ni tawh thin a. Kum 2018 khan ama political party din, Nuevas Ideas (NI) dinin kum 2019 inthlanah president a chuh a; vote za-ah 53 hmu-in a tling a. Bukele a’n president chinah meuh chuan El Salvador rama tualthah (murder rate) chu a tlahniam sawt sawt mai a; March 2022 atang khan Bukele-a sawrkar chuan suamhmang mi 40,500 manin an rama tualthah case an tih tìl tiak tâk khu! 

Sawi dâwn chuan sawi tùr an tam ang. I duhtâwk teh phawt ang. Keini ve hi le? Kan ram min hruaitu atân hian thalai kan mamawh kan ti ve lo em ni? Nge, putar pui pui hi min hruai tùrin kan duh tlat zâwk? Dâk ila, en ila … khawvêl hian hruaitu naupang, tha za zâwk, chak zâwk a thlang fo a; an ring tâwk ngam tlat! Kan ramah chuan ram hruai hna hi putar kutah kan dah tlat a. Thalaite hian kan koa tlà-ah kan ruat duh tlat lo lai tak hi, kan la tuar maithei a nia!

Mu reng lo hian thalaite hi i harh ang u. Social media-ina min sawp chauh hma hian i tho teh ang u khai. Kan ram hian, ‘Mu reng suh la, tho ta che!’ tiin thalaite hi min au a nia…