Tunhma atangin Mizo khawtlang nunah kum lama upa zawkte zah an ni thin a. Khawtlang inrelbawlna leh thalai inkaihhruainaah pawh upa chan changte thu leh hla ngaih pawimawh a ni thin a, thalai rualte pawhin Val Upate thu an ngaichang thin. Heng zawng zawng hi Zonun mawi a ni a, thangthar zelte pawhin kan chhawm nun tur a ni ang. Hun a lokal zel a, eizawnna peng hrang hrang a lo chhuak zel a, kalphung a inthlak danglam zel a. Thangthar lehkhathiam officer fel tak tak an lo chhuak a. Ni tin eizawnna lamah kum upa zawkte aiin thalai naupang zawk lal zawk an lo awm ta fur a, khawtlang hruaitu leh kohhran rawngbawltuah pawh thalai fel tak tak an lo chhuak ta zel a. Chutiang karah chuan aia upa zahna te pawh a tlahniam ta viau a ni. Tunhmaa lal lal lai khan chuan lal leh upa te kha khawtlang roreltu an ni mai a. India hnuaia kan luh tak hnuah khawtlang leh ram hruaitu inthlan a lo ni ta a, kan thlan chhuah roreltute han ngaihtuah let hian tunhma district council hun lai atanga state kan nih tirh lam thleng kha chuan politics khelmualah kum upat leh naupanin kawngro a su thui vak lo niin a lang. Mizo Union hruaitute kha politics an luh chhilh hlim khan kum naupang tak tak vek an ni a. Mizo Union leh Congress party in-merger laia an hruaitute pawh kha la thalai tak an ni hlawm. Mizoram chief minister pahnihna Brig. Thenphunga Sailo kha chief minister a nih tirh khan kum 56 chauh a ni a, Pu Lalthanhawla hi kum 1984 a chief minister a nih khan thalai tha za rual kum 42 chauh a ni a, Mizoram state chief minister hmasa ber Pu Laldenga kha chief minister a nih tirh (1986) khan kum 59 a ni bawk. Minister leh MLA te pawh kha thalai tak tak an ni hlawm bawk. Heti zawng hian sawi ta ila, Brig Thanphunga kha chief minister a nih khan tuna minister zinga valai pawl tak Pu Zodintluanga ai hian a naupang zawk. Pu Hawla hi chief minister a nih tirh khan tuna parliamentary secretary zuanzang tak Pu Joseph Lalhimpuia ai hian a naupang zawk. India ram pum huap pawh hian politician lawkho hi an upa tlang tial tial a, a chhan langsar tak chu mi hluiho hian chawlhsan an tum lo a, thangthar politician vengva zawk, a ngaihna hre zawkte tan kawng an hawnsak duh loh vang a ni. Kum 2012 kha India Parliament-in kum 60 a tlin kum a ni a, tunhma lam nena khaikhin chuan tunlai MP te hi an upa zawk fe a. Parliament din tirh khan MP zinga za zela 20 chauh kum 56 aia upa an awm laiin 2009 inthlanpuiah khan MP atana thlan tlin zinga za zela 43 chu kum 56 chung lam an ni. Lok Sabha hmasa ber (1952)-ah khan MP zingah kum 70 chung lam an awm lo a, nikum (2014) inthlan kha Lok Sabha a MP putar thlan tlin an tam ber tum a ni a, kum 70 chung lam 41 an awm. Chumai a ni lo a, 1952-a MP (LS) zinga za zela 26 (26%) chu kum 40 hnuai lam an ni a, tunah hian za zel a 13 (13%) chauh an ni thung. Mizoram politician langsarte kum zat chawhrual hi hriat ve a chakawm khawp mai, KTP-a inhmang rual chu an tam lo viauin a rinawm. Vanglainiin a tarlan danin kum 2013 a MLA inthlana party hrang hrang atanga candidate-te kum zat chawhrual chu kum 52.67 a ni a. Tuna MLA zingah hian kum 40 hnuai lam pakhat chiah a awm a. Thalaite tana kawng hawn hi a har hle tih ngun taka chhut chuan a hriat theih awm e. Tunlai khawvel hi thalaite khawvel a nih tawh avangin India ram politician thenkhat chuan politics huang chhunga thalaite hip lut turin tan an la nasa thin viau a. Mizorama kan politician-te ngei pawh hian thalaite cho phur zawnga thusawi an ching ve ta viau mai a nih hi. Dik tak chuan ram hmasawnna kan sawi fo te, sorkar policy langsar tak takte pawh hi thalaite thlawh khum zawnga buatsaih a nih chuan a hlawhtling mawh khawp ang. Chuvangin, thalaite cho phur zawnga, an chakna leh thiamna hmang tangkaia beihpui thlak a hun tawh hle a ni. Engpawhnise, mi hluihoah hian beisei tur thil thar a vang khawp mai, thalaite hian politics-ah kalphung thar thlen theitu tur an nih avangin an tana kawng hawn hi a hun ta viauin a lang. Chutih laiin, thalai politics a zuang lutte pawh hian rintlak leh kawng thar sat theitu ni tura hma an lak erawh a ngai a. Thangthar politician thawm nei lian tak an awm loh chhan hi kum upa zawkte awp beh vang a nih rualin chutiang ang mi chu an awm loh vang pawh a ni thei tho. Poltics kalphung thar kan duh a, ram hruai dan thar kan hmu chak a, mi thar kan thlir mek lai hian chutiang mi chu an rawn inlar chhuah a, kawng an sial thiam erawh a ngai tel tho a ni. A tawpna atan chuan kan kohhran leh mi thahnemngaiten khawtlang nun siamtha tur leh politics siamtha tura hma a lakna kawng hrang hrangah a tul anga mipuiin ngaihtuahna kan sen ve hi kan tih tur pawimawh tak a ni a. Vawiina thalaite hi nakin a kan hnam inrelbawlnaa a fawng pawimawh ber ber chelhtu turte an ni ngei dawn a; chuvangin, kan ram leh hnam tan ngaihtuahna kan sen thin te leh ram leh hnam hmangaihtu tak tak an la rawn chhuak zel turah ngai ang.