He leilung hian tih theih loh nia lang ti thei tlattute hi a lo mikhual nual tawh a. Mi beidawngte cháng thlan, ‘Ka thei lo ang!’ tih tawngkam chu tumruhna hmanga thu lawilo-a chantír a lo ni fo tawh thìn. Ke tan tawhten Mt. Everest an làwn theihna leh bán nei loten tui an hleuh theihna khawvêlah hian, pianphunga rualbanten, mahni awm hmuna kut kuangkuaha thu thluang chunga, ‘Ka thei lo ang!’ ‘A harsa àwm êm mai!’ tia chhuanlam kan siam fo mai hi, zak ngawih ngawih tùr kan ni maw le! Mi tam tak chuan tum ahmaa kherh hi kan than lenpui a, chhiarkawp chawh dik sâ la chhãwngin lehkha kan zir chho a, chaw chhum hmin sâ-a chàwm len kan ni a; mahnia din tuma beihna nei ve lo tán chuan he thumal ‘Harsa’ tih hi kan nunah a mikhual rêng nâng!

Thawhrimna hmanga ‘Theih loh theihna thurûk’ hmu-a tawng thinte tán chuan an hringnun dictionary-ah ‘Ka thei lo ang!’ tih hi a awm ve ngai lo! Dik tak chuan, khawvêlah hian, ‘Mi Famkim nih tum’ tih loh hi chu a tih theih vekin ka hre ta!

Tûn tuma kan sawi tùr pawh hi, a pian tirha dam khaw chhuah ringawt pawh a tán chuan ‘harsa’ a ni asin! A chhúngte paw’n dam khaw chhuak zo lo mah se, mak an ti êm êmin ka ring lo—a rawn pian chhuahpui natna a khirh lutuk a… Khawvêl êng hmu tùrin a ruh 35 atanga 40 lai a rawn tliak chhuak nghâl pang a! Tih dam theih loh natna khirh tak mai, Osteogenesis Imperfecta (Brittle Bone Disorder an ti bawk) a nei a; vawiin thlengin a ruh 130 chuang a tliak leh tawh! Mahse a nun kai hruaitu atán thupuiah, ‘Impossible’ tih ‘I’m Possible’ tia a her rem chu a thlan miau avàngin kum 13 mi lek a nih laiin khawvêla mite nun kai hruaitute thu sawina dawhsàn sáng, TEDx-ah hial mite fuihna thu a sawi dèr tawh a; zai thiamte tána dawhsàn sáng Madison Square Garden-ah hial a ‘rap’ zat zat tawh!

He naupang Sparsh Shah (a.k.a Purhythm) hi India chhùl chhuak, US-a awm a ni. Mite ruh angin a ruh a chang ve lo a, a nò êm avàngin kal nán pawh a ke ruh chu rintlâk a ni lo a, chibai hlek paw’n a ruhin a tuar zêl! Vawiin thlengin a rih záwng pawh bûk hleih theih a la ni lo!

Zài a ngaina a, a bîkin hip-hop rimawi a tuipui hle. Eminem hla, “Not Afraid” chuan a hneh hle a, a sak chhãwn paw’n internet lamah thlìr a hlawh hle. Hindustani classical music pawh tuipuiin kum ruk mi a nihin a zir tan a; kum sarih leh a chanve chhúng a zir. Sap rimawi pawh kum thum chuang a zir tel bawk. Chûng rimawi inang lo leh inpersan tak tak chu hmeh rema kal kawptír tumin a bei a, thangchhuahpui a tum tlat. Kum 12 mi a nih meuh chuan mahni ke-a din pawh ding thei lo chungin, khawvêl ram hrang hrang hmun 45-ah zaiin hun a hmang dèr tawh a, hla 10 chuang a phuah tawh a, radio station leh TV show eng emaw zâtah a inlan tawh bawk.

Ropui ka tih êm êm mai pakhat chu, “Pi” (22 divided by 7 hi) chhût chhuah hleih theih loh khawpa decimal (point) ngah a ni a. 3.14... hnuah hian digit tluklehdingâwn chuang fé point a la awm tún a. Ani Sparsh Shah chuan point hnua nambar awm digit zathum sawmli leh pasarih thleng zu sawi par par thei a!

Chu mai chu a la ni lo, Hiren leh Jigisha Shah, kum 2005 chho vêla US-a pém tate fapa Sparsh Shah hian English dictionary-a thumal sei ber ber 12 lai chu second 18 chhúng lekin a chham par par thei nia maw le! Kum ruk mi lek a nih laiin hawrawp 45 awmna thumal “Pneumonoultramicroscopicsilicovolcanoconiosis” tih hi a sipel chhuak thei dèr tawh! Tin, hnam hrang hrang sâptawng lam dàn bîk (English accent) chi li a thiam bawk. (Keini’n Indian accent pawh kan thiam loh laiin!) Poems leh thawnthu tawi (short stories) eng emaw zât a ziak tawh bawk a… A tán chuan “Impossible” tih thumal hi “Im Possible” tih a ni chiang bîk mang e!

‘Ka tawng theih tirh tê atangin zai ka tuipui nghâl,’ titu Sparh hi kum thum leh a chanve mi a nih laiin tum khat chu, car-ah a nu leh paten an phur a. A pa chuan radio a’n ti nung a; chuta zai chu Sparsh chuan a lo zàwm ve zuah zuah mai a; a nu leh pate chuan mak an va’n ti tehrêng! Hla pakhat a sakpui thei a ni mai lo a, hla dang dang an zaitír pawh chuan a thiam zêl mai si a. A nu leh pate chuan engtia hria nge a ni tih an zawh chuan an pre-school bus driver-in a nu leh pate radio channel ang chu a ngaihthlâk thin thu-in a chháng mai!

Kum thum mi a nih atangin keyboard tum leh lehkha chhiar an zirtír tan a. Mahse, a ruh a nò êm avàngin keyboard takngial pawh a hmet hleithei lo a, a chawlhsan a ngai hial! 

‘Tum ram leh suangtuahna (dreams) neih hi a tâwk ngawt lo; a taka chantír tùr chuan thawhrim a ngai. Kan fapa pawh hi a thawhrim êm avànga a tum ram a la thleng thei ang,’ tiin Sparh-a nu, Jigisha Shah chuan a sawi. Sparsh hian a tum ber chu Grammy awards dawn a ni a; a la dawng thei leh pek ang! ‘A hnêna kan sawi chhun chu: “Hringnunah hian eng ang dinhmunah pawh ding la, i theih chinah duhtâwk ngai suh!” tih hi a ni. Sparsh hi khawvêlah hian thil tha danglam bîk ti tùra rawn kalah kan ngai,’ tiin Hiren Shah, Sparsh-a pa chuan a sawi bawk.

Kum 2015 April thla khan Sparsh hi talent competition ngaihhlut hlawh tak, “Young Voice of NYC”-ah a inlan ve a. St. Jude Children’s Research Hospital chuan an damdawi in tána “Youth Ambassador” nihna an lo hlàn hlauh mai a; vawiin thlengin naupang cancer do nán, tlángàu hnà a thawhsak ta reng a ni. Hei bâkah hian khawvêl hmun hrang hranga rualbanlo tanpuitu páwl tán a inhmang chho mék a; US dollar maktaduai dáwn a thawh chhuahsak tawh bawk a ni.

TEDx talks leh Google Talks-a a sawi lan pakhat chu: ‘Pathian hian kal tùrin ka tán kawng a khàr a; mahse zai theihna leh thu sawi theihna aw mawi tak min pe thung!’ tih a ni. 

A ruh a tliah chánga ná a tawrh dàn an zawh tuma a chhànna hian hmáwr i’n báwk teh ang: ‘Ná hi chu tih vak ngaihna a awm lo a, tah bâk tih theih kan nei lo. Mahse, kei chuan ka ruh tliakte hi ka lo nuih sáng thin. X-ray thlalâk a rawn chhuah apiangin ka ruhte hi ka lo nuih thin; a chhan chu min nuih lêt ve se ka duh a…’