French Open, 2021 chu zaninhian a hmawr an bawk dawn ta a, zanin dar 6 hian Novak Djokovic leh StefanosTsitsipastechu final-ah an intum dawn a, kum 22 leka upa Stefanos Tsitsipas hian Grand slam tournament final a thlen vawi khatna a ni a, hetihlai hian a tumpui tur, Novak Djokovic erawhin Grand slam title vawi 18 zeta la tawh thung a, an inthlau khawp mai. Clay Court Lalpa an tih mai, French open title vawi 13 zet la tawh, Rafael Nadal erawh semifinal-ah Novak Djokovic hneh lovin a tla hlauh mai a, grand slam title la tam ber record siam tuma a beihna chu a lo tawp ta rih a ni. 

Ningani zana Krejckova leh Sakkari te semifinal-a an inkhel kha women’s single tennis inkhelah chuan a hmuhnawm ber pawl a tling hial ang. An in lehthal zak zak a, a tawpah Krejckova kha a ding chang ta a ni. Darkar 3 leh minute 18 zet an inkhel a, hmeichhe inkhelah chuan a rei pawl tak a ni. Inkhel rei ber erawh a ni lo. Hmeichhe single-a inkhel rei ber chu kum 1984-a Richmond, Virginia-a Vicki Nelson leh Jean Hepner te inkhel kha a ni a, darkar ruk leh a chanve ngawt zu inkhel a!

Tun tum French Open Semi Final-a Krejckova-in harsa taka Sakkari a hneh tumaa thu sawi tawi te kha a tha reuh ngawt mai. Inkhelh zawha biangbiakna tawi te an neih tum khan, “Tun tumah hian ka naupan lai atanga ka suangtuah thin dan ang takin ka khel thei a, kei leh ka tumpui, Sakkari khan kan theihtawp takmeuh meuh kan chhuah a ni. He inkhelah hian a chak lo zawk pawh lo ni ta tehreng ila, ka inchhuang viau tho ang. A chhan pawh ka theihtawp tak meuh ka chhuah a ni,” a ti a, chak leh chak loh lam ai mahin theihtawp a chhuahna kha a chhuan lai ber chu a ni. 

Khawvel mihring tam zawk hi (keimah tiam hian) kan thiltih kawng hrang hranga kan hlawhchham fo chhan hi eng dang vang ni lovin, kan theihtawp kan chhuah thin loh vang hi a ni. Theihtawp chhuah tur chuan taimak a ngai a, tawrhchhel a ngai a, teirei peiha ngai a, dawhtheih angai em em bawk. Chu quality chu nang leh kei hian kan tlachham tlat a, kan theihtawp chu sawi loh, kan theihtawp chanve ve leh pawh hi kan chhuah tlat lo a, hlawhchham hi kan phu hliah hliah a ni. Mi hlawhtlingte kan kawk zut zut a, ‘Ani ang hi chuan zir peih ila, ani ang hi chuan bei nasa ila, ani ang hi chu ka ni ve tho ang’ kan ti a, anni anga theihtawp chhuah erawh kan tum der si lo. 

Lehkha ziak mi ni turte hian taimak a ngai viau mai. Zofate zinga ziak lama sulhnu ngah ber pakhat, Lalhmingliana Saiawi khan lehkhabu 19 a ziak a, chanchinbu leh magazine-ah article tam tak a ziak bawk. Khati zat lehkhabu ziak tur khan erawh a thawkrim khawp mai. Tuk tin zing vartianah a tho a, zing dar 8 thleng a reading room-ah a in khung a, article a ziak a, a chang chuan thui tak a ziah tawhte kha a thai chhe leh vek a, a bul atangin a ziak tha leh a, tuk puma article pakhat puitlin loh chang pawh a ngah asin. A kutchhuak ena lehkha ziak awlsam tak tura kan lo ngaih ang kha a ni bik lo. Mahse, ani chuan a bei talh talh a, ziaktu hlawhtling, mi hriathlawh tak a lo ni ta mai a ni. A beih ang hianbei ve ila, a thawhrim ang hian thawkrim ve ila, Zofate zingah hian amah tluk zeta novel phuah thiam leh thu ziak thiam hi an kat nuk mai thei asin. Mahse, keimah ang bawka inthlahdah, rilrua thu ziak tur a lo lan chang pawha ziak ta mai lo a last minute nghak kher thin hi kan tam em a, theihtawp hi kan chhuah lo nasa em a, hlawhchham hi kan phu hliah hliah mai.

Pathian pawh hian kan theihna a sang emaw, a hniam emaw lam hi a ngai pawimawh vak lo. Chu ai chuan kan theih tawk kan chhuah em tih hi a ngai pawimawh zawk niin a lang. Mihausaten thawhlawm bawmah ri ruih ruih khawpa tam an thlak a, chutihlaiin hmeithai rethei tak pakhat chuan dar tangka pahnih a rawn thlak ve rak rak a, a theih tawka tam a thawh miau avangin Lal Isua chuan thawhlawm thawh tam berah a puang tawp mai a ni. 

Kan thiltih kawng tinrengah hian kan hlawhtling em, kan suangtuahna hi a takah kan chantir em tih aiin kan theihtawp kan chhuah em tih hi a pawimawh lai ber chu a lo ni. Tennis star Krejckova ang hian chak lo mah ila, hlawhtling lo mah ila, ka theihtawp ka chhuah miau avangin ka inchhuang a ni tih theih hi a hlu a ni. Theihtawp chhuah thinte chu lungawi takin an muhil siai siai thin.