Hnathawhna avanga Mission Venga awm pa pakhat, a hna atanga pension mai tawh tur chuan veng dangah in sak sa a nei tho chung khan Mission Vengah in hmun a zawng ruai ruai a, a sa chuk chuk a. A hna atanga a chawlh hnu chuan an awm zui ta zel a. Veng danga a in chu a hralh ta ni maw? “Mission veng hi ka fate tan a tha ber,” a ti tlat. Vohbik kan tih ang chi fa pahnih a nei. Mahse tuman an enhrang lo a, an hmusit lo a, engkimah zalen takin an tel vek thei niin a sawi. Mission Vengah chuan a faten mi an ang niin a hre tlat. Chu chu a hlu a ti em em a ni. An fate lah chu khawtlang leh kohhranah an tangkai em em lehnghal. Mi chi hrang hrang, ze hrang hrang nei, hmel inang lo tak tak, thiam zawng chi hrang hrang nei, zei dan inang lo pui pui hi veng khatah kan han awm khawm ta a ni a. Awmho dan hi kan zir fe loh chuan a harsat hmel asin! Kan thenawm khawveng turte lah chu kan duh duh kan thlankhawm theih a ni si lo ale! Pastor in bulah zu ngawl vei an awm thei a, zirtirtu inhnuaiah pawl thum pawh pass lo a awm thei a, eiru thin kawmcharah mihlim lam thin a cheng thei si. Intihfuh loh laklawh chuan khawsak ho harsa tham khawpa mize inang lo kan ni nuaih mai. Harsa viau awma ngaih theih a nih laiin thenawm duhawm nei tan chuan engmah hi zuk harsa chuang lo a. Awm khawm nuam ti hnam kan nih vang ni maw, kan in lah a inhnaih hlawm khawp. Thenawm nau zan tah vei avanga mut theih loh ve hlauhawm khawpin kan inhnaih a. Nupa hlim thawm zawng zawng thlenga inhre pha tur khawpin kan mut pindan bangte chu a insi lo chauh tawh hlawm mai si. Mi thenkhatin, “Kan in a inhnaih tual tual a, kan rilru erawh a inhlat tual tual si,” tiin an sawi thin. Intihfuh loh laklawh chuan bang insi renga chengte pawh hi hlim taka khawsakho a harsa fu a ni mai thei. Mahse thenawm duhawm nei tan chuan zuk harsa chuang miah lo a! Thenawm duhawm nei chu an inbe tam em em pawh a ni lo, zing leh tlaiah bai an insuah sek pawh a ni bik lo. Zan tin an inlen pawhin an titiho chiam thin pawh a ni hek lo. Mahse an rilru a kawi lo a, an inhaw tlat lo a, an thatna an inhriatsak a, chhiat that an inhriatpui a, mi zingah an inrel lo a, tanpui ngai an awmin an che thuai mai thin. Mi chhungkaw inenkawl dan leh inrelbawl danah an inrawlh sek lo a, inchhungah leh pawn lamah an thenawmte chanchin a chhe zawngin an sawi ngai lo. A tul hunah an inpui mai thin. Thenawmte tan an tangkai tam thei lo a nih pawhin an hnawksak lo tlat. Pa pakhat chuan, “Chumi vengah chuan awm ila kan fate hi chu an mawl khawp ang, in bawl an ching a, a nawi sa an nawi belh a, a pangngai sa pawh hi kan hniam tial tial mai,” zuk ti a. Thenawm khawvengin min biak dan te, min biak loh dan te, min sawngbawl dan leh min en dante hian kan rilru puthmang a siam thui khawp. Tihfuh loh chuan a inbawl mawl zual zel theih dawn khawp mai. Thenawm duhawm erawh chuan kan fate mawl ral mai mai tur pawh hi min chhawm finpui thin a. Ruihhloa tlan ral ve mai mai turte hi min venhimpui a, nupa inthen tum uaih uiah thleng hian min suih nghet thei nia! Thenawm khawveng tha chuan kan fate an lo be lumlam a, an lo fak a, an lo fuih a, hmasawnna kawngah min chawikang awk awk mai maw le! Thenawm duhawm chuan inrel leh insawisel aiin infak leh infuih hi a tangkai zawk tih an hria a. Inbawl leh inhmuhsit aiin inngaihsak leh inzahtawnna hian mi a tifing thei tih an hre tlat. Thenawm duhawm neih hi a va nuam em!