Dr Hrekima Titi

Thenawm Ninawm

Dr. C. Lalhrekima - Oct 12, 2014

Thenawm Ninawm

Thlah pawlh tleirawl te hi a nuin a rawn hruai a. A hmelchhe lo reuh khawp mai. Mahse a kimki a, a zakzum a, mi zingah a awm tha peih lo. A ngui a, nun pawh nuam a ti vak lo. Tuten emaw, “Thlah pawlh i va ang ve” an lo tih fo avangin lenchhuah vel pawh nuam a ti lo. Thudik pawh hi sawi fo a rem lem loh hun a awm. Thlahpawlh nih chu a duhthlanna pawh a ni bik lo asin! Fa enkawl hi a har tehlul nen, kan bul velah hian a tiharsa belhtu an awm thin lehnghal a. Thenawm ninawm, fiamthua kan chhungkaw inkaihhruaina tibuaitute hi an awm thei! Mi unau rual, an nu leh paten an duat leh an hmangaih em em vek, hmeltha an tih em em vekte hi thliar hran luihsak kan ching a. “Ani hi a hmeltha zawk… Ani hi a hmelchhe bik… Ani hi a va dum thel thul ve, vai a va ang bik ve..in thlah a ang lo,” tih mai maite hi kan titi duh dante a ni fo a. Inkhaikhin hi a hlawkna a tam lo khawp mai! Unau inthikna te, nep bika inhriatna te, rilru hliam leh nun hlim lo a siam thei. Khaikhin tawka khan a khaikhintu a huat phah a, huatna chuan rilru kha a siam a, thlarau nun a khawihbuai pha tlat! Mi fate kan han fiam danahte hian tul lo a tam thin. “Nang chu an fa tak tak i ni hleinem, ba kho khata an lei che alawm,” tihte leh nuihzatthlak anga lang thil hrang hranga fiamte kan ching a. Naupang rilrua a thawh dan a inang lo a, pawi nasa tak a thlenna chhungkua an awm thin. Fa nei thei lo thenkhatin mi fa an la a. Pathian remruat remchang tak a ni a. Fa lak tak tak, an nu leh paten an la hrilh loh, hrilh pawh an tum tho, hun remchang leh a hun dik ngaihtuaha an buai ruk em em laia lo tikhawlhkham thinte an awm! Thenawm ninawm bengvarin, “An fa tak i ni hleinem..” an lo tih hmanhmawh avanga chhungkaw buai ka hmu fo. Thil hre thei ber nih chak, engemaw sawi chhuaktu nihte hi kan chak a ni awm asin! Kan chhungkua a nghawng pawi dawn lem loh avanga duh duh sawi mai maite hi a pawi thin. Kan fiamthu te, kan titi te, kan thilsawite hian enge a nghawng dawn tih ngaihtuah thui peih mang si loa tawng duh viau site hi a pawi ve thei. Tawng duh zawng zawng hi an kawm a nuam vek kher lo! Thenawm tha neih hi a nuam. Thenawm tha chuan kan taksa, rilru leh thlarau hi an tihahdam sawng sawng thei nia! Kan manganin min pui a, fiamthu hlimawmin min tiharh a, thinlung ngui leh chau tur min chawk tho thei a, naupang thanglian mekin an hlawkpui thei nia! Thenawmte tel loa khawsa hleithei lo hnam hian thenawm tha kan va mamawh em! Thenawm ninawm erawh chuan kan chhungkaw inkaihhruaina min tibuai pha a, kan rilru an hliam a, thlarau an tichak lo a, naupang rilru an tibuai a, fa enkawl an tikhawlhkham a, vanram kai loh phahna tur khawpin kan thin zuk tirim theia maw le!
Share now