Kar kalta Nilaini khan zan khat riakin Thentlang khuaah NSS camp kan nei a, an khaw lu lam, tuihna awmna hmun, Chalzawl an tihah chuan tuikhur kan siamsak a, an lawm veviauin kan ring. He NSS camp-ah hian NSS volunteer zirlai 17, zirtirtu 6 leh bus driver pakhat nen kan vaiin mi 24 kan thawk chhuak a, bus-ah kan khat mawi tawk vel a ni.

Thentlang khua hi Aizawl chhimchhak, kilometres 90 vela hla a ni a, thingtlang khaw nuam tak, in 150 bawrvel an ni. An khaw hmun a rem tha em em a, khaw chhung inkalpawlhna kawngte chu PCC (Plain Cement Concrete)-in an lo siam vek mai a, thalah khu tur a awm lo a, furah diak tur a awm nahek lo. An ranvulh an khuahkhirh tha a, khawlaia ran tla hmuh tur a awm lo. An khua a fai nuam hle a ni. Thentlang khua hi Tuikum constituency huam chhunga awm a ni a, Assembly House Deputy Speaker Er. Lalrinawma bial a ni mek bawk.

Thentlanga khuaa kan kal lai hian National Highway-54 kawngpui laih zauh hna thawh mek a ni a, thalvaekchar lai ngang a ni bawk nen, kawngpui chu duhthusamin a khu a ni. Bus kawngkhar leh tukverh kan khar phui vek a, chutichung pawhin bus chhungah chuan vaivut a la rawn lut chum chum tho mai. Kan tlansan kawngpui lam chu ka han thir a, vaivut hi an lo inpangawzial mup mup mai a, thawmhnaw a paw tha duh khawp mai. Thentlang khaw peng kan thlen hnuah erawh vaivut khuin min bawhbuai ta lo a, thaw a veng huai huai mai.

Combo sound lian tha tak mai kan keng a, mobile phone atang pawhin mahni hla duh zawng a zaitir mai theih a, kawngtluanin zai kan ngaithla a ni. A karlakah ka inrawlh ve a, rei vak lo chu ka phone atangin ka hla duh zawng ka zaitir (play) ve thung a. Zoherliani’n Sialsuk Laltanpuia hla a han sa a, “…Pialleiah inthen mah ila, min rawn zawng chhuak leh la Parte, van pialralah…’ a han ti vawng vawng te, Marina Vanhriatpuii Varte-inDamhaua hla, ‘…Lurhpui hmingthang Tan kham karah khian, Hnutiang mual liam ka han thlir a, Suihlung rual tawh hnu, min ngaihtir hmana nun hlui chul hnu kha’’ a han ti vawng vawng maite chuan ka suangtuahna chu hla takah a hruai a, kan zin mekna mual inpharh dan leh a hla thute chu inhmeh hlein ka hre bawk a, pi pu nun hlui ngaiin ka lung a leng veng veng mai. Ka han hawi vel a, zirlai rual zingah chuan tumah lungleng awm hmelpu ka hmu miah lo thung! Ka hnunga thu, Miss Achhingi ka han en a, ka ngaihbel emaw ni, a nuih a za deuh tlatin ka hria. Chuvang chuan ka playlist pawh chu ka play rei ngam ta lo.

Thentlang peng atanga Tuikum kuam ram zawng zawngah chuan a mual dapin mau a khat dul mai a. Heng kan tualto maute hi hman tangkai dan awm se a va tha dawn em. Kan vat a, kan hal leh ringawt thin a, a uiawm thin em mai. Siamtuin kan ram leilung milin kan ramah thing leh maua totir a, hengte hi kan humhalha, kan hmant angkai a tul a ni. Kan tualto thing leh maute hnualsuat a, ram dang mau kan tuipui zawk chuan khuareiah kan ram leilung hian a chhiat phah hial zawk ta ve ang. Teak thingte hi kan uar viau a, kan leilunga tualto tura khuanu duan a ni miah lo. Teak hmunah chuan nungcha leh savate pawh an awm duh miah lo bawk. Ralkhatah lang hring dup mah se, thlaler ram ro, chi leilung, tumah luah loh ang maiin a reh tlawk tlawk mai a ni.

Tlai ni nemah Thentlang khua kan thleng a, YMA hruaitute’n min lo dawngsawng a, Primary School-ah riahna tur tha tak mai min lo buatsaihsak bawk a, hah a dam sawng sawng mai. Kan innghat fel a, zirlaite pawhin tih tur tul apiang an ti nghal zung zung a, a thenin ei rawng an bawl sawk sawk a, thenkhat Tuikhur siamna lamah an liam thla bawk a.

Zanah YMA-te nen hun hlimawm tak kan hmang a, programme tan hmain kan zaiho phawt a. Ka inti thua, ‘Ram ngaih hla i sa ang u’ ka ti a. KTP, TKP, PYD etc. punkhawmna apiangah Pathian hla kan sa a, YMA leh zirlai punkhawmna lehzela Pathian thu awih ber ang hrima Pathian hla sak talh hi tul ka ti chiah lo. Chuvang chuan Rokunga hla, “Aw, Khawvel puan ang a chul tur hi” tih ka thlang a, zai ka hruai nghal a, ‘Kan Zotlang ram nuam hi chhawlpial run i iang e’ tih kan sa bawk a, kan zai ve hap hap mai.

Kan hotute’n thu sawina hun tawi te min pe ve a, tawi tea ‘Zirna pawimawhna’ sawi turin min ti a ni. Ka thu sawi tlangkawmnaah chuan, ‘Thentlang khua hi Hmuntha, Khawbel, Lungpho, Thinglian leh Sialhau khuate’n a hual vel che u a, Hmuntha khua chu Er. K Lalsawmvela vangin kan hria a, Khawbel khua chu ClementLiankunga, IAS vangte, Ronald SapaTlau, Ex-MP vangtein kan hre lar a, Lungpho khua hi Rev Vanlalzuata chawrchhuahna khua a nih vangin mi hriat a hlawh a, M. Lalmanzuala, IAS vang te, A. Sawihliravangtein Thinglian khua hi kan hre lar leh a, Mizoram khaw hlun tak pakhat, Thentlang khua hian zirna lama Zoram deng chhuak mi hmingtha pakhat tal in vawrh chhuak ve thei dawn lawm ni?’ tiin challenge ka siam a, an hruaitute khan engtin tak dawngsawng ang maw?

Programme zawhah school tualah meipui kan chhep a, ‘Thanglunghnem zai’ te, ‘Thlawitenali zai’ te kan play a, meipui din hualin kan lâm a, thiam leh thiam loin kan ‘chheih lâm’ vei thul. Van lam ka han thir a, a lang thiang kuk a, arsite chu lo hnai ta hle hian ka hria a, a nuam veng veng mai. Rui lo hai loa a tawk tea vanglai nun leh hringnun par chena han chheih hap hapte hi nuam ve deuh asin. Tichuan, a tuk chawhnu herah, kan tih turte kan tih zawh hnuin Thentlang khua chu kan chhuahsan ta vuah vuah a, engtikah tak kal leh ang i maw?