Zawhna: Ka pu, kum 21 ka ni a, pasal ka nei tawh a, kan inneih hma in sex kan hmang a, thla 3 vel ka period lo a, kan in neih hnu ah thla 5 vel a liam leh tawh a, ka period hi a mumal lo em em a, nau ka pai bawk si lo a. Engvang nge ni ang? Ka mang a ang takzet. Min puih theih chuan ka lawm ngawt ang.

Chhanna: Thi neih chungchang hi kan ziak fo tawh a. Hmeichhe tan chuan a pawimawh em em mai a, thi neih a taksa a hormones chi hrang hrang in play kual vel hian organs pawimawh tak tak a enkawl a, rilru lam kalphung “mood” thlengin a effect thei a ni. Hormones dang pawimawh tak tak a inrawlh bawk a, a bikin thyroid hormones hi a pawimawh hle. Thi neih that leh that loh ah hian vun dinhmun te hi a innghat viau mai bawk.

Thi neih buai kan tih hian a neih hunbi a nei lo, hunbi inthlak sek te, nei tlem lutuk emaw tam lutuk te a ni thei a, tin, i rawn insawiselna ang a hmaa nei pangngai si, nei thei ta lo ang te hi a awm fo bawk. Taksa emaw rilru hah stress hian thi neih a ti buai hma khawp mai bawk a, chuvang tak chuan mihring nunphung a kan ngaih pawimawh – chaw ei hunbi te, zan mut hun leh zing thawh hunbi mumal tak neih te hi a pawimawh em em ani. Ei leh in chungchang pawh hi a pawimawh khawp mai. Ei tlem lutuk emaw ei tam lutuk hi a tha lova, mawm lam ei nasat lutuk te hian thi neih a ti buai duh hle. Tin, thau lutuk (obesity) hian thi neih ah nghawng a nei duh hle. Chutiang bawkin thau hlauh lutuk vanga ei in insum vak te hian thi neih a ti buai leh fo bawk.

Pasal i neih hmain sex i hman thu i sawi a, chumi hnuah chuan thi i neih loh thu i sawi a, hemi tum hian nau i pai leh pai loh i sawi hranpa lova. I hriat lohin nau i lo pai ani thei ang em? Naupai thenkhat chu hriat mang lem lohin an naupai a tla thei a, chutiang chu Missed Abortion kan ti a, an thi neih pangngai aia tam an nei tih loh chu insawiselna an nei lo fo thin. Hemi hnu hian pasal i nei a, i thi neih a mumal loh thu i sawi leh a, chuti anih chuan thi i nei lo tawp ni lovin mumal lo takin i nei zeuh zeuh tihna anih hmel. Nau i pai loh thu i sawi hian pregnancy test i ti ni ah lo ngai ta ila, ultrasound hmanga enchian a pawimawh. I chhul leh chi bawm te an enchiang anga, fel lo a awm nge awm lo te hriat hmasak a tul. |ha berah chuan hmeichhe doctor lo inentir thei la a tha.

Hmeichhia in nau an pai hian thi an nei lo tlangpui a, a thenah chuan hriat mang lohin thi put zeuh zeuh a awm thei a, chutiang ah chuan thi la nei anga inngai a awm theih. Pasal neih a, active sex hman bawk si chuan Pregnancy test hmanga in check zauh zauh hi a tha hle. A thenah chuan hnute a tang a, luak chhuak te a awm thin bawk. Kum naupang lam hian nau an pai leh pai loh an hre lo fo mai. Nu te mawhphurhna a ni a, nau pai a hmeichhe taksa awm dan te inhrilhhriat chian a pawimawh hle. Tin, a dang leh ah chuan nau bawm anga insiam, mahse siam kim lo (blighted ovum tiin an sawi) a awm thei a, chu chu a thenah chuan pregnancy test a positive ve thei a, mahse an pai rei lo tlangpui.

Nau pai chungchangah hian hmeichhia in invenna tel lova active sex a hman a, kum khat hnuah pawh nau a la pai theih loh chuan Primary Infertility anga ngaih a ni chauh. Thla nga in inneih hnuah i la pai lo hi chu ngaihthat lohna tur a awm hranpa lovang. Kan sawi tak angin thi neih buai hi a chhan tam tak a awm a, a thenah chuan a chhan hriat theih miah loh te a ni bawk a. Thenkhat chu pasal an neih a, fa te an neih hian an thi neih buai hi a reh phah hlauh thin; an ni vek chuang lo. Pasal neih hmaa thi nei pangngai tak, fa neih hnua thi neih buai hi an awm ve leh fo bawk. Engpawhnise, doctor hnena inentir hi hreh loh a pawimawh khawp mai.

A tawp nana ka han sawi belh duh chu invenna tel lova sex hman atang hian natna inkai theih a tam khawp mai a, HIV phei chu chutianga kai chu kan tam ta hle. Nupui pasal neih hmaa sex kan hmang dawn anih si chuan invenna hman tluk a awm lo. HIV phei chu kan tam tawh em avangin kan thisen kan test anih loh phei chuan inrin mai hi a chi tawh lo. Mipa hian condom an lo pai remchang lo fo mai a, laklawh dinhmun a lo thlen tawh phei chuan nuai liam mai an awlsam. Chuvangin hmeichhia te pawhin condom pai ve mai hi a him ani tih kan hriat a tha hle. Kan hmangaih tak te, kan mihring pui te dinhmun derthawng a dah lo turin fimkhur tlang ila, mahni HIV dinhmun hriat hi a pawimawh a, in test nachang i hria ang u.