Covid19 avanga Mizoram chhunga thi kan neih hmasak ber, Pu Lalsangkhuma thih ni, ni 28.10.20 zanah khan Facebook lamah, “Vawiinah ralkhel dar ring ber vuak a ni ta! Mizoram chhunga Covid19 avanga thi kan neih hmasak ber ni hi fimkhurna kawnga kan harh tharna ni a nih hlauh chuan, he thihna lungchhiatthlak tak hi nung damte tan malsawmnaah a chang thei thung ang,” tiin ka ziak ve a.

Pu Sangkhuma chhungte nen kan inbe fuh zui ve hlauh a. “Pu Lalsangkhuma (kum 66) kha pa kawm nuam em em, mi pawisawi hlau tak, midangte rilru natna tura thu sawi duh ngai lo, chhungte ngaihtuah em em thin a ni a. Mi angin a damlaiin thil tha chhinchhiahthlak tih nei lem lo mah se, a thihna hian Mizo mipui nawlpui hnenah ‘Râlkhel Dâr’ khawng ri se, Covid19 laka kan himna turin ‘fimkhur’ a ngai a ni tih hi thawn darh se, kan ti a ni. A thihna hi Mizo mipui tan ‘thih malsawmna’ lo ni se, nunna tam tak chhantu lo ni mawlh rawh se, tih hi a chhungten kan duh ber a ni,” tiin anmahni lainattu zawng zawngte chunga lawmthu sawi pahin min hrilh.

Hmanah, “Covid19 hi natna khawharthlak ber a ni ang, a tawpna tur phei chu a khawharthlak leh zual dawn,” tiin ka ziak tawh a. Pu Sangkhuma thlanmuala an vuina kha ka en ve a, ka sawi sual loin ka hria.

Dawrpui khawtlang hruaitu rilru zau leh huaisenten in lamah emaw, hall-ah emaw, natna tihbaiawma thi mah nise, thinhrikna tel miah lova zahawm taka vuina hun hmanpui an inhuam em em laiin, a chhungte tumah vuinaah kal thei an awm chuan loh avangin damdawi in atangin thlanmualah an phur tlang a. Covid19 avanga thihna meuh chuan damdawi in leh thlanmual a kawk tlang ta ruih bik a nih kha. A karlakah chawlhna a awm ve ta lo! A nupui, he natna avang thova inkhunghrang mek chuan, remruattu fel takte zarah, invenna thuam famkim ha chungin thlanmualah, kuang inchhin phui tlat chu a tah khum thei hram zawk a! A hmutute an insum thei bik lo. He natna avanga thihna meuh hi chuan mittui a va heh bik em!

Mi chhe ber pawh kan thihin in lamah emaw, hall remchangah vuina hun zahawm takin kan hmang thin, chhung rual an ni emaw, hmeithai emaw pawh ni se! Mi thenkhat thi phei chu, an in sak lai a luah luh ve hman tak lovah pawh kan chawlhpui hram thin a ni ngai a! Mahse, Covid19 avanga thi zet zawng a dan a dang ta a nih hi!  Thihna hrim hrim hi a khawharthlak dawn hian ka hria a, Covid19 avanga thihna phei chu a va khawharthlak leh zual dawn em!

Damdawi ina thawkten ruang leh kuang chu hlauhawm lovin min siamsak thei a. Sawrkar kaihruaina pawhin, ruang chu in lamah hawn theih a ni a, a buaipuituten hmaituam a, kutkawr bun tur a ni a, mitthi atangin kai a hlauhawm lo e an ti. (SOP for LLTF, Annexure IV ah leh Health Dept Principal Director lehkha, 24.3.2020) Khawtlang pawhin a buaipui ngam zan mai (Dawrpui thuchhuah). Mahse, mitthi chhungte zawng zawng chu natna avanga khung bo vek an nih miau si chuan, kan tlan liampui vawk vawk lo thei si lo zawk a nih hi. Mitthi chu hlauhawm lo mah se, vuinaa kal khawm turte kha kan hlauhawm theih miau avangin a rang lam leh a rei lo zawnga invui tur a ni thung.

Hetiang thihna khawharthlak hi kan tawn fo loh nan Pu Sangkhuma chhungte duh danin he thihna hi Mizoten fimkhur phah nan hmang ngei ila, thih malsawmna, mi tam tak nunna chhantu lo ni mawlh teh se.

Thihna a lo awm leh a nih pawhin, dan pangngai thlapa kan invui theih nan, vuinaa chhungte awm tur kan awm ngei theih nan, vuitu kalkhawm turte pawh inkaidarh hlauhawm lo tur kan nih theih nan mi tin fimkhur thar teh ang u. Mahni chhungte ngei pawh kan thlah liam thei lo a nih chuan thihna chu a khawharthlak lehzual dawn em mai a! ( Hetia kan sawi thin avang hian he natna kai zawng zawngte hi an fimkhur loh vang vek a ni kan tihna a ni lo. Vanduai fal bik an ni fo. Fimkhurna erawh chuan thui tak min veng thei thung).

Chhungte vuinaah tumah kal thei lo mah ila, khawtlang leh kohhranin mi dang thi ang chiahin min vuisak thlap tih hre ta ila, amah thlahna thu hnuhnung pawh tu emaw talin an chham ve tih hre ta ila, thla a muang zual deuh ang em le? Mitthi dang vui aia a hlauhawm hran bik lo a nih si chuan? He zawhna hian ka ngaihtuahna kil khat erawh a luah ru deuh.