Tunlaia India ramin harsatna a tawh mek langsar tak chu thil man to tial tial (inflation) hi a ni a. Hei hi UPA sorkar pawhin beih a tawhna chhan langsar tak leh an tlak chhan lian tak pakhat pawh a ni a, thil man sang an khuahkhirh hlei thei lo kha an mualphopui hle a nih kha. Chutianga sorkar nasa taka bei thintu BJP leh an thawhpuite chuan thuneihna an chang ve ta a, hmachhawp lian pui pui an neih zingah thil man sang khuahkhirh hi hna tul leh hmanhmawhthlak ber a ni nghal. Tun hnai lawkah chaw leh chawhmeh chi hrang hrang man a to thar leh a, India ram khawpui hrang hranga chengte, a bikin mi retheiten buhfai, alu, purunsen leh chawhmeh dang man to hi an tuar leh tan ta. Sorkar thar piang hlim pawh hian chu harsatna lo thleng mek chu an buaipui nghal a, chaw leh chawhmeh thenkhat man to (Food inflation) zel hi uluk taka vil zui nghal a ni. Thawhlehni (17.16. 2014) khan Finance Minister Arun Jaitley hoin thil man to chungchang relin emergency meeting pawimawh tak koh a ni a, hmalak dan tur hrang hrang an rel a. Kumin hian fur ruah (Monsoon) a tlai avangin thlai thar a tlem dawnin a lang a, chuvang chuan nakin a to deuha hralh inbeiseiin khar chhawngtu thenkhatin an chhekkhawl ru teuh a. Chutianga purunsen leh thil dangte chheprelh a tam avang chuan a man a to phah ta a ni. Sorkar laipuiin state sorkarte hnenah chutianga chheprelh chingte zawng chhuak turin a hriattir nghal a ni. Tun dinhmunah hian India ram khawpui lian hrang hrangah purunsen man hi Kg zelah Rs 20-30 a ni a, a man hi a tlahniam mai dawn lo niin an sawi. Kumin hian fur ruahtui a tlak har avangin thlai chin hun pawh a tlai vek a, October thla chhoah chuan a man hi Rs 100 (Kg 1) a kai chhoh hial an ring. Purunsen hi India ram mipuite ei tlanglawn ber pakhat a ni a, chuvangin a man a san chuan mi zawng zawng a nghawng a, politics a kangkai nghal ngei ngei thin bawk. Chutihlaiin, alu man erawh a tlakhniam leh mai a rinawm a; mahse, rei lo teah a man a sang leh tho dawn niin an sawi. India ram lo neitute hi fur ruahtui (Monsoon)-ah an innghat hle a, kumin hian vai ram lamah monsoon a la thleng mumal lo a, hei hi an tuar viau dawn niin an ngai a; chuvangin, chaw leh thlai rah man hi to leh vak thei a nih avangin sorkar pawhin khuahkhirh tumin theihtawp a chhuah a ni. Inflation-in India ram pum a harsatna a thlen nasat tawhzia hre chiangtu Reserve Bank of India Governor Raghuram Rajan chuan thil man sang chho zel khuahkhirh hi thla eng emaw zat chhunga an ngaih pawimawh ber leh an hmalakna tur a nih tur thu a sawi a. Ram chhung mipui maktaduai tam takten an tawrh lohna tura hmalak dan tur ngaihtuahin sorkar laipui a phe nghal vat vat a ni ber. Chutihlaiin, Mizoram dinhmun hi ngaihtuah ve leh ta ila. A kum telin thil man a to tial tial a, thawmhnaw leh thil dang man to hi chuan mipui nawlpui a nghawng nep deuh a, ni tin mamawh thil man sang tial tial hi chuan mipui nawlpui a nghawng vek a, a rethei apiangin an tuar nasa bawk. Chutiang chu ni mah se tun hma atangin a khuahkhirh tura hmalakna mumal tak a awm ngai lem lo thung. Kum 2010 leh 2011 chhung khan Pachhunga University College-a Economics zirlaite nen Aizawla ni tin mamawh (Chaw leh chawhmeh) hrang hrang man san chhoh dan survey kan nei thin a. Thla rei lo te chhung pawhin thil man a sang chak khawp mai. 2010 kum laihawl vel thleng a Alu Kg 1 man Rs 15 ni thin kha kum tawp lamah chuan Rs 20 a kai chho a. Mahse, kum thar (2011) chhoah a man a tla hniam leh deuh.Tunlai hian Rs 50 a kai chho mek. Kum 2010-2011 chhung bawk khan Aizawlah purunsen man chu Kg 1 zelah Rs 20 leh Rs 30 inkar a ni reng a, tunlai tak hian Kg-ah Rs 40 a ni mek a, a chunga sawi tawh angin India ram hmun dangah chuan Rs 20-Rs 30 a ni mek thung. Hmun dang aia Rs 10 vela a man a sang bik hi a chhan chhui chhuah chi a ni ang. Kan sa ei tlanglawn ber ber - bawngsa, vawksa, arsa leh sangha te pawh hi hman kum kal ta lawk ngaihtuah chuan a man a sang tawh hle a ni. Eng emaw lai khan sorkar leh veng hrang hranga Local Council-te pawhin sa rate bithliah an tum viau thin a, an ti tak tak thei ta lo a ni awm e. Engpawhnise, 2010 tir lam a bawngsa (a ti) Kg 1 man Rs 200 ni thin chu kum laihawl hnu lamah chuan Rs 220 a kai chho a. Tlak hniam lam pan tawh loin a pung zel a, tunah hian Rs 300 a ni mek. Vawksa pawh 2010 kum tir lama Kg khat man Rs 180 ni thin chu tunah hian Rs 250 a ni mek a, arsa leh sangha man pawh a pung zel bawk. Heng kan tar lan tak thlai leh sate hi tual chhunga kan vulh leh thar tawk chu awm mah se, a tam ber hi hmun dang atanga kan chawk luh an ni hlawm a. Lak luhna lama harsatna awm vang te, hmun danga a man a to vang te, a la luttu leh tual chhunga zuartute hlep hnem duh vangte hian a man pawh a sang awk awk thin a ni. Hetia mi tin mamawh thil hrang hrang man sang chu mi hausate pawhin tuar tho mah se, a rethei apiangin an tuar nasa thin. Keini pawh hian han chhut chiang ta ngat ila chuan hmun dang aia hleihluak a thil man to vanga chhungkaw tin tawrhna leh sum hloh zat hi cheng vaibelchhe tam fe a tling ang. Mahse, tunhma atangin kan sorkar hian inflation khuahkhirh tura hmalakna a neih kan hre ngai lo thung. Aizawl hi India ram hmun dang aia khawsak harsatna pawl, thil man sanna hmun tak a ni a. Phai lama awm thinte leh kan zinga hnam dang awm vete pawh hian Aizawl bazar-a thawmhnaw leh chawhmeh man hi mak an ti fo reng a ni. Sorkar laipuiin inflation (thil man to) khuahkhirh tura theihtawp chhuah a hma a lak mek lai hian anni ang thoin kan tuar nasa a, anni aia nasa zawka buaipui tur pawh kan ni tih hi thuneituten an hriat a hun khawp mai. - Lalthlamuana Ralte