Mizoram hi India ramah nitin mamawh, ei leh in, bungrua leh silhfen man tona ber a ni hial maithei. Aizawl khawpui aia taxi fare leh bus fare san zawkna hi a vang viau ang. Khawpui chhunga in hmun to zia te, nitin khawsak a hautak zia te hi kan ngaihtuah ngai lo mai thei. Khuahkhirhtu awm loh vanga thil man to zel hian kawng hrang hrangin harsatna a thlen thin a, mi retheiten an tuar na a, economy a nghawng a, hmasawnna a kal chak loh phah thin. Chutiang chu kan tawng mek a nih hi. Hun engemaw chhung atan chauh a thil thenkhat man to te hi chu a nghawng a pawi lutuk lo thei a, mahse, chutiang ni lo a, a to zel a, a tlak hniam hleihtheih tawh loh chuan achunga harsatna kan sawi te khi a lo thleng thin. Mithiamte chuan thil man to (inflation) chhan hi kawng hrang hrangin an sawi thin a. Mahse, Mizorama thil man to chhan hi chu a zuartute leh sumdawngten an chhiar to vang a ni ber. Sumdawngte hian hlep tam hi an tum ber a ni a, chubakah chuan an thil zawrh hralh hnem te, an elpuite aia chungnun bik te, sumdawnna kawnga insawhnghehte, a leitu hip te hi an tum viau bawk. Kan rama sumdawngte hian hlep hnem a, rei lote chhunga hausak thuai bak hi tum dang an nei em aw... Hman deuh khan sorkarin electric bungrua atanga chhiah (VAT) a lak zat a tihniam a, electric bungraw man a tlak hniam kan lo beiseina viau laiin, ka hriat sual loh chuan ni khat chhung chauh electric bungrua (electrical goods) hi 10% in an titlawm. State dang chu ni se chhiah tlak hniamna ang zat khan thil man a tlawm phah ngei ang. Uchuak taka hlep tum leh hlawk chiam tumna hi sumdawnnaah hian a tlo tak tak chuang lo. Mi rinawm, mi dik, a awm tawk hlep thin te hi an daih rei duh viau zawk. Kan rama sumdawngte zingah hian rin aia hausa leh che lian, an sumdawnna atanga chhut a rinhlelhawm deuh an awm nawk mai. Engpawhnise, tunlai sumdawnna khawvelahhian zir tur a tam hle a ni, hmanlai atanga sumdawn thiam hnam ni a an sawi te hi an tei rei peih a, an rilru a hmanhmawh vut vut lo a, an rintlak a, an sumdawnna pawh a tlo thin. Kan rama thil man to em em mai leh, a to belh zel chungchangah pawh hian a zuartute leh sumdawngte hi an inenlet a ngai khawp mai. Chutihrualin, thil man to (inflation) hi ram hmasawnna tithuanawp thei leh economy a harsatna thlentu a nih avangin sorkarin a thlir liam mai mai tur a ni lo. A nihna takah chuan hna vang vanga harsatna (unemployment problem) leh thil man to (inflation) hi sorkarin a buaipui tur a ni a, mawhphurtu ber a ni a, thuneituten a sut kian dan tur an ngaihtuah tur a ni. Tun hnaiah sa zuarten an ti to a, lumeh man a sang bawk a. Heng bakah hian thil dang man pawh a to tial tial a, mipui nawlpuite khawsak a harsat phah tial tial laiin sorkar hian hmalakna a neih kan hre si lo. Sorkar a chet loh chuan thil man to khuahkhirh theitu dang an awm si lo. Hetiang zela khuahkhirhtu awm loa kan kal zel chuan India rama khawsak harsatna ber kan ni thuai ang. Nikum July thla atanga hman tan chhiah lak dan thar GST kalpui hnu hi chuan india ram hmun dangte nen thil man hi a inang tlang put tawh tura ngaih a ni a. Mahse, a la ni der si lo. Hlep uchuak tumna te, harsatna a lo awm thut chang leh engemaw hun a lo thlen a bungraw man tihsan chiam (profiteering) te hi thuneitute hian an thlir liam mai mai thin a. Hetiang hunah hian sorkar tha leh vengva tak neih a chakawm thin. Thil man to hrim hrim hi khuahkhirh vek tur tihna a ni lo a, a to uchuak khuahkhirh a, hlep chintawk tur aia sang erawh ven a tul a. Chu chu thuneitute mawh liau liau a ni. Kan ramah hian thil man to khuahkhirh chungchanga thuneitu hi tu ber nge? Trade & commerce (Dept. of Commerce and Industries ni ta) hi nge District Commissioner zawk? Hetianga sumdawng hlep uchuakte khuahkhirhna dan kan neih te hi a hmantlak tak tak em? Dan tha zawk siam te a ngai lo maw? Engpawh nise, kan economy derthawng tak mai, sumdawng lian tlemte pawhin an tihbuai theih mai tur, sorkar hnathawkte hlawh a thui tak innghat, sum cham bang awm mang lo a phai lama luang chhuak leh duak thin hi dimdawi a ngai a, ven a ngai a, humhalh a ngai hle. Thil man to kan sawi pawh hi kan economy a harsatna siam mektu a nih avangin thuneitute tan ngaihthah reng chi a ni lo ang.