Pakhatnaah chuan lo hal theih loh vanga lo neitute harsatna tawh chungchang hi ni ta se. Thlasik a reh dawn ruaiah ruah sur leh thin avangin khua a vawt tha leh a, lo hal hun March thlaah ruahtui a tam avangin lo neituten an lo vah tawh sa an pamtul a ngai nual dawnin a lang. Tun hma atangin Mizorama cheng zaa sawmruk chuang hi lo neih leh a kaihhnawih a eizawng an ni a. Mizoram dinhmun kum tina sorkarin a tarlan thin Economic Survey a lan danin NLUP bul tan tirh vela thingtlang lo zau zawng aiin tun hnaiah hian zaa 56 (55.83%) in a tlahniam a. Hei hi NLUP vang niin an sawi thin nghe nghe. NLUP hi kut hnathawkten tlang ram lo neih ban san a eizawnna nghet leh hlawk zawk an neih theihna tura sorkar hmalakna pui ber a ni a. A bul tan atangin political party-ten inbeihna atan an hman avangin mipui pawhin thu dik leh thutak kan thliar hrang thiam meuh lo a. Rorel lai party lamin a hlawhtling viaua an chhal laiin eptu party-te hi chuan a hlawhchham zia an sawi thung. Chutiang karah chuan sorkar data atang hian lo neih ban san phah erawh an tam hle tih a chiang a, NLUP vang kher pawh ni loin a hlawk loh em avanga lo neih ban san pawh an awm nual tho ang. Chutih laiin, eizawnna dang hlawk zawk a awm miau loh avang leh pi pu atanga lo thiam bel tawh sa eizawnna nghet a nih avangin chhungkaw tam tak chuan an la ban san hlei thei lo a, hawp khawp thar lo mah se eizawnna pui ber atan an hmang lo thei lo. Chutiang chhungkua, lo neiha innghat te tan chuan kumin hi a huphurhawm khawp ang. Lo hal khu vanga thlawhna a tum theih loh changa phun thin leh ram a kan palh changa lo neitute dem chiam thin khawpuia chengte tan chuan lo neitute dinhmun hi hriatthiam a har khawp ang. Thla hnih khat hlawh lak theih loh vanga chhungkaw khawsak a buai nghal ai mahin lo neih theih loh vanga an buaina hi a buaithlak zawk ang. Engpawhnise, NLUP leh SEDP (leh NEDP) ten chawi kan an tum ber Mizoram mipui zaa sawmruk (60%) te dinhmun hi ngaihtuah a ngai tak zet mai. An zinga chhungkaw engemaw zat chuan lo an hal hman a ni thei a, khaw awm dan atang khan lo thenkhat chu a kang tha lo ang tih a chiang reng bawk. Tam tak chuan April thlaah hian hal hram an la tum fanin a rinawm a, lo neih tum ta lo law law an awm nual bawk ang. A nihna takah chuan anniho hi Delhi tlang atanga pawisa lokal, state sorkar sum bawm a lut, chuta tanga luang chhuak leh thin (budget pawisa) dawng pha ve mang lo te an ni a, ram hmasawnna hmingpu thil hrang hrangten an thlawh khum thin bawk a. Lo neitute tan hmalakna tura ruahmanna (Policy) awm mumal loh avangin an chanpual tur hamthatna hrang hrang an chang pha lo tih inhre pha lote an ni leh zel bawk. Nakkum MLA inthlan hunah erawh chuan an pawimawh leh viauin a rinawm si. An harsatna tawh mek leh an la harsat chhoh zel dan tur te hi zir chian a, tanpui dan ngaihtuah a tul khawp mai. Pahnihnaah chuan State Convention Centre sak vanga harsatna thleng mek chungchang hi ni leh ta se. Convention Centre sak hma hian mumal taka geologist rawn a ni lo a, contract hna a nih avanga sorkarin a rawn lo a nih hmel a. He lai leilung chinchang ngaihtuah miah loin lei laihna khawl lian pui pui nen hna a thawk ta a. Kar loah circuit house hmun zau tak kha a thlang kawngpui rualin an lai zo a. In ropui tak - (Assembly house-a UD&PA minister sawi dan chuan VVIP room, VIP room pakua, mi 50 leng meeting room, auditorium mi 300 chuang leng, mipa leh hmeichhe dormitory mi 21 ve ve leng, parking car 89 leh two wheeler 100 chuang leng awmna tur chu) an sa tan ta a ni. Mahse, vanduaithlak takin nikum december thla tir lam atang khan a chhak lam a khi tan a, chumi chhak Bible House kawt kawngpui (MG Road) a khi zui bawk a. December ni 7 khan kawngpui feet 30 vela sei a khi a, tlemin a tla hniam bawk. Kawnga lei khi leh a tla hniam a zual zel a, ruahtui a lo tla bawk si a, luah zel ngam rual a nih loh avangin Bible House pawh chu thiah a ni ta a. March thla tawp ruahsur avang khan Baptist House pawh a che ve leh a, kar kal ta thawhtan a ruah nasa taka sur avang khan luah zui ngam ziazang a ni ta lo a. Khawchhe hnuaiah an inthiar chuk chuk a nih kha. Convention centre sak mek pawh hna chawlhsan ni a, a hnuai lei chet vang hian an rel sa pawh a tla hniam a. Tun hnai lawk khan BSNL building lam pawh a che deuh tih a ni leh ta zel a. Chutiang vel chu state convention centre sak vanga buaina tlangpui chu a ni. Furpui kan hmachhawn dawn chauh si a, a huphurhawm dawn khawp mai. Assembly session zawh takah khan zawhna chhangin chief minister-in Convention Centre sak vanga Bible House leh a chheh vela lei khi a nih leh nih loh finfiahna a awm lo tih a sawi mauh mai a. A nihna takah chuan he lai lei chet chhan hi puh tur dang a vang khawp ang. Mahse, zir chianna a awm lo hi a mak lai chu a ni, sorkarin chutianga zir chiang tur mithiamte rawih ngei erawh ring ila. Leilung chinchang zir chiang hmasa miah lo a in ropui tak sak tum ngawt hi Municipal dan ding lai (Building Regulation) dan kalh a ni a. Hmun dang chu ni se dan zawm loh vang ngawt pawh hian a mawhphurtu ber hian thubuai a nei ngei anga, dan bawhchhiatna avanga hrem tawk pawh an awm bawk anga. Dik taka chhui chiangtu tur sorkarin a ruat bawk ang. Chutiang a nih loh chuan contractor hian sorkar hi a khing let anga, sum a chawi belh tir teuh thei ang. Geologist rintlak tak pakhat sawi dan chuan helai bawr hi in lian tak sakna chi a ni lo hrim hrim a, lei hnuaiah tui a tamin a lang a, a zawn thla zel Khatla/Tuikual chuan hnuai thleng hian lei hi a nghet lo a. Sorkarin mawhphurhtir duh lo mahse Bible house leh Baptist house thiah a ngaih chhan leh kawngpui tlak hniam chhan te hi convention centre hmun tur nasa taka laih vang hi a ni tih phat rual a ni lo. Aizawl khawpui enkawltu Municipal Corporation hian khawpui chhunga insak chungchang dan an siam a, zawm lo tam tak an awm na a, state sorkar ber hi a zawm tur a ni a, thuneitute berin dan an ngaih pawimawh loh chuan tunge zawm bik ang? He harsatna thleng avang hian sorkarin sum tam tak a chan dawn tih a chiang si a, mawhphurtu awm lo a zuzi tir ngawt chi pawh niin a lang lo. Chuvangin, a chhui chiangtu tur din a, dan bawhchhiatna awm leh awm loh zir chian te, mawhphurtu chhui chhuah te, contract hna inpek dan te leh thil dangte chin chhuah vek a. Hleih nei miah lo a hmala zui turin sorkar hi han beisei ngawt ila.