Setana hian mi lungawite hi thlem ngaihna a hre lo’ an ti thin a, a dik ngawt mai. Awh leh mamawh kan ngah viau chuan kan chan tawkah kan lungawi lo tihna a ni a, chu duhamna thinlung chu sual kuitiahna lei dur tha takah a lo chang mai thin. Vantirhkoh zinga ropui ber, Varparh, zing lam fapa ti hiala sawi, Lucifer-a pawh kha a dinhmunah khan lungawi hle hle se, Pathian aia sangah bu khuar tumin tan la lo se, van ata paih thlak a ni lo tur. 

Ram hruaitu leh sawrkar hnathawk officer liante hian an hlawh hi lungawi pui se an ei ru fo lo tur. MZP-in sawrkar hnathawk ei ru lo bera a thlan officer pakhat chu a eiruk loh chhan an zawt a, chuta chu officer chhanna chu, “Ka hlawhah hian ka lungawi a, ka hlawh bak ei ruk hi tul ka ti lo a ni,” a ti. A lehlamah officer lian tak, hlawh sang tak pawh nise a hlawhah a lungawi loh a, a hlawh phu aia sanga a khawsak miau chuan a ei ruk mai nak lohah.

Lungawina hi dinhmun azir pawh a ni lo a, mihring rilru puthmang azir a ni zawk mah awm e. Hausak leh retheih emaw, hmelthat leh hmelchhiat lam vang pawh a ni chiah lo. Lungawi lo duh nise Suakliana (L) khan lungawi lohna tur chhan a nei tha khawp mai. Rethei takin hringnun a chhiar a, lu a sun a, a mit khinghnih a la del zui. Keini ni ila, ‘Ka tuarah vanpui a chim’ tiin kan indawm kun tlawk tlawk mai thei. Mahse, chuti khawpa vanduai Suakliana chuan a vanduaina lam reng a thir duh lo. Chu a hnehin, “Lei hi Lalpa, i thilthlawn pek hmasa a ni. Ka chhiar seng lo lei lawmna, van hmun ropui i malsawmna famkim a ni, Kalvari tlangah kei min pe,” a ti hep hep mai a ni, tluk loh rim a nam mang e! 

Sawi leh sawi hnu, officer lian leh sumdawng hausa tak pawh ni ila, kan dinhmunah kan lungawi loh tlat chuan thingtlang pa mawl têa kan ngaihte ai hian kan rilru a rethei zawk mah mai thei a ni. Ramtuk thla a lo her chhuak a, thingtlang pa chuan a thahrui chakna hmangin chem tum nen ram ngaw a tu darh a, vahchap chu thal nisa rum rut mai chuan a han hem tang at a, lo an han hal a, an lo hal khu chuan par a chhuang nguk nguk a, thing leh mau bulte chu a puak ri tuk tuk a, meipui chu van lamah inchung chen chenin a in hlap chho a, boruakah an inchibai zuai zuai a, pa lung a awi veng veng mai. 

Kangvarah an han feh a, lei te chu a lo kang dur huam a, thing bul lian deuhte chu a lo mut vung vung a, nuin thlai chi a thlak a, pa lung a awi veng veng mai a ni.

Tomir thlaah ruah thimpui a lo thawk a, an thlaite tan malsawmna an rawn thlen a, an chawr no help help a, chu ngawt pawh chuan lawmna sawi hleihtheih loh a thlensak thin. Hnuhpui an han kuai a, buhte chu nguntang chen an lo ni a, huihchhuk thliin a han chhem thle nghial nghial a, kel chal an tlan del del a, sawntlung pawngah dingin zo tui thiang an han khiat khalh khalh a, an handam sawng sawng thin.

Chhun chawfak a lo hun a, nuin a maian sih thar chu a bai kawi hlarh a, samtawk, bawkbawn, hmarchapui leh bawrhsaiabe a thlak bawk a, changel hnahah a han bun hnuk a, a khu vang vang a, sakhi sarep rawt thak an hmeh tum phei chuan puar el euhin chaw an fak thin. Pa berin thlam sut nghengin thingpui no a dawm a, zo zial a tan a, a pak khu talh talh a, a hmelah lungawina bak chhiar tur a awm lo.

Favang hun duhawm a lo her chhuak a, buhte chu an vui eng tek tuk a. Buh vuak ni chuan arpui tui lai leh vawksa rep chhum pawlh nen lawm an ruai a, naupang leh an ui vulh nen lam an ri chel chul thin. Chhun chawfak chawlh laiin pa berin hruiha buh vum thur mai chu sisepin a zap fai hauh hauh a, a lungawi hliah hliah thin.

Lal pian hun champha a lo hnai a, khua a vawt suk a, ruam tinah tlaizawng a lo par a, thingtlang pa chuan Krismas hma ngeia a buh tharte chu ina thlen kim hram a tum a, zing vartian atangin buh thiarin a hmanhlel thin. Krismas hmaa a buh tharte buhzema a khung kim hman chuan a lawm em em a, engthawlin Krismas a hmang thin. 

Hunpui a zo a, kum a lo thar a; kum thar tirah chuan thalsik ni chu a dul reih a, van chu a lang thiang kuk a, pengleng leh vamurin van dung an rawn thual a, an thlawk kawi zawr zawr a, chutiang boruak muanawm tak hnuaiah chuan thingtlang pa chuan lungawi takin ringthar lamah rampui tudai turin hreipui nen a in pu liam leh thin. 

Mahni hnaa lungawi veng vengna, sapin job satisfaction an tih hi pisa daihlim hnuaia kumpui lingleta nilenga thu thin tan chuan neih a har phian mai thei. Chu lungawi veng vengna chu beka thlan tui luang zawih zawiha kum tluana hna thawk thin thingtlang pa chuan a chang mawlh mawlh thin.