Covid-19 hripui thawh hnihna lêng mêk chuan nun phung leh khawsak phung a ti buai tak zet zet ta! Local/Village Level Task Force lamin dâwr inhawn nî an lo siam lâwk pawh, sût leh rum rum a ngaih nî a thleng ta hial a. Tlângau paw’n khawlaia awm zawng zawng mahni ina hâw vek tûra a au hnu lawkah, gas mamawh tâna sem a nih tûr thû a puan zui zat a ngai ta! Dik tak chuan, a hahthlâk a, thâw a ipik thlâwt a ni!

    ‘Khaw' maw i zial chu min lo fawh bàn teh,’ tia meizial inzûk tâwm mai thin hnam kan ni a; sahdan pawh insawh(sâwk)-sak ngheng mai thin Mizo kha kan la ni reng tho. A suah chhûngkua nih ai maha bai suahtu nih nuam ti thin hnam kan ni a; thenawmte naute thar en loh hrehawm ti thin Mizo kan nihna te kha vawi leh khata bo thut thei a ni si lo. Mahse, tûnah chuan kan thil chîn leh nuam kan tih thinte kha, rál anga hlauhawmah an chang zo ta!

    Thenawm khawvêngte nêna inlên pawha chaw ei kham thingpui háng dawm ho thin hnam kan ni a; mahse, tûnah chuan anmahni hlau lo mah ila, keimah hi min lo hlau thei tawh tlat—thil tih chî a ni tawh lo. Chhiat nî that nî-a inlênpuia lû inmenpui thin Mizo kan la ni reng tho a; mahse, kan tih leh chîn thante erawh, he hrî inkai chhâwn ti awlsamtu an ni ta si! ‘Kan Mizo ta lo,’ tihna lam a ni lo.

    ‘Kan Mizo-na’ hi kan thil tihah a awm ber lo a; kan rilrua awm a ni. Kan rilrua ‘Mizo rilru’ kan put nghehna hi kan thil tihah a lang chhuak mai zâwkthin. Tirhkoh Paula’n ‘…thiltih avâng a ni lo ve, chutilochuan miin an chhuang dah ang e,’ a tih ang deuh khan, kan rilru atanga chhuak ni lo, kan thil tih atang ringawta  kan teh chuan, chapopui mai a awl thin rêng a ni.

    Hetia hripuiin officer leh mi harsâ; nula rîm hrât leh sa sât; mi chhe hmelchhia leh hmeichhe hmel chhia; tlai tina ‘kai’ thin leh pisa kai thin— rual khai taka min hrût lai; tûk tina hri vei thar kan pun zêl lai; rin loh tak takte’n an kai ve nawlh lai; chanchin ngaihthlâk nuam lo tak takin min hual vêl lai hian, Mizo kan nih avânga chanchin ngaihnawm hriat tûr a awm ve reng thin hian thlâ hi a timuang leh sawng sawng \hin.

    Hlawh pawh phût miah loa hri lênna hmunpui, Covid hri vei enkawlna hmuna hna thawk tûra inpe, nurse leh medical lam zirlai/zir chhuak kan nei leh tlat thin te; sâwtah, Tlabung lama YMA hruaitu pakhat, Covid dam lo motor-a phur tûra a’n inpe tawp mai te; an hnâ ni miah lo, kawng dunga motor ke chhe siampuia traffic police an lo buai lai thlalâk han hmuh te hian— ‘vai’ kan ni lo tih hi a chiang thin. Lâwm tûr kan ni. 

    Kan Local/Village Council member te hian hri kai kan hlauh tluk zet … chu aia nasa pawhin a ni ang, an hlau ve vek. Mahse, Mizo an nih angin kan khawtlâng him nân an pên chhuak mai a ni. Pastor pakhatin, zâm lo tûr leh an tâna zan khuaa Pathian au-a bân a lo phar ve tûr thû WhatsApp lama han hmuhte hian, thlâ hi a muang sawng sawng a. Kohhran te leh pâwl hrang hrangten, an theih leh phâk ang tâwk zêlah tan khawhin, Chief Minister Relief Fund-ah tanpuina sum an chhûng lût ruih ruih reng bawk a. Hmun hrang hrangah hetianga tanpuina hna thawk sawi tûr hi an tam, sawi vek sên an ni lo. Tawlhlohpuan sintîr phû vek an ni.

    Hming hmerha sawi loh theih loh pakhat ka nei—Zoramin zahna chibai kan bûk rawn, Champhai Ruantlâng nula, CT Ramnunmawii hi. Kan hre vek ang a, râltlân pitar kum 93 mi hri vei, enkawltu nei loa awm, Pi Lalsiami enkawl tawptu kha. Dam taka damdawi in an chhuah lai video kha kan hmu deuh vek tawh àwm e. Mizo nih hi a va han ti nuam vawng vawng tak êm aw…!

    A mi nâwlpui tân chuan, tûnah hian Mizo kan nih anga kan chîn thin leh kan tih than te, tih ngei ngei tûra kan ruat leh kan ngaih thinte kha—a bo hlen dâwn tihna ni loin—kan hima kan dam tlân nân, kan lan chhuahtîr vek a rem rih lo a. Kan tlâwmngaihna te, intanpui tawn thin kan nihnate kha, thinlung atanga chhuak Mizo rilru dik tak chu a ni a. He kan Mizo ze dik tak hi, hri lêng avângin pâwn lamah lan chhuahtîr thei rih lo mah ila, a bo hlen tû ma’n phal ngai lo ila, thinlungah i Mizo reng ang u.