Luangliam

Thirsakawr khalhtupa fapa

Zirsangkima - Dec 05, 2021

Vawiinah chuan a chanchin a danglam ta!

Binod Basaka chu Bihar-a Kishanganj khuaa chêng a ni a, mi ropui chhúngkua atanga sei lian a ni lo ang bawkin chhúngkaw ropui dintu pawh a ni hran lo. An chief minister hlui, a ei rûk nasat hmingthanpuitu Laloo-a’n an chhúngkaw intun din vena tur, an chanai a ei zawhsak vàng pawh ni chuang loa hausa lo sâ ve rêng a ni a; mahse, vawiinah chuan a chanchin a danglam ta!

Pu Binod-a chuan thirsakawr khalhin mi chhúngkaw mamawh leh thawmhnaw lam te a zuar kual thin a. Chuta tanga a hlawh chuan a fate zirna tùr sum a tuak thin. A nupui, chhúngkaw nu ber Pi Manju Devi erawh chuan in chhúng khur hna tûl a lo thawk thin.

Thirsakawr khalha chhúngkaw chàwmtu Pu Binod-a chuan fapa hlîr pali a nei a; a upa ber chuan hna a thawk ve tawh a. A dawttu Anil Basaka chanchin hi a ni sawi kan tum chu. Anil-a nau pahnihte chuan lehkha an la zir ve leih leih chauh. Thirsakawr khalhtupa chuan thil a zawrh kual mai bâkah, hna dang pawh—hlâwk zâwk a hmuh fuh cháng chuan a thawk hreh ngai reng reng lo—a fate zirna man tumsak theih loh chu a thil hlauh ber a ni si a.

Mahse, nikum Union Public Service Commission (UPSC) exam-ah khan a fapa upa ber dawttu Anil Basak-a chuan a tum thum nán UPSC exam a hma chhawn leh a; India ram pumpuia mi 761 pass zíngah 45-na a ni thei ta tlat mai!

A hma zawnga mi in hnuai luaha khawsa ve nãw nãw thin kha, tûnah chuan an mahni pual ngei in, ropui teh luau chuang lo an sa ve thei ta hial!

Anil-a pa, a fate zirna ngaipawimawh êm êm mai, Binod Bisaka hian páwl li thleng bâk lehkha a zir lo a; mahse, tawng chi hrang erawh a thiam hnem ngang mai. Tin, ina a awm tawh chuan TV en a hrât hle! TV serial leh ‘vai zai’ lam erawh a en hman lo; chanchinthar ngawr ngawr a ni a en thin ni. Mahse, chu chu Anil-a chuan a hlâwkpui thu a sawi uar hle mai a, UPSC Civil Service exam-naa a tangkaipui thu pawh a sawi tel nghe nghe.

Kan sawi tâk ang khan, Pu Binod-a chu thirsakawr khalha thil zuar kual thin a ni mai a. A cháng leh hlawh tha zâwk ûmin Rajasthan lamah mi chhúngkaw tan, ‘awmpui hna’ te a thawk leh ang lâwp lâwp thin a. A fapa, India ram puma hna sáng ber exam-naa a tlin hma lawk khan, an khua Kisangnaj-ah thawmhnaw zuara sumdawnna bul a tan ve thei ta a; thirsakawr hmang thoin khaw thenawmah te a sem kual thin.

‘In lamah mamawh kan ngah ngang si a, kan chhúngkaw sum neih lah a tlém hlê mai si. Chhúngkua ni tin mamawh ka thawh chhuah a ngaih piah lamah ka fate pali zirna man ka tumsak thei lo ang tih hi ka hlau a; an tum ram an thlen theih nán hetiang hian ka inhlawh kual thin a ni,’ tiin Pu Binod Basak-a chuan a sawi.

Kum 26-mi Anil-a, UPSC exam-a India ram puma 45-na ni thei chuan, ‘Ka pa hi ka entawn ber, min khalh kaltu leh min hnehtu ber a ni. Thirsakawr hmanga a sum dàwn bâkah ei rawng min bàwlsak cháng a awm a, chhúngkaw sekrek hnà a thawk fo bawk. Chhúngkaw tána ni tina a hna thawh zât, zà-a 10 (10%) pawh hi lehkha zir nána hun ka pêk theih phawt chuan, civil services exam-a ka inziah tlin theih hi ka ring tlat thin a ni,’ tiin a pa a ngaih sànzia a sawi.

Vawiinah chuan thirsakawr khalhtupa fapa, Anil Basak-a hlawhtlinna hi mi mak tih a ni ta!

Robert Schuller-a lehkhabua thu inziak, ‘Tough time do not last, but tough people do’ (Hun harsa chuan kian ní a nei thin; mahse, harsatnain a hneh ve theih loh mihring erawh chu an ding chang thin) tih thua innghat tlat Anil-a hi an chhúngkaw member, mi paruk zínga páwl 10 zir chhuak thei pahnihna mai a ni a; mahse, UPSC exam pass thei pakhatna a ni ta!

Kum 2014-ah India rama engineering zirna in chhuanvâwr, Indian Institute of Technology (IIT) Delhi-a Civil engineering zir tùrin JEE exam-ah a inziak tling a. A pa làwm maizia chu! Third year a zir lai, August 2016 a\angin UPSC exam hma chhawn turin a inbuataih zui. An chhúngkaw sum dinhmunin a tlin ngang loh avàngin 2018 thleng bâk coaching class a kal chhunzawm thei lo hial!

Kum 2018-ah UPSC exam hmasa ber a bei a; mahse prelims exam a tlang zo lo! ‘Ka chakna leh theihna zawng zawng séngin 2016 a\anga 2018 chhúng ka inbuatsaih ve a; mahse, prelims ka tlang thei si lo…’ tia a rilru nat thu sawiin, ‘Ka thil thlìr dàn a dik tâwk lo pawh a ni ang e,’ a ti bawk.

A vawi hnih exam-naah 616-na a ni a; mahse, beidawng duh loa a vawi thum exam-na, mi 4,82,770 in-exam zíngah 45-na a ni thei ta!

‘Dik taka sawi chuan kan chhúngkaw dinhmun leh kan sum leh pai dinhmun chu a chhia alãwm; mahse, khâng hun harsate kha min fiahtu dik tak zâwk chu niin ka hre ta; chakna hnárah ka hmang hlauh a,’ tia Anil Basak-a thu sawi hian thu tam a va pai tak êm!

Harsatna leh retheihnaten a ngam ve theih loh hêng mite chanchin hi a va’n ngaihnawm thin êm ti r’u? Mi thenkhat hi chuan kan retheihna te, kan chhúngkaw khawsak harsatnate hi kan chapopui lek lek fo mai—kan fate thiam theih loh leh thatchhiat khuh nán, zak miah loin kan chham sek fo ngam nia!

Pu Binod-a anga fate zirna ngai pawimawha eng hna mah thawk zak lo leh thawk hreh lo ang hi keini zíngah hian pa eng zât tak awm ve ang maw aw…? Chhúngkaw khawsak harsatnate hi min chotuah hmang ve ta hlauh zâwk ila a va duhawm dawn êm!

Share now