Thisen pek kawngah hian Mizote hi kan tlawmngaihna hian min kaihruai tha bawk a, India ram state zingah a titha pawl kan ni deuh reng a ni. Thisen pek hi a hlu em em mai a, a Kristian zia hliah hliah a, damlo mamawh tan phei chuan a hlut dan hi sawi rual a ni lovang. Blood donation campaign lama hmalatute pawh an fakawm char char hle mai a, hmanni lawk, Valentine’s Day-ah pawh kum danga an lo tih fo tawh thin angin mi za telin thisen an pe a, hetiang news te hi ngaihthlak a nuamin Mizo nih tinuam em emtu a ni.
Medical science lama thiamna a lo than chhoh zel hian damlote tana thisen pek kawngah an natna a zira pek bik leh pek dan kaihhruaina tharte a lo awm ta zel a. Tin, thisen hlawm “Whole Blood”-ah hian blood cells bakah tuiril plasma te, electrolytes chi hrang hrang te a awm bawk a. Natna a zirin whole blood pek aiin heng a chi hrangte hi a hlawm a then hrana pek a lo tangkaiin a him zawk a, chutiang avang chuan thisen (whole blood) pek ngawt aiin Packed Cell, Fresh Frozen Plasma (FFP), Platelet concentrate, Platelet rich plasma (PRP), leh Cryoprecipitates tihte kan lo hman phah ta fo a ni.
Damlo na zual, thisen pek ngaite hi an kal (kidney) function a chiangkuan loh chuan whole blood pek hian an heart lamah pressure na zawk a pek theih avangin tuiril tel lo, Packed cell pek te an chawh ta zawk a; chutiangin, Liver lam function tha lo vanga bleeding an neihte pawhin whole blood aiin FFP-te an chawh ta thin zawk a ni. Thisen cancer lam chi hrang hrangah te an thi chhuak reh thei lo enkawl nan PRP-te an chawh thin bawk. Chutiang hmasawnna avang chuan Whole Blood bag 1 atang hian specific taka mamawh bik bag chi hrang hrang a lo buatsaih theih ta a, blood unit 1 chu damlo hrang hrang natna inang lote enkawl nan a lo hman phah theih ta bawk a ni.
Thisen petu hian man beisei lovin a pe a, a lo dawngtu erawh chuan kawng chi hrang hranga process kual a nih hnuah ama tana tha ber tur a lo dawng ta tihna a ni a. Chu thisen chu him taka a lo dawn theih nan leh, hrik tha lo hrang hrang laka fihlim, thisen thianghlim a dawn theih nan chuan process a kaltlang tur a tam hle a ni. Hei tak hi tuna ka rawn sawi tum chu a ni. Thisen petuin a pek hian a thlawn chuan a pe ngei a, a lo dawngtu tan erawh chuan direct-a inpe pawh nise a inpekna tur hmanrua drip set tal a ngai a, chu chuan man a nei lo thei lo – thisen dawn hian man (price) a nei tihna a ni.
Tunhma blood bag man sawrkarin a siam hma khan hun rei tak chhung chu Blood Bank-a blood process-na mamawh hi central sorkarin Mizoram State AIDS Control Society (MSACS) kaltlangin a pe vek thin a, blood bag, process-na hmanraw hrang hrang leh hrik awm leh awm loh check-na test kit-te thlengin a thlawnin a pe thin a ni. Mahse, hun eng emaw chen atang khan hei hi central lamin a rawn pe thei ta lo va, chutiang avang chuan Blood Bank-te pawh an mangang ru viau hman a ni. Kan ram sum dinhmunte a chauh avangin a hranpaa han tih vak ngaihna a vang khawp a, Main Blood Bank Civil Hospital Aizawla mi mamawh tur pawh Civil Hospital fund an neih ve chhun ang angte an hmang lawp lawp niin a lang.
Chutianga blood process na sum lama kan buai avang chuan sorkarin hreh tak chungin blood processing fee lak a rawt ta a, mipui lam pawh khan kan hrethiam lo viau a nih kha. Mahse, kan han kal chho ta zel a, blood bank lam pawh he hmalakna avang hian mumal takin an lo kal leh theih phah ta a. Fee an la chung hian mi harsa zualte erawh chu a thlawna pek an awm reng bawk. Kan hriat atana ka duh chu state lian leh hausa zawk, Maharashtra-ah pawh blood bag man hi Rs.850 a la ni cheu a, Karnataka lamah phei chuan HIV test kit thar chi, Nucleic Acid Test (NAT), window period ah pawh ni 7-10 chhunga HIV detect thei hman an duh avangin Rs.1000 a chuang hial a ni. Punjab erawh state hausa ngang an nia, Govt Hospital zawng zawngah a thlawna pek tur an ti thung.
Kan sorkar thar chuan Blood Bag man lak thin chu a rawn titawp leh ta a, a mamawhtu tan chuan a lawmawm ngang awm e. Mahse, keini state pachhe tak maiah hian engtin nge a processing fee hi khawi atangin nge kan phuhruk ang tih hi ngaihtuah ngai tak mai a ni. Private Hospital-ah phei chuan an blood bag lak apiang kha screening leh cross matching an tihthat leh vek a ngai ngei ang a (fimkhur a ngaih em avangin), a thlawna pek chu a har duh ve khawp ang. India ram thenawm hnaiah hian Sri Lanka hi an system a felfai vangin sorkar enkawl hospital-ah an free vek thei a, Pakistan leh Bangladesh velah chuan India pawisain 500-800 vel man niin an sawi. US lamah erawh a to fang fang hle mai a, India pawisa chuan Rs.18000 chuang man te a ni daih mai.
Engpawhnise, kan sorkar hian kan ram mamawh dang atanga sum pawtpeng lova blood processing fee hi a ruahman thei a nih chuan a lawmawm ngawt anga. Mahse, mipui rilruah zawk hian engkim mai hi sorkar atanga a thlawn vek mai beisei kan ching thin hi erawh kan ngaihtuah chian a tha ka ti. Mi harsa leh chhumchhia zawkte hi chu kan chhawk ngei ngei turah ngai ila; mahse, kan lifestyle leh standard en hian thisen man pek vete hi chu kan tih awm zawk a ni lawmni tiin ngaihdan tizau atan ka han ziak ve ta chiam a ni. Thisen hi thahnemngai takin pe zel ila, kan sorkar kan chhawk theihna apiangah chhawk erawh inhuam zawk ila, changkan lam i pan ang u ka han ti ve a ni e.