Pathianni kalta khan Sunday school training-naah mi pakhat, thluaka sum lut chanchin kan sawi ho chiam mai a, chang dang kan lovin enlawkna kan tling tla der mai nia!

Chu mihring chuan Isua kha a hringhranin a hmu a, a zui a, a thil mak tih tam tak a hmu bawk a. A pawi ber erawh chu a thluakah sum ngainatna a lut tlat mai kha a ni. An pawl pawisa kawltu a ni a, a tham ru zeuh zeuh thin a, a tham ru thin tih chu an hotupa pawhin a hre ru bawk a. Mari’n Isua hriak rimtui a thih te chu a lo ui em em a, “He hriak rimtui hi duli sathumin (tunlai pawisa hlutnaa chhut chuan cheng nuai khat leh singhnih man) hralh ila, mi rethei hnenah pek ni zawk se” a lo ti vel a. Mahse, mi rethei a khawngaih vang a ni lo va, chu pawisa chu hlep ruk a duh vang a ni tih an hotupa chuan a hria a, a ngaihtuahna, a thluaka sum lut nen lam a hmu tlang vek a ni.

A sum ngainatna chu a zual zel a, a thluak a fan hneh tlawh tawlh a, an hotupa meuh pawh tangka sawmthumin a hralh a, a man tir ta mai a. A hnu lawkah a in chhir leh si. Ril tla phungin a inawkhlum ta a ni. Dik lo taka kan sum lakluh te hi min tilungngaitu, chhiatna min thlentu a la ni dawn tih he pa nun atang hian a chiang viau a ni.

Thluak a sum lut mi pakhat kan sawi zo chauh a, thluak a sum lut lo mi pakhat chanchin i han sawi ve leh teh ang. Amah chu mizo pa, HK Bawihchhuaka a ni a, District Council hun lai khan CEM (tuna CM dinhmun ang hi) a ni. Amaherawhchu, CEM a nih chhung khan in leh lo, huan leh ram engmah a nei lo. A laina hnai te pawh engmah a pe bawk lo. A chhungkhat hnaivai te’n in hmun an dil pawhin “Pahlira hnenah dil rawh u” a ti mai a, “Mahni leh lainate kan vur chuan hnamin a chhiat phah ang a sin” a ti mai thin. 

Kum 1970 ah a term a hmang zo a, CEM bangla a chhuahsan dawn chuan awmna tur in a nei ta lo! Pu Lalhmingthanga’n a khawngaih a, Zarkawta a in chu a luah tir ta a ni. Chumi hnu chuan tlangval tlawmngai te’n Electric venga a in hmun neih ve chhunah chuan sethlamin bawkte an khawh sak a, tah chuan a in vawmlut ve ta a ni. 

Pu HK Bawihchhuaka hian duhthusam a nei ve a, chu erawh ho ang reng tak a ni- “Hausak ka tum lo a, ka duh bawk lo. Mahse, ka sikret duh zawng ber hi zu reng thei ila, Tennis khel thei reng bawk ila ka duh tawk mai. Mangan tawpkhawka hman tur bank account ah cheng sangnga awm bawk se, chu pawh chu khawih chet lohin awm reng se ka duh tawk mai. Hausak ka duh lo a, ka awt bawk lo” a ti. Distric Council hun laia hotupa ber CEM chuan dun nise Aizawl hmun tha lai berah hian invalh thei hial ang. A thluaka sum leh duhamna lut lo leh lutuk hi a ngaihsanawmna lai tak a ni lawi si.

Sum duhin kan hman hlel a, sum hmuhna a nih dawn phawt chuan mawi leh mawi lo pawh kan thlu ta mang lo. Bible in, ‘Sum tam tak aiin hmingthat hi thlang zawk rawh u’ a tih te chu kan mausam a, sum hmuhna leh kan hausakna tur a nih dawn phawt chuan hming hliau te mai mai chu eng huah kan ngai ta mang lo. Hlep tam loh hlauin contractor-in hna a thawk a, a contract hna chu ningnelin, a kawng siam te chuan fur khat pawh daih lo mahse a zak lem hlei lo a. Thenkhatin midangte chhiatna tur pawh pawisa loin ruihhlo an vawrh miah miah bawk a. Kut tlingloa kan sum lakluh hmangin in leh lo tha pui pui kan din a, huan leh ram kan lei awlh awlh a, motor changkang ber ber kan lei a, heng thil te hian zahawmna leh nunkhawnawmna min pe dawn emaw kan ti a, a ni huah si lo.

Kan boral ni, leilung dana kan zinkawng kan zawh tawp niah meuh chuan kan in leh lo tha pui pui te, kan huan leh ram te, kan lirthei changkang tak tak te hi kan ruang chunga sawi chhuah tlak a ni miah lo. Sawi mah ila mite’n ngiahnawm an ti lo ang. Kan ruang chunga sawi chhawn tlak loh ropuina puarpawleng um hian kan va inham buai nasa si em! Kan ropuina tur emaw kan tih hi hmingchhiatna zakhua min thlentu, kan thlahte thlenga mite’n an entleu phahna tur a lo ni zawk si.

HK Bawihchhuaka khan CEM a nih lai khan in ropui tak lo din se kan ngaihsan phah hauh lo ang. Chu a hnehin CEM bangla a chhuahsan dawn thleng pawha mahni puala in leh lo nei lo a nihna te, a hnuah bawng in u awrha a han in vawmlut rak rak te kha vawin thlengin sawi nuam kan ti a, HK Bawihchhuaka chanchina a ngaihnawm lai ber pakhat a ni. India President ropui APJ Abdul Kalam-a khan Rashtrapati Bhavan a chhuahsan dawn khan a bungraw neih zawng zawng kha suitcase pahnihah a leng tawk vel a ni an ti. Mother Teressa khan khawvel a chhuahsan khan vawthlep pheikhawk leh a awrh thin cross bak kha hnutchhiah a nei lo. Mahse, mi ropuiah khawvelin a chhiar lawi si. 

Khawvel ropuina rap bet a, sum leh pai thlemna hnuaichhiah a, thluaka sum ngainatna lut ve ngai lo te hi khawvelin mi ropui a ti a, an chanchin hi thangthar tiau zat ral hnu pawhin an la sawi chhawng leh thin ang.