Dr Hrekima Titi

THU BER, FING BER, HMANGAIH BERTU CHHANNA

Dr. C. Lalhrekima - Apr 21, 2021

A hmaa zunthlum nei ngai si lo, zai dawn velah a thisen thlum (blood sugar level) a sang ta tlat a. A hma kar tawp lama a ei leh in tuar lo pawh a ni mahna! 

Rev. Ropuia chu a ke ruh tliak kilhna thir phum lak chhuah a tul avangin ni 13.4.2021-ah damdawi inah dah luh a ni a. A hmaa zunthlum nei ngai si lo, zai dawn velah a thisen thlum (blood sugar level) a sang ta tlat a. A hma kar tawp lama a ei leh in tuar lo pawh a ni mahna! 

Zai dawn tuk, ni 14.4. 21 zing dar 8:30 khan acucheck-in an test a, 204 a ni a. A hma tlaiah pawh 200 a ni tawh reng a. Zai theih a ni dawn lo ta mai a. 

“Tawngtai rualna hmang ang u,” an ti a. An nupain damdawi in pindanah an tawngtai a, in lamah an fate. “Kan amen zo chu an rawn check leh a, 124 a ni ta duai mai. God is good all the time. Min tawngtaipuitute zawng zawng vang a ni. Pathian hian ringtu tawngtaina hi a chhang thin. A ropui takzet a ni,” tiin thian zaho, ho zet zet awm khawmnaah a rawn sawi hlut a. 

Chu group-a awm ve, zun thlum nei ve sate chuan, “Kum hnih kan dil tawh a, a la hniam lo a, insit a na deuh ngei mai,” te an ti fiamthu a. Pathianin tawngtaina a chhan chawpchilh dan ropui tak chu kan hriatpui a, a ropui kan ti. 

Chumi tlaiah chuan rawlthar pakhat chu ka hnenah a rawn tap lut ve thung a. Nun buai, thih duh fo tawh, kan indan fo tawh, thih hial duh khawpa mangang leh tawh a ni. Intihhlum phalna min rawn dil a nih chu! “Pathianin ka tawngtaina a chhang ve ngai lo,” tiin a mittui a luang zaih zaih a. Ring chunga tawngtai chu a ni ve ngei awm sia, ring lo se Pathian auh awm loh tak!
Chhan nghal mai atan a emergency zawk mah asin maw le, Ropuia ke thir phawrh tur ai hi chuan tihte ka ngaihtuah pek a! Thih leh dam thil a ni tawh zawk si te ka ti vel a! 

“Pathianin min chhang lo,” tia rawn vui thin hi ka tawng teuh tawh. An dil tam tak chhanna an hmuh teuh tho ngaihtuah thleng tawh lo a, eng emaw bik chhanna an beisei, an dil anga pek an nih nghal lem loh tuma vui tawngkam a ni thin. 

Tawngtai hi kan tih tur a ni. Isuan tawngtai turin min ti. A chhangtu tur chu Pathian a ni. A thu em em zui! Kan thu lo em! Isua ngei pawh khan thihna khawp hiala a lungngaih lai khan dil a nei a; mahse, “Keima thu ni loin nangma thu ni rawh se,” a tih tak kha maw le! Heti thlapa a thuzia pawm chunga tawngtai hi chuan vui a har ngawt ang.

Pathianin kan dil ang taka min chhan hi a tam em em a. Kan dil loh malsawmna pawh min pe fo zawk. Tawngtai dan rilru leh kan dil a dik loh hian a chhanna thuah kan vui fo mai.

Tawngtai zawng zawng hi a chhang thin an ti. 

Chawplehchilha kan dil ang chiah, “Aw le,” tia chhanna min pek nghal a nei a. A chang chuan nghak hret tura min duh tum, a tira chhanna kan beisei aia tha zawk fea min chhan zui tur atana a khek rih a awm thin bawk a ni awm e. Dawhthei taka nghah fan fan ngai Pathian a ni fo. A chang chuan kan dil ang chiah min pek dawn miah loh tum, “Aih,” a tih tlat chang a awm thin bawk.

“Aw,” tih emaw, “Lo nghak lawk la,” tih emaw, “Aih,” tih emawa min chhanna zawng zawng chu engkim hretu, keini aia fing zawk, lal zawkin min chhanna vek a ni tih pawm a tha. Kan duh ang apiang hi kan tana tha ber turah min ngaihsak lo thei.

Kan dil ang chiah kan hmuh loh hian chhang lo kan inti thin. Kan dil dik loh avanga hmu lo thin kan nih thute pawh min hrilh tawh kha. A diltu dik loh avanga hmu lo thei kan nih thu pawh Thuthlung Hlui lamah a lang. Kan tawngtaina a ngaihthlak theih tura keimahni lam inchinfel phawt, sual sim phawt a ngaih thute a awm bawk, lehkhabu thianghlimah hian. Dil ang hmu tur chuan, “Keimaha in awm reng a, ka thu nangmahnia a awm reng chuan,” a tih lawk sate kha theihnghilh a awl thin!

Paula leh Isua thil dil pawh, an dil ang chiaha a chhan loh lai khan keia dilte chu min pe lo ve fo ang, ka sual ropui si! Min pek tam tak karah hian!

A duh leh Ropuia thisen thlum a tihniam nghal ang a, Laldinliana Varte leh Machhantea zunthlum chu a tihniam ve rih lo ang a! A thu ber.

 Pathian kan ring a, kan tawngtai tak tak a nih chuan, a thuzia, a lalzia, a finzia, min hmangaihzia pawm tak tak chungin a duh duha a rel apiang lawm taka pawm tura rilru inbuatsaih chunga tawngtai mai hi a hahdamthlak ber. 
    A nih loh chuan beidawn a awl aw, ‘ka tawngtaina min chhang lo,’ ti thinte u!
    Kan beisei ang chiah kan hmuh loh hian ringtu tha lo bik kan ni tihna pawh a ni lo. Isua mihrinnain a duh a dil kha a hlawhtling bik lo. Isua tawngtai anga, ‘Nangma thu thu nih zawk rawh se’ tia Pathian thu thu a nihnaa intukluh thiam hi tawngtai awmze nei ber zawk a ni e.