Kum 2008 MLA inthlanah khan ram hmasawnna thupui a nei, hlemhletna tihbo tum, mi retheiten lei rem an rah theihna tura hmalak intiam Congress party hneh taka thlantlin an ni a. Chumi hma lawk chuan US president inthlannaah pawh campaign auhlaa kalphung thar (change) hmang Barack Obama thlantlin a ni bawk. Chutiang tho chuan tun hnai deuha India ram state dang inthlannaah pawh development aupuitu leh hlemhletna do ngam tura ngaihten mipui an hip ber zel thin. Hmanni lawka India ram inthlanpui zawh fel taka hneh taka tling Pu Narendra Modi leh a thuihruai BJP/NDA pawh hi an campaign auhla ber chu ram hmasawnna (development) bawk a ni. Modi hian khawpui lian leh hmun kilkhawr ber bera a campaign pawhin development hi thupui berah a nei zel a, chu chu mipuiin an tuipui tih a hria a, kum 10 kal ta chhunga Gujarat hmasawnna chakzia hmutu India mipui hriatthiam theih tur zawnga sawi dan a thiam bakah corruption leh thil dang hmangin UPA sorkar leh Congress hruaitute a bei reng bawk. Tha thlah miah loa thla 9 kal ta chhunga Narendra Modi-a’n India ram dung leh vang suar tluana a veivah thui zawng hi km 300,000 zet a tling a (hemi chhunga Rahul Gandhi zin kual thui zawng chu Km 118,000 a ni thung). Mipui pungkhawm hmaa thusawi bakah India mipui hip turin hmanraw awm thei zawng zawng a hmang a tih theih hial, hmai chhana a thusawi ngaithla pha lote tan TV leh chanchinbua advertisement bakah digital/social media hrang hrang - 3D hologram, callertune, SMS, facebook, twitter leh youtube te a hmang nasa hle a. Nikum September atanga a thusawi ngaithlatu (TV leh radio tiam loin) hi maktaduai 234 an tling a chhut a ni a. Chutihlaiin, Rahul Gandhi thusawi ngaithlatu chu maktaduai 13.3 vel an ni thung. Tun tum inthlan hi India history-a digital & social media hmanga campaign nasat ber tum a ni a, a hmang uar ber pawh Narendra Modi hi a ni. US President inthlana candidate-te campaign beihpuithlak ang chiaha hmun hrang hranga zin kuala a beih chiam avangin political analyst-te chuan tun tumah hian Modi hian inthlan campaign kalphung a thlak danglam dawrh niin an sawi hial a ni. Thusawi a thiam bakah tute emaw ang lo takin a sawina hmun leh a ngaithlatute azirin sawi dan a thiam a, mipuiin an tuipui theih tur zawnga a sawi thiam bawk a, hmarchhak bialah pawh Modi thli a tleh tih loh rual a ni lo. Meghalaya MP P.A. Sangma’n, “Tun inthlanah hian a vawi khatna atan hmarchhak bial mipuiten NDA hi pawm ve ta tih a lang,” a ti hial a ni. Chuvangin, hmarchhaka chengte tan hian sorkar tharah hian beisei a sang dawn tih a chiang reng a. Helai bial hmasawnna buaipui tur tur liau liaua din Ministry of Development of North Eastern Region (DoNER) changtu Retd Gen. V.K.Singh hi politics-ah mi thar a ni a, Minister of State niin External Affairs Minister Sushma Swaraj a pui tel dawn bawk. Sushma Swaraj hi hmarchhak bial hre ve thawkhat tura ngaih a ni a, Mizoram Governor hlui Swaraj Kaushal nupui a ni a. Santosh Trophy-a Mizoram team an champion tum khan twitter-ah Mizo tawng ngeiin lawmpuina thu a ziak nghe nghe a nih kha. Hmarchhak bial state hrang hrangte hi India ram aia ram dang nena inhnaih zawk vek kan nih avangin sipaia a tan laia hmarchhak a lo awm hrep tawh, DONER Minister hian External Affairs a kawp tel hi a fuh phianin political analyst-te chuan an ngai nghe nghe. Chumai bakah Home Affairs puitu, Minister of State Kiren Rijiju hi Arunachal Pradesh M.P. a ni leh zel a. Hei pawh hi inthlan campaign laia Modi-a thusawi thin bawhzuina anga ngaih a ni. Hmarchhak biala chengte hian Bangladesh atanga dan loa lo pem lutte vangin harsatna kan tawk vek a. Chumi hre chiangtu tur hmarchhak pa ngei Home Ministry pui tura ruat a ni hi thil lawmawm tak a ni awm e. Chubakah, Delhi leh khawpui dangah hmarchhak miten hmuhsitna leh tihduhdahna an tawk fo thin a, Home Minister, hmarchhakpa ngei hi a tul anga hmala theitu a ni dawn ta tihna a ni bawk. Ningani kal ta khan Home Minister Rajnat Singh chuan a hnuaia official-te hnenah hmarchhak atanga lokal India ram khawpui hrang hranga chengte himna ngai pawimawh tur leh engti zawng pawha an himna atana hmala turin a hrilh nghe nghe. Sawi tawh angin development tuipui em em mai Prime Minister kan neih avangin DoNER kalphung pawh hi eng emaw chen chu siam that a nih ngei a rinawm. An lo kalpui tawh thin dan han en hi chuan hmarchhak bial hmasawnna tak tak a thlen thei meuh dawnin a lang lo, hmalakna lian tham railways leh infrastructure lama national project 10 tuna an kalpui mekte pawh hian harsatna nasa tak a tawk vek hlawm. Chutiang a nih avang chuan Second Administrative Reforms Commission (ARC) phei chuan tlem lai deuh khan DoNER hi nuai bo a, a hmalakna hi Ministry of Home Affairs kuta hlan a rawt hial a ni. Hmarchhak state hrang hrangten hmasawnna tura kan innghahna bulpui ber, DoNER hi chutiang vel chu a nih mek laiin Minister thar hnuaiah kalphung thar leh awmze nei zawk i beisei phawt ang. A tawpna atan chuan Prime Minister thar hian campaign-a a sawi ang khan hmarchhak bial hi a ngaihsak zui ang em tih rei lo teah a lang thuai dawn a ni. Rajiv Gandhi hnua Prime Minister zingah inthlan campaign ni loa Mizoram rawn tlawhtu awm chhun chu kum khat tling lo Prime Minister lo ni ve zuai pahnih, Deve Gowda leh I.K.Gujral te kha an ni. An hun chhung rei lo tea vawi khat ve ve an lo zin kha kan hlawkpui em em lehnghal a. Narendra Modi pawh hi kan dinhmun dik tak hre turin a lo la zin ve turah ngai ila. Engpawh nise, kan sorkar hian ram hmasawnna tak tak ngaihtuah chunga sorkar laipui a dawr thiam chuan sorkar thar hi Mizoram tan malsawmna a ni thei turah ngai ila. Prime Minister lak luhnaa Congress party Chief Minister dangte leh an hruaitu lawk hote an tel duh loh laia zu tel vang vang Chief Minister, India politician zingah pawh a tlo ber pawl ni bawk kan neih avangin kan hmabak a thim lo turah ngai ila. Kan CM hian mi mal tak paw’n a fak viau niin an sawi nghe nghe. Hindu firfiak pawla lo tel hrep tawh RSS hoin an thlawp tlat PM NaMo hnuaiah hian kan sakhua leh kan hnam a himna zel a pawimawh ber a, chumi vawng nung zel chunga hmasawnna kan dawn theih i beisei phawt ang. - Lalthlamuana Ralte