Ramri atana kan pawm Inner Line 1875Ramri atana kan pawm Inner Line 1875 British-in kum 1832 atangin Cachar a awp tan a. A tirah chuan Mizote nen ram chungchangah buaina an nei ngai lo a. Record hlui atanga a lan dan chuan Cachar luah hmasa bertute chu Mizo hnahthlakte an ni a, helai vela hmun, lui leh tlang thenkhat Mizo hmingpu a awm thluah a ni. Mizo lal Seipuia pawh khan Silchar atanga mel 10 lekah khua a lo din tawh nghe nghe. Chutiang chuan harsatna leh intihbuaina nei loin hun eng emaw chen an awm a. Thingpui huan an siam atangin buaina a intan ta a. Mizote ram chhungah an rawn invalh luh tak zel avangin pasalthaten an ngaithei ta lo a, an buai ta fo a. 1867 khan ramri siam a ni a, mahse, ramri pel a thingpui huan an siam belh zel avangin Mizo lalte thin a rim a, buaina a chhuak ta fo a. Kum 1871 January leh February chhung hian Cachar-a Mizoram dep thingpui huan tam ber chu Mizo pasalthaten an run hman a. Tuirial chhak lama awm Sailo Lal Bengkhuaia pasalthate sap pakhat an kaphlum a, a fanu Mary Winchester (Zoluti) pawh an man a. Chuta tang chuan sapho pawhin ramri chinfel an duh ta a. Bengal Eastern Frontier Regulation 1873 hnuaiah sorkarin Cachar district chhim lama Lushai Hills ramri chu a chhuah ta a ni. Tichuan, kan sawi fo thin Cachar Inner Line, 1875 hi BEFR,1873 (Regulation 1 of 1873) Section 2 tlawhchhana chhuah a ni a. He regulation,1873 section 7-naah hian Mizo khua leh tui dik tak lo chu Inner Line chhim lam, Mizoram chhungah in hmun-lo-ram neih phalsak an ni ve lo. Hei hi Mizo lalte pawhin an pawm thlap Assam (Cachar District) leh Mizoram ramri chu a ni. Inner line 1875 hi ramri a ni a, chhinchhiahna piller 46 phun a ni nghe nghe. He mi line chhung lam (Cachar) ah zel hian British India Army Frontier outpost an dah thluah bawk. A nihna takah chuan 1870 vel atang tawh khan ‘Inner Line’ angin Sapho chuan an hmang tawh a, an mite Mizoram a luh an lo khap tawh. Inner line 1875 siam dawn a Assam Chief Commissioner lehkha lo ziah dan atang a a lan danah chuan Inner Line 1875 chhim lam ram chu Lushai tribe ta a ni (Assam Chief Commissioner Office Note No. 87 dt. 4.1.1875) Sapho record hlui leh mithiamte thuziak atanga a lan danin Mizoram leh Cachar inkar ramri chungchangah hian tunhmain hnam dang an inrawlh ngai lo a. Mizote leh Sapho chauh an inrawlh thin a, cachari-ho emaw, bengali-ho emaw pawhin thawm an nei ngai lo hrim hrim niin a lang. Tlai khaw hnu, India hnuaia Mizoram rin luh a nih hnuah chauh helai ram zau tak hi Assam sorkarin a hauh a ni. Zirlai pawlte leh pawl thenkhat ramri ngaihven deuhte chuan Mizoram leh Cachar (Assam) ramri atan 1875 Inner Line chauh hi an pawm thu an sawi thin a. Hei hi Mizo mipui pawm ramri chu a ni pawhin a lang. May 27, 1988 khan Mizoram sorkar cabinet pawhin 1875 ramri (Notification of 1875) hi Assam nena kan inrinaah a pawm thu a puang. Assam-in an tanchhan 1933 ramri hi chu Mizo aiawh tel ve lohna a nih thu an sawi nghe nghe. State kan nih hnuah ramriah inhmuhthiam lohna a awm zauh zauh a. March 3,1988 khan Under Secretary, Border Area Development, Department of Assam leh Revenue Department te ramri chingfel turin an meeting a. Chumi hnuah April 4,1988 ah Director, Land Revenue & Settlement dept., Mizoram leh Director, Survey & Land Record, Assam te an meeting leh a. State pahnih sorkarten December 1988-ah ramri chungchanga ngaihdan inang lo 1875 ramri leh 1933 ramri chungchang sawi dun leh tura tih a ni a. Mahse, tun thleng hian sawi fel a la ni ta chuang lo. Mizoram Revenue Minister in (D.O. Letter dt. 14.6.1993) Assam chief minister hnenah political level-a ramri sawi fel rawtna a thawn a. Mahse, Assam chief minister-in 23.6.1993-a a chhannaah chuan ramri chin (ground demarcation) chu Notification of 1933 a nih avangin official-te sawifel turin a rawt thung. Chutianga inbiakna tur boruak a inmun lai chuan August 1993 ah khan D.C. Cachar-in Vairengte a Taxation department building tichhe turin order a siam a, chu chu Aizawl D.C.-in a lo hria a. Mizoram chief minister in Assam chief minister hnenah lehkha a thawn nghal a. February 6, 1994 khan Union home minister hoin state pahnih chief minister meeting koh a ni a. Ramri buai chingfel turin Deputy Commissioner/Chief Secretary level meeting neih turin an rel a. Chumi hnuah DC level meeting leh Chief Secretary level meeting neih a ni a. Thutlukna mumal siam a ni lo a, Mizoram sorkarin Cachar Inner Line 1875 a pawm laiin Assam-in Inner Line 1933 khatih laia Lushai Hill District hmar lam huam tel (North Eastern Area Re-Organisation Act,1971 leh MNF Accord,1986 leh State of Mizoram Act,1986-in a nemngheh) anga kalpui an duh thung. State pahnih CM te meeting hun atan ni 31.5.1994 ruat a ni a, a hmun atan Aizawl tih a ni bawk a. Assam lamin an thulh zel avangin meeting hi a tlawlh ta nghe nghe. Inner Line 1875 hi Mizote pawmpui ramri awm chhun a nih avangin a hnu a ramri siamte hi chu engti zawng maha pawm theih niin a lang lo. Ramri buaina chungchangah hian ni 15 leh 17 July, 1986 khan state pahnih I.G.P ten meeting an nei tawh bawk a. Chutah chuan buaina a chhuah pawhin armed police te hman loh tur tiin an rel a. Chumi hnuah chuan ramri buainaah silai puak lo zawngin hmalak a ni thin a. Tun hnaia Assam sorkarin zirlaite a kah khan he thurel hi an bawhchhia tihna a nih chu. Engpawh nise, kan ram chin hi sorkar hian hauh na ngam se, anni lamin an hauh na ropui si a, tih hi mipui duh dan niin a lang.