Chawlhni hmasa (11-8-2019)-a KA HUANG a chhuah loh avang khan 15th August-a mitthi vuinaah min zawt sup sup mai a, ka leh zah lek lek nia. ZALEN pheka ka thiante pahnih, DOCTOR-te hi chuan mipui tana thil tangkai an chhuah a, kei VE hi chuan tangkaina reng reng nei lo, thu vanuk mai mai ka chhuah a, a chang phei chuan ka inthlahrung deuh thin. ZALEN chanchunbuin KA HUANG min pek ve avang chauhin ka intineitu ve mai mai a ni.

Tun tum chu keimah rau raua ka tawn hmasak BER ka’n ziak khawm teh ang. (1) Sava ka perh thlak hmasak ber chu tiktik a ni. Sava te tak te, zungchal hmawr tiat emaw hi a ni, Vankunga (RIP) nen nau awm pahin thlikthliekbawm tlan kan chang a (Saihlumte hi 300-te kan ak thin), vawi tam kan perh hnuah ka saihlum nen a intawng fuh palh a ni ber a, ka han lawm em em khawp a, nau awm lai theihnghilhin kan zuk zawng a, kan hmu thei lawk lo lehnghal. J-a pain arpuiin a ai nia!

(2)Ka awh hmasak ber chu Ramparva a ni. K’u Sena (P.S.Chongthu) te phal lo chung, ka pain, “Hruai ve mai rawh u,”a tih avanga tel ve (tel pawh a tling lo, hla deuha zui) chauh ka ni. Thingvawkpui hnuaia kam pawh an phal lo a, a chhak deuhah min kamtir a, engtin tin emaw chipte thang tiat vel hian ka kam ve a. A tuk chuan kan zuk en a, ka u-te thianza thang chu a per lo vek a, ka thangah chuan... kha... leng lo chung chungin a inrawlh a ni chek em ni, a kurkumah pawh lang loin a lo awk a, a ngul a kul lo deuh avangin ka han en chiang a, a kurkumah chuan a lo tang niin, ka lawm lutuk chu ka zuang zawr zawr mai a ni. Sikul huan kawr ni danga ka zuan khum ngam lohte chu ka zuan khum vel maw le. Ka u-te ho pakhat mahin an awk ve si lo a, an awt teh asin!

(3) Ka kah thlak hmasak ber chu 1944 kha a ni. Kum 15 ka nih chu. Sialsukah Sailam kawng lamah U Vana’n min hruai a, kan 12 bore silai mak ka pu ve a, min chantir a. Rei fe hnuah chuan kawlhawk pakhat hi a lo fu ta lup mai a, ka tin vang vang a, ka han hmet ve bawk a, a tlawlh zel mai a, a tawpah a mu ka thlak a, ka’n hmet leh chu a puak ting ul mai a, a tla ta a, ka zuk kal a, a lo dak uak mai a, a lu a ka vuak chuan a keh ang a, tar tur ka nei lo ang tih thlengin ka ngaihtuah a, a tukkhumah chuan na vak lo hian ka vua a, a tawpa tawpah chuan ka chaih hlum ve ta hram a. Ka thelh teuhzia chu, a mu pakhatin a thla ki rih a deng tliak hlauh mai lek hi a lo ni a. Min hruaitu pawh ka nghak tawh lo, in thlen ngawt ka nghakhlel. Tlangnal bulah Pu Hrangchina (James Dokhuma pa) ka tawk a, “Keimahin in in ka pu thleng ang,” a tia, kan in min thlen thak a, a lâm lut nghe nghe nia.

(4) Kum 1951 February thla khan Mission Veng kohhran biak inah Assembly a awm a, chutah chuan Thalai aiawha thu sawi turin min thlang mai mai a, Pulpit-te chu vanram ang tluk hial emaw kan zah a ni. Dik tak chuan 1951-te kha chuan Biak in kan zah em em a, mahni phei chuan kan lut ngam mang lo thin. Kan thupui tur chu thlan sa... ‘Nula tlangvalte hian Kohhranah eng nge an dawn, eng nge an beisei?’ tih a ni. Pulpit-a ka’n ding chhuak chu MIT HLIR niin ka hmu. Pastor Liangkhaia, Chairman-in a comment dan chu... “Kan tlangval thu sawi chu a tha hle mai; MAHSE, a zak lutuk deuh a ni,” tih zuk nia.

Heng thil hi ka thiltih hmasak ve chu a ni ber awm e.