Aizawl Municipal Corporation inthlan hun chu karleh mai khi a ni ta. Party hrang hrang hruaitute pawhin tan an la nasa a, politics-a inbeihna pawh a nasa angreng viaumai. Social media lamah phei chuan mi mal taka party hruaitute beihna leh sawichhiatna pawh hmuh tur a tam leh ta viau mai.

Karleh maia AMC inthlan kan hmachhawn tur hian pawimawhna tak a nei a, he inthlan result hian kan hma lawka Serchhip biala by-election neih tur leh, kum 2023-a MLA intlanpui (general election) kan neih turah hian nasa takin kawngro a sut rin a ni. He AMC inthlanah hian party mala sawrkarna siam thei an awm ngata nih chuan ruling party an ni emaw, opposition party pawh ni raw sek sek, Serchhipbiala by-election leh kum 2023-a MLA election neih turah hian phur namen loin an phur phan ngei ang. Inthlan pawh an cho zak bawk ang.

Thianpa Awmtea’n, “Engpawh hi ti dawn ila, han phur em em phawt mai ila,” a tih ang deuhin politics pawh hi mind game chi khat a ni ve a, phurna hian kawngro thui tak a su ve tlat a ni. Kum 2018-a MLA inthlanpuiah khan inthlan dawn thleng kha chuan rorel lai, Congress party bawk kha an chak leh mai rin a ni a, chu chu mi tam tak hmuh dan pawh a ni. Mahse, inthlan hma lawkin Congress party-a an palian pahnih - Home Minister hlui leh ministry hmasa lama cabinet minister pawh lo ni tawhte’n MNF party an zawm thut mai a, kha khan nasa takin MNF boruak a sep kang dawrh a, an phur ta em em mai a ni. Lawm luh inkhawm an hman ni phei chuan tlai ni tlak thlengin Hnam Rûn kawtah an lâm a nih kha. Khati tak khan MNF party kha phur thar ta thut lo se, kha inthlanah khan anchak kher ang em? Ngaihtuah tham tak a ni.

Kha inthlana Congress Party an chak loh chhanah khan an zu zawrh vangah an inngai thar deuh emaw ni, tun hnaia AMC inthlan campaign vuakveta an hotute thusawiahhian, “Kansawrkar leh chuan kohhran leh NGO te duh loh thil kan ti tawh dawn lo,” tih te, “Zu zawrhna permit kan pe tawh dawn lo” tih te a ri chhuak ta zauh zauh mai. Zu zawrh a tha tih vangni loin, Congress Party-in dodalna nasa tak kara zu an zuar ngam kha an fakawm viau zawk a ni. Dik leh tha nia an hriatah chuan sawrkar hian huaisen takin ke a pen mai tur a ni reng a, chu chu sawrkar tha zia pawh a ni. Tu party pawh sawrkar se, thil tha nia an hriat pawh dodalna a awm hleka an ti lo zel dawn a nih chuan, sawrkar tha an ni thei ngai lo ang.

Kum 2018 inthlan kan sawi ta sa sa, zu zawrh leh zawrh loh lam ni loin, kha mi tum khan inthlan dawn tepah khan Congress party chhungkuaa buaina kha puak keh ta lo se, lungrual takin inthlan kha hmachhawn ta se, hmeichhe thu dawnin an Senior Vice President te, Cabinet minister hlui te, MLA ni lai leh House Speaker te meuh kha chhuak ta tuk tuk lo se, khati tak khan an tla nasa lo mai thei. Mahse, ‘Chhura duh loh Naa’n nei nang e’ tih ang deuhin, lehlamin an duh loh, sirah an hnawl hnu kha lehlamin lawm takin an lo kuangkuah a, namen loin an mi leh sate an phur phah ta si a, term thum a zawna sawrkar tum kha mawng sawh dawpin an tla ve leh ta a nih kha.

Tun hnaia ‘Kohhran leh NGO te duh loh thil kan ti tawh dawn lo’ han tih leh hnuhnawh hi mipui tihlawm tumna, AMC inthlan behchhana vote zawnna ang lekah miin an lo ngai a nih pawhin a mawh lo ang. Kan rama thil tha lo tak mai chu, kan politician-te hian vote an hmuhna tur a nih dawn phawt chuan, an chakna tur a nih dawn phawt chuan eng pawh an tiam duh zel mai. ‘Kansawrkar chuan hei hi tih ngei tum ila, hei hi mipui hnenah tiam ila, kan ramin hma a sawn phah ang’ tih lam aiin, ‘District thar pek tiam ila emaw, nuai khat sem, nuai thum sem etc. tiam ila, kan tlin phah thei ang’ tih hi kan hruaitute rilrua lian ber chu ni maiin a lang. Vote hmuh tam hrim hrim, tlin hrim hrim hi an tum bulpui ber ni maiin a lang. An tlinna tur a nih dawn phawt chuan thil eng pawh, a taka an tihhlawhtlin theih loh tur thlengin an tiam duh zel mai. Mi khawngaih an hlawhna tur a nih dawn phawt chuan thupha an chawi zung zung a, an inlamlet zung zung a, ngaihdam an dil zung zung hreh hek lo.

Khasi politician lar, Nichols Roy-a kha tum khat chu inthlan campaign-a thu a sawi laiin zu rui mi thenkhatin bengchheng an lo siam a, Nichols Roy-a pek chuandawhsan (platform) atangin chung zu ruiho chua zuk hau mai pek a, “Nangni zu ruiho kha haw vek rawh u, in vote ka mamawh lo. Nang niin min vote chuan vana Vantirhkohte khian min vote duh loh phah ang,” zuk tia maw le! Kan ram hruaitute hian inthlan campaign-naahte hian, ‘In thil ngiat hi chu ram tan a tha lo a, min vote dawn lo mah ula kan tiam thei lo che u a ni,’ te ti ve ngam se, kan ram riang têah hian hmasawnna kawl a êng zawk ngei ang.