Zawhna: Tilpukho hi an pa thei lo nge, chi an thlah thei tho ang em?

Chhanna: Tilpuk kan tih hian chhan hrang hrang a awm ve thei a. Kan rama hnam dang mi, a bikin Bihar state lam atanga lo kal hnathawkhoah hian a common viau a, heng hi a tam ber chu inkaichhawn theih natna chi khat, Filariasis an tih vang a ni a, thosi atanga an inkaichhawn tho a ni. A dang leh chu til chhunga tilmu tuamtu karah tui tling in-drain thei lo a lo awmin a ni a, chu chu Hydrocele an ti leh bawk. A dang lehah chuan tila ril tla kan tih mai, Hernia vang hian a awm leh thei bawk. Heng natna chi hrang hrang, tilpuk (til rawn lian/thang nasa) thlen thinte hian mipa sazu fuk an tibuai hranpa lo va, a len lutuk erawh chuan sazu fuk tur a dal ve thei thung.

“Pa thei” tih tawngkam hi mipain hmeichhia sex a hmanpui thei em tihna angin kan hmang deuh ber a. Sazu a fuk theih a, hmeichhe itna an neih theih phawt chuan an pa thei turah a ngaih theih a. Sazu fuk thei mah se hmeichhe itna an neih miau loh chuan an pa kher lo ve thei tho nia. An sazu a fuk theih a, chi an neih tam/that tawk bawk chuan chi an thlah thei ngei bawk ang. Fa neih erawh kan thu lo em a, insawiselna nei miah lo nupate ngei pawh fa nei thei lo an awm fo a, chutih laiin nau a pai tluan thei dawn emaw ni le tia kan lo hmuh thenkhatte hi fa an nei leh duah fo mai. Pa chawrche cher chhe tak, dawrawm takte hian fa an nei duah fo bawk a, pa tlawntlai tha tak, hrisel hmel tak, fa nei thei lo hi an awm ve leh tho bawk. Chuvangin, chi thlah hi chu chung lam thu a ni e i ti tawp mai ang.