Kumin chu kum tir tê atangin ruah a tla leh thin a, thlasik pawh a liam hleithei lo. Thlasik/Thal laia ruahsur hi a thatna tam tak a awm, boruak khawro lutuk tur a veng a, ramkang a tlem phah a, boruak bawlhhlawh a tleng fai a, boruaka leng natna leh hri leng a tlem phah bawk. Mahse, vahchap pho lai vela khawchhia erawh thingtlang lo neitute tan a pawi thin. Ruah han sur zawk a hnu a khua tha lehnghal a nih chuan a inphoro leh mai a, lo pawh a kang tha tho thin.
Mahse, lei tihnawng khawpa tam a sur a, tun anga kar khat zet ni a sa tha lo a nih chuan lo hal hunah chap a ro tha hman tawh lo ang tih a hlauhawm a. Pamtul mai a ngai fo thin. Nikum hmasa (2017) pawh khan ruahtui a tla hma a, lo hal thei loh vangin lo neitute an mangang hle a nih kha. Kumin pawh hian sorkarin lo hal hun a tuk hi a tihdanglam ngei chu a ngaih hmel.
Kan ramah hian sik leh sa inthlak dan hian chhiatna leh buaina hi a keng tel thin ve reng a. Zep thu a cheng lo kum tin hian chhiatna lo thlen thin hun lai hi a awm a; chungte chu khuarel chhiatna a puh vek chi pawh a ni lo ang. Kum tin hian kum tir lam (khua a thal chhoh lai) hian kangmei a chhuak duh hle a, in kang a awm chang hian a chhan hriat loh a ni tlangpui a, electric kalsual a puh a ni chawk bawk. Chutiang bawkin fur a lo thlen hian leimin, in chim, kawng chhia, tuilian, etc., a thleng ziah bawk.
Heng chhiatna thleng thin tam tak hi chu invenlawk theih niin a lang. Aizawla electric hrui zam te hi a hlui tawh khawp mai a, tam tak hi chu district council hun laia mi daih tawh te kha a ni hlawm a, a inzam hnawk nasa em em bawk. Hrui tha zawk a thlak vek a hun tawh khawp mai. Kangmei chhuah chhana an puh fo electric kalsual pawh hi tam tak chu ven theih dan a awm ngeiin a rinawm. Entirnan, in chhung electric hman dan leh wiring te hi electrician-te endiktir thin ni se : flexible cable/wire-a electric pawh kual dan te, ar vulh ten an hman dan te endik se. Chubakah eirawngbawlna gas thuk leh a pipe, regulator, cylinder, etc., te a khat tawka endik thin ni bawk se. Chutianga hmalak a nih chuan kangmei chhuak a tlem rawih ngei ang.
Chutiang zelin tun ang hun hi furpui lo thleng tur atan hian inpuahchah lawk hun a ni bawk. Kum tin hian May thla atanga September/October thla chhung hi ruahtui tlak tam hun a ni a. Fur laia ruah bawhawk a lo sur hian chhiatna a thlen fo mai a. Leimin, kawngchhia, sabereka khuangkaih/tuilian, leh adangte avangin nunphung a khaihlak kum tin a. Chutianga ruah leh thlipui lo thawk thutin chhiatna a thlen lohna tura hmalak chu a ngai a, tun hi a hun lai tak pawh a ni. Khawpui chhunga kawr leh lei te, kopang lungrem min maithei te endik ni se; in sak lai leh kawng siam lai te endik a, leimin thlen thei tur chi a nih leh nih loh endik a hmalak a hun. Khaw chhung mai bakah khaw kar kawngte endik a, min hlauhawm leh lei tawlh thei tur te zawn chhuah a, a venna atana hmalak a ngai a. Tuichhe paihna, vawk in thli lei timin thei tur te pawh endik a, chhiatna a thlen lohna tura hmalak hun tak a ni.
Sorkar hian khawtlang enkawltute phungbawm a sawm in hma a lak chuan furpui lo thleng tur hian chhiatna a thlen lo thei hialin a rinawm. Fur a lo thlen dawn hnaih a silpoulin lei khawl chiam bak hi kan kal pelh a hun tawh. Nikum leh kum hmasa anga ruahtui a tlak that leh phei chuan tawng thu chhe loah, kan buai leh viau ang tih a hlauhawm hle a ni. Tunhmaa kum tin Bangladesh-in tuilian nasa taka a tawrh thin pawh kha a invenna lamah beihpui an thlak avangin an chhiatpui tawh ngai lo.
Thil dang dang sawi kai zel ta ila. Tun hnaiah cabinet-in sorkar hmunhma leh sorkar suma hmalakna te chu mihring damlai hming puttir loh tur tih an rel thu kha kan lo hria a. Thil tha tak a ni. Ministry hmasa khan an hotupa hming puttir kha an uar lu deuh hret a, mi tam takin an lawm lo reng a ni. Hmuifanga phul mawi taka in an sak tuar te saw a pawi ang reng a, chumai bakah Lallianvunga hmun ni reng thin tu emaw hming puttir daih te kha a fuh lo a ni. Kan hmunhma leh vantlang thil (sorkar in leh hmunhma) lian tham kan neih te hi kan hnam tana mi pawimawh Mizo pasaltha leh lal ropuite hming puttir nachang hriat deuh deuh a ngai khawp mai.
Kan khelmual tha ber vai hming (Rajiv Gandhi Stadium) an puttir daih pawh hi thlak leh a tha. Sailo lal ropui, Aizawl tlanga lal hmasa ber LALSAVUNGA KHELMUAL te ti ta se a inhmeh ngawt ang. A hming phuahtute hi tuna rorel lai (MNF sorkar hmasa) tho hi an ni a, thlak leh mai se a tha ngawt ang. Chutiang zelin kan hnam indin chhohna atana mi pawimawh tak tak lal huaisen Lalburha te, Vanhnuailiana te, Hausata te, Nikuala te, Ropuiliani te emaw pasaltha hmingthang tak tak te hming hi thangthar zelten an chawisan zel theihna turin kan hmunhma leh vantlang thil lian hoah hian vuah zel ila.
Aizawla Bazar pui dang kan mamawh thu hi sawi kai leh hram ila. Sorkar thar hian hmalak a tum viauin a lang a, traffic jam tihreh a tul tluk bawkin bazar lian tak dang pahnih tal kan mamawh. Hman deuha Aizawl hi a mi cheng zat (population) atanga chhutin khawpui lian (City) a tling tawh an tih rual khan town bus pawh city bus ti a thlak nghal a nih kha. Khawpui inrelbawlna/sorkar (Municipal corporation) hial kan nei tawh bawk. Chutihlaiin, mihring nuaih li vel chenna ni chung si a bazaar lian pakhat chauh a awm hi a inhmeh vak lo. Bazaar pui ber lah hi ruahmanna mumal awm miah lo a ni a, chawhmeh/thlai zawrhna te, thawmhnaw zawrhna te, sa zawrhna te, secondhand zawrhna te, thingpui dawr te hi a inluhthelh a, a inpawlhsawp kual nuaih mai a nih hi. Smart city kan tuipui viau lai hian kan bazaar vel hi a smart lo khawp mai.
Khawpui hmasawnna tura hmalatute leh ruahmanna hrang hrang buaipuitute hian bazar dang lian tak, changkang tak ngaihtuah tel se. Khawpui laili a engkim dah khawm duhna te pawh hi paih bo a hun tawh khawp mai. Khawpui fem deuhah te hian bazaar lian tak te hi awm ta se, khawpui zauhna atan pawh a tha viau ang. Ram awl a vang tawh a, hmunhma tha tak bazaar lian tak dawl zo tur pawh a vang tawh viau maithei. Falkland vela hmunawl awm thinte lah mi hausate an invalh zo leh tawh si a. Khawpui than zel dan ngaihtuah hian a laili a inek beng chiam hi a him lo tial tial dawn a. Chuvangin bazaar hmun tur pahnih vel tal ruahman lawk a hun khawp mai.