Dr Hrekima Titi

TLANGVAL HUATTHLALA

Dr. C. Lalhrekima - Sep 12, 2021

A rilru na a intihlum a nih chuan a thisen mawh chu i chungah a tla khawp ang!

Tlangval huatthlala, hmangaihna tihmingchhe thintu chi hnih ka hria. E, chi thum pawh a ni thei e! A chi khatna chu: Nula ngaih phet tum, hlawhtlin veleha tlansan ching leh si thin hi. 

Tlangval, ‘Di nei lo Pawla’n a sai an ti,’ tih culture kha hunin a liampui tawh asin! Mahse, hmangaihna chhuanlama nula kar i la ching a, ‘Hmangaihna chu a inhlan famkim thin’ tih changchawiin tleirawl lung mawl bumin a thianghlimna chu tihchhiat phet i tum a. Hmangaihna leh sex chu kal kawp ngei tura ngai thin hmeichhe rilru tha chuan a awih ta mai a. Mipa thinlungah hian sex leh hmangaihna hi a kal hrang thei tih a hre der si lo. 

A mawlna chu remchangah i la a, a hmangaihna che chu nawmsip bawl nan i hmang hreh lo a maw? Hmangaih belh sawt tura i insawi tlat avang khan tleirawl hmangaihna thlahlel chuan a ringhlel phal ta lo che a. In lo khati kha a ni a. 

Mahse, karei maw! I duh i hmu ta cheng a, i tum i hlawhtling ta ngei a, hmangaih sawt tura intiam si khan i hlat ta hret hret si maw? Chenna ngai lo ram thar fang leh turin hnutiang i chhawnsan leh si maw? Ui puar koh an sawi ang maiin i kal bo ta nal nal mai a nih kha. 

Hei zawng a dik mawlh lo. A thianghlimna, a hmangaih tana a lei khek chu hmangaihna avang chauhin a hlan che asin! I tana a inhlanna hrethiam lo tawk vel hian i lo mawl si a, hmeichhe thianghlim tichhe duh tawk vel hian i sual roh a nih si hi maw le! A rilru na keh chhe puak ri hi a ring thin teh asin! Hmangaihna hi a tan chuan thil tenawm a lo ni ta a, mipa zawng zawng hi a ring ngam tawh lo fo a, dam chhan tur a van ruai tawh thin. 

Nangmahni ang hi alawm, tlangval huatthlala chu! Hmangaihna tih tawngkam hlu leh ril lutuk mai hi in tithangtlawm a, in tihmingchhia a, in titenawm zo ta a nih hi.

I rilru tenawm hi hmu tlang thei lo tur khawpin a hmangaihna mit chu a del ve a ni si a le! Hmeichhe rilru thianghlim tan hian sex leh hmangaihna chu lak hran theih loh a ni asin! Nangmah ang mipa rilru danglam tak, hmangaihna tel miah lo pawha sex hmang thei thin thinlung hi hmu tlang se a heti bik lo tur. Mahse, a tawpah chuan a hmeichhia zawk chan a chhe leh thin si. An lainatawm asin! 

I demawm a ni. Khawvel hian a dem che a ni. I then leh dawn tho a nih chuan engati nge a par mawina hi i thliah kher le? I duh zui leh dawn loh si chuan kar kar lui tawh teh suh. Nagmah avang hian nula thianghlim chu a bâl zo ta a, i rilru tenawm avang hian a chingpen zo ta si!

A rilru na inchhir lungchhiain tih loh loh tur a tih a, ngaidam theitu ngaihdamna a chan hmaa mahni nunna hial laa fam khawpui a lawi a nih ngat chuan, a chan tur chu a chhe khawp ang! Chu hmuna thawn luttu chu nangmah i ni ngei dawn si a, a thisen mawh chu i chungah a tla khawp ang maw le! I phur zo dawn em ni?

Ngaihzawng i nei a nih pawhin, ninhlei viau teh suh. Kan thil duh em em hi chul chul a, khalh khalh kher hian thlauh keh a awl zawk a nia! I duh a, i hmangaih a nih tak tak chuan palai tir la, nupui atan nei mai rawh. Puithiam hmaa, ‘A nuamah pawh, a hrehawmah pawh,’ tia in dam dun chhung atana nei tura thu i tiam zanah inthlahrung hlek lovin i ninhlei dawn nia! Tuman kan dem lo ang che. 

Tlangval, thurawn pe ve dawn khanglang ta che ila i dawngsawng duh ang em? Hmeichhia hi duat ve la. An rohlu ber hi dam chhung atana i duh a nih si loh chuan laksak tawh suh. Hmangaihna hming hi zawng tichhe lul tawh lo teh. Hmeichhe tana virgin a hlu ang tho hian, mipa tan pawh virgin hi a hlu asin! A vanram kai chaw zawk. 

(You give love a bad name, A HO TLAT! phek 228 - 230)

Share now