Tlangval huatthlala chi hnihna, tlangval tenawm chu: Nula rai zet a, an mualpho loh nana nau titla tura nawr zui leh ching si thinte hi! 

Nula mangang tam tak, thih duh hial khawpa lungngaia indawm kun, kal ngaihna hre loa puitu tur zawng thinte manganna chu, “Ka rai a: mahse ka bialpain nau titla turin min ti a,” tih a ni fo. Sual tih hnua tihsual nawn an hlau a, Pathian pawisawina rapthlak tak chu tih loh an duh tawh a, pum chhunga naute nunna chu an zah a ni. Mahse, an beisei loh dana nawr an ni mek si!

A then phei chuan, “Min then nghal a, min rawn tibuai tawh suh a ti,” tih te, “Ka fa pawh a ni lo ang a ti tlat a, amah bak an awm si lo,” tih te, “Ngaihzawng dang a lo nei reng a  ka rai tih a hriat veleh a bialnuin min rawn bia a,” tih te, “Ka dinhmun min hriatpui la, mualpho thei ka ni lo, rawngbawltu ka ni ve a, nau chu tihtlak ngei ngei a ngai a rawn ti,” tihte chu tap pur chunga an sawi thin zuk ni a! Thih loh chu kawng dang awm tawh loa hretu pakhat chuan, “Ka tihtlak loh chuan a mualpho dawn a, mualpho ai chuan intihhlumah min vau a, rawngbawltu a ni si a, a mualpho ai chuan keimah zawk ka thi mai ang, nau ka titla ngam si lo,” zuk ti a! A rapthlak thei asin! 

Thian chhan thih ngam Mizo tlangval an tam laia tualthat duh khawpa dawihzep an awm a nih chu! Hetiang tlangval ‘h..’ ve si, dawihzep si ho hian kan khawvel hi an ti\awp zual a ni. An tenawmin an zahpuiawm a ni. Nula an nawr a, an kar a, an thiam tinrengin an thlem a. Nula virgin ngat chu khirh tak an ni vek, an hmangaih viaute loah an inpe pumhlum phal ngai lo thin tih hre ranin hmangaihna an tawktarh a. Hmeichhe rilru hneh dan awlsam ber chu hmanruaah an hmatheh thiam ve tlat si. Mahse, karei maw! An hmangaihna sawi ve chu an tisa châkna a reh rualin a reh zui a. Harsatna leh mualpho hlauhnain a hmet zawp der thei nia! 

Nula sawn paite rilru hi a buai teh a nia! Thil satliah leh holam, pal bawrh bawrh theih a ni teuh lo mai. Kalpui a ngah lutuk. Mahse, hmangaihtu leh an lama tang tlat mipa an awm chuan an paltlang thei thin. Mi chak lo, humsual dai ve thei an nih avangin an lo pal baw deuh a nih pawhin, hliahkhuhtu tha an neih chuan khawvel an hmachhawn ngam hram hram fo. Mahse, mipa hming pawh pu tlak lo khawpa dawihzep leh tenawm avang chuan an khawvel chu a buai zual zo ta vek thin si. 

Tlangval, Pathian pawi sawia tih loh loh i tih tawh hnua sual rapthlak zawk ti tura nula i kar hlawhtling a nih pawhin, tunah mualphona pumpelh mah la i nun khua a tluang zui chuang loin ka ring tlat a nih chu! I tisa châkna sosang hi i demawm lem loh, mihringa bet a ni ve alawm. I inthunun zo lo hi erawh a demawm a ni, i thunun theih tura thilpek i dawn a ni a sin! I lo che sual a nih pawhin khawvel hian a dem viau lo ang che, mihring chak lo i nih ve bawk kha. Mahse, i chetsualin a hrin harsatna tlansan leh duh si khawpa i dawihzep hi chu ngaihthiam theih a ni lo. A hnua thil thleng thin hi a rapthlak thei em mai! Tualthahna!

Sex hman hian a rai theih tih hriat tur. Thil thleng thei hre sa vek chung leh huaisen taka hmachhawn huam sa hian thil hi tih thin tur a ni. 

Kan dawihzep a nih chuan dawihzep hun leh hlauh tur dik a awm e. Kan thil tihin a hrin chhuah hmachhawn ngam leh lo tur si khawpa dawihzep kan nih dawn chuan, kan tihsual hmain dawihzep sa tur a ni zawk. Dawihzep hun tha a ni ngai e. 

Mualpho leh zahthlak leh lei nun hrehawm hi a hlauhawm ve tho e. Chu aia hlauh tur dik zawk a awm thung. Lal Isuan, “Taksa tihluma thlarau tihlum thei lotute chu hlau suh ula, Gehenna-a thlarau leh taksa tiboral theitu chu hlau zawk rawh u,” a ti aw! (Matthaia 10:28)