Khawharna Cabin nghâktu Marini: Vawiin tlai hian tû emaw chu khawhar tak leh lunglêng takin a awm ngei ang a; a ngaih êm êm, sâwta mi Thantea chuan amah chu a rawn dàwn ve vawng vawng a ring a ni—ni rawn lang leh sêt sêt thin kâra ruah la hmî seng seng ngawi renga a pindana thlîr rengtu Marini chuan.

A ni alâwm, Marini chuan chû nî leh ruah indo chu an nun angah a’n khaikhin leh ngawt thin: ‘Ka beiseina chu ni êng ang chauh saw; mahse, ruah a la chak zâwk si a. Inhmu a, kan inkâr sawi fel tûr hian min lockdown hnan hmiah mai si a…’ ti ten a ngaihtuah zui neuh neuh a.

Ni e nimin, Thawhtanni khân, Instagram leh Facebook atanga a thian chhar, a hnua WhatsApp thleng thlenga a biak zui tâk; a taka a la hmuh loh; chhas nei lo Thantea nêna an inkâr chu, hmai chhan ngeia sawi fel an lo tum lâwk ve dîm diam tawh a ni.

Mahse, Aizawl khawpui chhûngah Total Lockdown puan a ni ta thut si a. Lungawi lo fein heti hian an awm ta ngawt mai a ni. A chhan bera chu: ‘A taka kan inhmuh hmâ chu, online-a inbiak awih tawh rih loh,’ tia rawttu kha amah, Marini hi a ni si a. A thil rawt thlâwpa zâwmtu lah, an inhmuh theih hun tûr, sorkar-in lockdown a hlih hun nghâktu Thantea a ni bawk si. Khawharna chu a ta neih a; lunglên vawng vawngna chu a chanvoah a ruat ta—‘Khawharna Cabin’ nghâktu Marini chuan.

Pa Bawiha: ‘Â-pâ, eng nge kan chawhmeh hi? A va mak êm êm!’ tia a fapa kum li mi zawhna chu ni tina inhlawhfaa chhuak ziah thin Pa Bawiha chuan chhân harsa a ti ngawt mai. Chutah, a rin phal loh; mahse, a rin lâwk deuh roh angin a fapa hrawk zâ chu a khuh kherh kherh ta ngei. Mahni fate dâwt hrilh a duh ngai si lo. A nu kha la dam se, Pa Bawiha chuan a va’n ti tak!

‘Mâma, Dawl hnah kan a nih kha,’ a ti ta ringawt a. ‘Engati nge…!?’ tia thlê há chunga amah entu a fapa zawhna chu chhân harsa a va’n ti zâwk tak!

Alu ngaina êm êmtu a fapa tân Alu leina man a nei ta si lo—lei tûr a vân tâk êm avângin a to tawh si a. Chutiangin kâr khata vawi khat pawh a hmehpui phâk ngai loh sâ aia tui a tih zâwk artui pawh. Total lockdown hmâ, truck lianho kawng chhia avânga an tân hmaa plate khat chêng 180/- ni thin kha tûnah chêng 300/- pawn a awm tawh dêr si lo. Sorkar-in inkhârkhip a puang thut bawk nên, a fapa zawhna, ‘Engati nge?’ tih chu, dâwt tel loa chhân chu a harsat ngang a ni…

Lucy leh a chhûngte: Harh chhuak loa dam suala damdawi in ICU-a mu bel, kum 12 mi lek Lucy oxygen bûr chu a ruak leh ta dêr mai. Natna khirh tak tuara mu reng Lucy ai mah chuan a chhûngte tân chuan inkhârkhip hi a rit lutuk tlat!

Vânneih asiamin, tih chî chu a ni hauh lo ang—ICU-a Lucy awm, inkan hleih theih loh hi. Inriahpui leh châw inpêk takngial pawh a buaithlâk ta vek si a. A nu chuan a fanu Lucy oxygen bûr ruak chu a’n thlîr a. An chhûngkaw sum hnâr ber an pa dâwr khâr a ngai leh ta si. A ngaih hmâ pawn mi an tlêm a, inhralh a harsa tawh a nia. Chûng chu eng pawh ni se la, dam suala thaw hrâwk hrâwk, ni-khua pawh hre tawh lo; keinin hnâra boruak kan thâwk luh ang khamkhawp ve lo, a fanu Lucy kut chu a nu chuan a’n vawnsak leh gawt thin a. ‘Lalpa…’ tia Pathian koh mai loh chu tih theih neiin a inhre tawh lo a ni.

A chhe berah, ‘Min lo kalsan ta se la,’ tih thleng thlengin a’n dâwn kual a; an in atang ngeia vui liam theih a ni dâwn lo. YMA hall emaw Kohhran hall emaw hman a ngai dâwn, tih te a’n ngaihtuah thleng a. Tisa leh rilru lamah rethei hian a va’n inhre tak êm! A û leh nau, a nutei leh a putea te zawng zawng, Lucy thenrual tha, amah kana rawn thutpui duh ve êm êmte pawh chu, chhuah khap an ni si a…

Task Force hruaitu Pu Liantea: Total lockdown hmasa zâwk khân an vênga chuktuah huan nei tha ber pâwl Pu Liantea, an Local Council President ni bawk chu a hah ngei mai. Sorkar hnâ a thawk lêm lo bawk a; mitiri niin a thiam hle thung. An nu erawh chu sorkar hnuaia Anganwadi teacher a ni. Chûng atanga an hlawh ai mah chuan an chuktuah huan chu an chhûngkaw ei bêl ber a ni mah zâwk. An hlawh chu vêng chhûnga mi harsa zual tân; tû ma hriat lohin, puangzâra thlalâkpuia social media lama post darh kher loin, a rûk tak meuhin an sem zo zêl thin.

Mi thenkhat, an vêng Local Council member, an party mi leh sa lo ho chuan, ‘Ani ang, sorkar hnâ pawh thawk lo, mi hman lutuk, Task Force-a intih thû bâk tih tûr a nei hlei nêm!’ ti ten an lo sêl hlawm pek a. A ûksak ngai lo—Pu Liantea chuan. An party hruaituten tûn tum Local Council inthlana ding leh tûrin ti chiam mah se, Pu Liantea chuan mi dang ken a tum tawh zâwk. Vêng a hmangaih loh vâng ni loin a hmangaih luat vâng leh thalaite hma khua a ngaih zâwk vâng a ni.

Mut hmunah chuan Pu Liantea chuan an nu bulah, ‘Nu-i, inthlan a hnai a, kan thuneihna a tâwp ta. Ka âwl ve dâwn ta e, tûn tum chu,’ tiin a’n hrilh a. An nu chuan, ‘Mami pa, Local Council inthlanah ding tawh dâwn lo mah la, i dina i tlin vâng emaw, hruaitu i nih vâng chauh emawa mi dangte tâna malsâwmna ni tûr kan ni hlei nêm. Chhan emaw ‘khelh’ neih vâng emawa thil tha ti tûr kan ni lo e. Khu, kan iskût pawh khu la sên deuh hlawm mah se, an ei tham ve reng tawh a nia,’ a ti sê sê a.

A tûk zîng khuantevîka thoin an chuktuah huana iskut sên chu an nupain an zu lo a; chanchinbu hluiin an tuam a. An thenawma ni tina inhlawhfa thin; tûna inhlawhfa thei ta lote kawngkapui bulah chuan an dah ta zal zal a.

Anni nupa chuan ‘an mahni dah’ a ni tih an hriat an duh lo; mahse, chu mite chhûngkua chuan tute dah nge a ni tih an hai dâwn chuang si lo…