Hmân laia Mizo Pasalthate kha sa kâp thei, raldona a huaisen leh mi hrât khawkhêng, khawtlangin a thlamuanpuite an ni thin. Tunlai hunah erawh pasaltha hrilhfiah dan pawh a lo danglam ta, sa kâp thei leh ral dova a tul huna che chhuak thei kan mamawh tawh lo. Pasalthate kha midangte aiin an danglam bîk avangin an lawr bîk thin a, mite chawimawi leh fak phut vanga thawk an ni lo. Midangte dai loh ram daia a hniak tam lohna lam huaisen taka zawh thin mi an ni a, khawtlangin an thlamuanpui hle thin. Tunlaiah hian Pasaltha ni turin kan hma zawn theuhah tih theih kan nei, kan ram kan hnam, kan khawtlang tan thangchhuah thei turin theihna kan nei vek. Nang eng nge i tih ve theih le?

Tun ang huna Pasaltha ni tur chuan silai neih a ngai lo va, dan lova silai nei phei chu thlamuanpui tham an nih loh chu sawi loh man theih hial an ni ta! Thil a lo danglam zo ta a, tunlaia pasaltha nih theihna ber chu eng nge ni ta ang le? Ram leh Hnam, Kohhran leh Khawtlang tana thlamuanpui tlâk nun kan nei em? tih hi mahni inzawh fo a va tha em. Hmânlai chuan Pasalthate kha khawtlangin an thlamuanpui a, tunlaia pasaltha ni tur chuan phut let nei lova tlawmngaih chhuah te, dikna leh rinawmna nunpui te, mi tangkai nih tum te, mi huaisen nih te leh adt hi pasaltha nihna tur atana nunpui tur pawimawh tak a ni.

Hmânlai nen chuan kan khawsak phung a danglam ta hle a, kan chhungkaw tan pasaltha kan ni em? kan ram leh hnam tan, kan khawtlang tan, kan kohhran tan thlamuanpui tlâk nun kan nei em? Engtin nge chu nun awhawm tak midangte thlamuanpui tlâk nun chu kan neih theih ang? Pasaltha ni tura hlen ngai leh nunpui ngai tia kan sawi tâk nei tur khian tunge pawimawh ber kan tih chuan keimahni hi kan ni. Keimah atanga bul tan that emaw insiamthat emaw midangte zai ngai chung zela a tul huna a hun leh hmun zir ang zela huaisenna neih te, dikna leh rinawmna nunpui tura thlauh thlak ngam nun neih te, thil diklo do let ngam khawpa chan ngam te, phut let nei hauh lova tlawmngaih chhuah te leh a bâk tam tak a awm.

Pasaltha ni tur chuan danglam ngam a ngai a, mitin hian kan nunkawngah duhthlan theihna kawng zau tak kan nei theuh a, a chhe lam leh a tha lam thliar hrang thei vek kan ni. Hmânlai Pasalthate kha a hniak tam lohna lam kawng an zawh avang leh nun huaisen leh tlawm­ngai, mi hrât khawkhêng an nih avangin an danglam a, thlamuanpui tlâk nun an nei reng a, tun­laiah erawh chuan a chhe lam kawng phei zawh nuam kan ti a, a tha lam kawng chho kan zawh peih tawh meuhlo va, kan thil tha tih midangten an hrelo ang tih kan hlau emaw tih mai turin sawi nuam ti ber ber kan ni thin te hi in en let fo kan ngai. Fak leh Chawimawi phut lova a taka thawh chhuah tum tlat mi, kan Pasalthate hniak hnung zui zel tur kan ni tih hi kan hriat nawn fo a tul.

Ram leh Hnam, Khawtlang leh Kohhran tana thlamuanpui tlak nun kan neih theih nân Pasalthate nun dan hi entawn ila, nitin kan nunah hian a tul ang zelin seng luh kan tum ve tur a ni. Khawtlang pawhin a thlamuanpui leh ram tana mi chhenfâkawm ni tur hian mi dai peih loh dai fo a ngai a, phut let nei lo nun neih a ngai a, thil diklo do ngam khawpa huaisen a ngai a, a tul huna chân ngam te, inpekna te a ngai. He Pasaltha nihna kawng hi kawng awlai a ni mai lo va, kawng pik leh harsa tawn ngam a ngai. Pasaltha nun ngaihsanawm tak, midangte pawhin an thlamuanpui nun nei tur hian nang leh kei hi kan pawimawh ber. Midangte tih atana ti mai lovin, kan ram leh hnam, kohhran leh khawtlang tan eng nge ka tih ve theih tih te hi mahni i inzawt fo ang u. Mahni nun theuhah pasalthate nun awhawm leh ropui tak hi seng luh tum ila, midangte tana innghahna leh thlamuanpui tlak nun kan neih theih nân i inzir zel ang u.