Dr Hrekima Titi

TUAI LEH PATIL LEH SEX

Dr. C. Lalhrekima - Nov 14, 2021

Pa-na, nu-na leh mahni nihna hriatna chungchang hi pian hmaa taksaa hormones danglam aiin pian hnua kan nuna thil thlengin a siam tam zawk an ti.

Zhang Weili hneh zawna UFC Strawweight (pound 106 - 115 inkar) World Championship kawnghren humhimtu, America mi, kum 29, Kg 52-a rit, Rose Numajunas kha a lu a kawlh tel mai a. Hnute pawh a nei mang lo emaw tih turin a awm bawr lah chu a pawng nep khawp a. Mipa emaw tih mai tur a ni. 

Ni 6.11.21 zan (keini tana ni 7.11.21 zing) a Zhang Weili nena insual tura a lo chhuak ka hmuh chuan tute emaw angin hrechiang hawt loin ngaihdan ka’n nei ve nghal ngawt pek a. A pa hmel em avang chuan a anpui ngaizawngin nupui a neih ngei ka’n ring thla rawk a. Ka bula mi chu ka rin dan chu ka’n hrilh ngawt pek a! 

Insualna dawhsan a luh chhoh hma chuan mipa pakhat hian a fuihpawrh mawlh mawlh a, inkuahin an hmuiah an infawp ta zauh mai a. E heu! Kei mi mawl hian engmah hre chiang loin keima rin dan ringawt chu ka lo au chhuahpui leh hman pek a va nih hmel ve! 

Patrick Joseph Barry, kum 42 mi, UFC palian huanga insual thin nen an lo inkawp reng a lo nia! Ama anpui a lo kawp i-khaw lo mai!

Sport thei deuh apiang, pa deuh apiang hian an hmeichhiatpui an ngaizawng zel mai nia ka lo ngaihdan mawl tak chu a lo dik lo tawp mai! Mipa inchei ngaina deuh, mipa lu meh dan niawm taka met, an chet dan reng renga lang pa deuhte pawh hi chhungrilah chuan hmeichhe dik tak, nu ru tlat, pasal neia pasal fanaute tana nu \ha tak an lo ni thei reng si a. Boxing khawvela mi lar, world champion pawh lo ni fo tawh, Mary Kom te pawh an awm tak kha a! 

An eizawnna leh an hnain a ken thilah chuan pa takin, rum takin, mipa tam tak aia pa mahin an lang chhuak a. Mahse, an pianpui nihna chu an lo nunpui dik thlup tho mai. 

Intipa zawng zawngin an hmeichhiatpui an ngaizawng kher lo a, lang nu deuh zawng zawng hi mawngkawhur an ni kher lo a lo nih chu. Hmeichhe nu hnapa lang zawng zawng hian mipa an ngaizawng vek chuang lo a, lang tuai zui kher lo zingah mipatpui ngaizawng an awm thei tho bawk. 

Pianpui nihna inpawm hlei thei lo, hlimpui thei lo an awm a. Hmeichhe neih ang dik tak nei thlap tho si, mi pawhin hmeichhia nia an pawm sa, mipa nih zawk châk leh mipa anga nung an awm thin a. Chutiang chiahin mipa neih ang nei dik thlap, mipaa miin an pawm thlap zingah pawh hmeichhe nun dan awn tlat a awm theih. Heng ho hi Gender Identity Disorder emaw, Gender Dysphoria emaw nei tiin an sawi thin. 

Mizo chuan Tuai leh Patil tiin kan sawi thin. Pianpui nihna lo zawk anga nungte hi transgender tiin an sawi bawk a. Nihna inthlak hlawk duha hialte hi transsexuals an ti bawk a, a inkara awm nia inhriate hi genderqueer an ti. 

Mahni pianpui nihna zawk hlimpui lo apiang hian sex-a an duh zawng a keng nghal kher lo. Sex-a an kawppui atan anmahni anpui kher an lo duh bik lo. Kei pawhin ka hre nual mai. Sex lama kan rilru pek dan, ‘sexual orientation’ hi chu mipa leh hmeichhia kan nihna inhriat dan buai nen a inzawm kher lo a nih chu. Tuai leh patil zawng zawng hi mahni anpui kawp, homosexuals an ni kher lo a nih chu. 

Rose Numajunas leh Mary Kom te hi patil an ni lo a, mawngkawhur pawh an ni lo. Hmeichhe dik tak, hmeichhe dik tak nuna nung, a hun leh hmun azira rothap leh che pa thei em em mai an ni. 

Mahni anpui kawp (mawngkawhur) awm chhante hi an zir nasa hle a. A chhan hrang hrang awm thei a tam hle. Mahni anpui kawp zingah hian hrehawm ti tak tak, Pathian duh loh zawng a nih hriaa hrehawm ti, khawtlang pawhin an dem tih hriaa zak, an rilru puthmang pawh thlak tuma bei ve thin, harsa ti em ema nun beidawng hialte ka hmu fo tawh. An duhthlanna alawm, tia vuak sim theih an ni ngawt vek lo. |henkhat erawh chuan an zir chawp, an duhthlanna, an tuipui zui a nih thu pawh ka hmu bawk. 

David Hawkins-a’n, “The presence of homosexuality does not appear to be a matter of choice; the expression of it is a matter of choice (Mawngkawhurna hi duh leh duh loh thil niin a lang lo a, kan nun chhuahpui dan erawh duhthlanna a ni thung e),”  tiin a khaikhawm.

Tuai leh patil awm chhante hi ngaihdan hrang hrang a tam hle a. Pian chhuah hmaa taksaa hormones awm danin eng emaw chen chu hril ve theiin lang bawk mah se, pa-na, nu-na leh mahni nihna hriatna chungchang hi pian hmaa taksaa hormones danglam aiin pian hnua kan nuna thil thlengin a siam tam zawk an ti. (Masculinity, feminity and gender identity may result more from postnatal life events than from prenatal hormonal organization (Kaplan & Sadock's Synopsis of Psychiatry, 11th Edition, 2015, phek 601-na).

Rilru lam zirmite chuan pianpui aiin zir chawp hi a tam zawk daih thu an sawi fo. Thil tam tak hi kan zir chawp a ni. Zir (learned) theih a nia, zir leh loh emaw, zir let leh (unlearned) theih a ni bawk e. 

Thil tha leh dik hi zir luih tum ve tur a ni. Thil thenkhat hi chu zir loh luih te pawh hi zir tur a ni! Zir hlawhchham apiang erawh indem ngawt tur a ni lo ang. Hringnun hi zawng a har em!

‘Isua nen engkim a theih,’ an ti thin. Paula'n, “Mi tichaktuah chuan engkim ka tithei,” a ti miau si. A tichaktu chu Isua a ni. Paula Isua khan kan Isua tho hi a nih si chuan, nun dan tha zawk hi Isua nen neuh theih tum ve zel phawt ang aw!

Share now