May thla tawp lam khan hmarchhaka tualto party hrang hrang thawhhona tur (Pu Zoramthanga sawi dan takah ‘India hmarchhak biala Congress party hmetmittu tur pawl) North East Democatic Alliance (NEDA) din a ni a. He pawla tel party hrang hrang aiawhte June 20-23 chhunga Guwahati-a an inhmuhkhawmnaah MNF president hi a tel ve nghe nghe. NEDA hi BJP din a ni a, a huikhawmtu ber Himanta Biswa Sarma hi congress party atanga BJP zawm ta, Assam inthlana BJP chaknaa a kipui ber pakhat a ni nghe nghe. Hindu sakhaw zuitute tlemna hmarchhak bialah hian Lotus symbol hmanga ram lak a la har rih dawn tih hriain BJP hian congress elpui tualto party hrang hrang kuahkhawma thiam taka insawhnghehna tuma beihpui an thlakna a ni ber. Nakum kum tir lamah hian Manipur assembly inthlan a awm dawn a, a kum leh (2018) hi Meghalaya, Nagaland, Tripura leh Mizoram assembly inthlan kum a ni leh bawk a. Arunachal Pradesh-a sorkarna derthawng tak chelh mektu People's Party of Arunachal (PPA) pawh hi BJP a inchhung lut tura sawi a ni mek bawk a, an inchhung lut a nih chuan hmarchhak biala BJP sorkarna hmasa ber dawttu an ni dawn a ni. Inthlan hmabak hmarchhak state pathum - Manipur, Meghalaya leh Mizoram-ah te hian congress-in ro an rel mek a, Tripura-ah hian CPI (M) an sorkar mek thung. An tum anga thil a kal a nih chuan hmarchhak bialah hindu kulhpui a din lo ang tih a sawi theih loh. Engpawhnise, congress party inbun ngheh tawhna hmarchhak bial chhuhsak tuma BJP hmalak dan tur hi a theuneu dawn lo khawp mai. Mizoramah pawh hian ram hmasawnna tur lam hawi tawktarh chi hrang hrang, sum leh therhlo ilo nen an rawn che vak lo ang tih a sawi theih loh a. Kan sakhuana rilru chawk tho tur zawng chuan min rawn thlemin a rinawm loh a, kan chak lohna lai leh kan duh zawng tak hmangin min rawn thlem zawkin a rinawm. Kan rama party lian ber an rawn kuah chat dan atang hian inthlan leh huna congress kulhpui chhut chhut chhiat an tum zia chu a hriat awm e. Chutiang chu a nih avangin term hnih chhung eptu lama tang tawh MNF party hian BJP chakna leh an sum-pai hmanga inthlan hmachhawn an hnial lo mai pawh hi an tifuh viau thei a, an tisual chhiava thei bawk. Hetia MNF hawi lam a hriat rual hian ZNP lam pawh an nger lama hriat ve tan nghal bawk a. Nimin piah mai khan BJP an thlawpna an tihtawp thu an puangzar nghe nghe a nih kha. Hetianga politics insingsa karah hian rorel lai congress pawh a nghawng tel nghal niin a lang. Inthlan leh huna party dang (ZNP, MPC, etc.) nena thawhho thawm a rik tak feih feih ah chuan bawm a tawt dawn tih a lang reng a. Hruaitu lawk zingah insawnna tur bial melh ru an awm deuh bawk nen, tuna MLA ni lai zingah hian an thawhpuite azirin ticket chang lo thut thei dinhmuna ding an awm nual thei. Chubakah, ministry siksawi (reshuffle) tumna a awm hmel bawk si lo a, MLA fang ni mek tan hian minister/parliamentary secretary nih ve theihna kawng a kaw lo khawp mai bawk. June 20 khan rorel lai congress party MLA sawmpakhatten Pu Hawla hnenah (Chief minister leh Leader CLP a nihna angin) lehkha an theh lut a, inthlan leh hun thlir ranin thlauhthlak an nih lohna tura tanrual hun lai tak ni pawhin a lang. An lehkha theh luh han chhiar hian a chunga kan sawi te hi rilruah a lang nghal lo thei lo. He lehkha thehluh hnu lawk (June 24) khan MPCC executive committee an thukhawm a, kum 2018-a Assembly inthlan chu an president Lal Thanhawla kaihhruaia hmachhawn an rel nghe nghe. Tun term zawh hnua chawlh tuma lo insawi tawh an president hian chawlh a sawi leh tawh ngai lo a, politics-ah hian fullstop a awm thei tak tak lo a lo nih hi. An hruaitu lawk zingah chief minister nih ve a huphurhawm loh thu sawi awm zauh pawh a zuzi zui leh nghal ngeiin a rinawm. Lehlamah chuan congress party hian Pu Hawla thlaktu tur hruaitu dang an nei lo a, a leadership hi an la mamawh em bawk a ni. Tunhnaia politics virvel nghawng lo lang nghal chu party lian pahnih hruaitute tawngkam dengkhawng tak taka an inbei leh hi a ni. Tlawmngai pawlte leh political party hrang hrangte ruahman anga lungrual taka Remna Ni hman a nih hnu lawkah thu hriam pui puiin an inchuk leh nghal mawlh mawlh a nih hi. Hetia mawlmang taka han thlir mai chuan MNF hi BJP/NEDA nen tang dunin inthlan hi hmachhawn ta se, mipuiin an bawh ang em? Hindu sakhua nena lak hran hleih theih loh party nena tanrual hi Kristian rilru nen a inmil thei lo maithei a ni. Chutihlaiin, congress party pawh hi term hnih an sorkar hnu hi chuan mipui tan ninawm lamah an kal ve tawh tho a, an hruaitute tawngkam dengkhawng tak tak pawh hi mipuiin an ei lo viau thin. An chhiatpui theih tur thil pawh sawi tur a awm nual ang - NLUP hlawhtlinna hniam vang te, mipui beisei phak loh vang te, zu zawrh vang te, sum harsatna/indaih lohna/leiba pung zel vang te leh a dangte pawh. Engpawhnise, politics-ah hian Mizo mipui hi kan beidawng fo tawh a, politician-ten beiseina sang tak min siamsak thin a, mahse rei lo teah chung chu mumang ram a chang leh thin. Kum 25 kal ta chhung khan congress leh MNF an inlal chhawk a, Pu Hawla leh Pu Zorama te pahnih chief minister an in nih chhawk ti zawng pawhin a sawi theih awm e. Dik tak chuan heng party pahnihah hian kum 30 chuang kan lo innghat tawh a, ram hmasawnna chungchangah te, hnam himna chungchangah te min hruai thlen chin chu tuna kan dinhmun hi a ni. Politics thli tlehin mipuite hi min len kual leh mai mai a, kan hruaitu ngaiten an duh dan anga min hruai leh a nih chuan mipui beidawnna a zual sawt dawn. Chuvangin, ram hruaitute leh ram hruaitu nih tumte pawhin ngaihtuahna thar sen a ngai khawp mai.