Tuna congress sorkar hian kum hnih leh a chanve an hmang ral ta a, tluang taka an kal a nih chuan an hun zatve dang hman tur an la nei a. Inthlan leh huna sorkar leh ngei tuma an inher rem mek laiin political party dangte pawh an insang mar tan ta a. Ram hnuk aia inchirhthehna lam hawi sawi tam zawk leh inphiar ru a, inbei thin politician-te thu leh hla hi mi tam tak chuan thu tak hla takah kan ngai lem lo pawh a ni maithei a. Mahse, tun hnai te hian Mizoram politics inlumlet, a ngaihven lem lo tan pawha hmuh theih tur a awm nual avangin tun tum chu i han thlir kual vel teh ang. Remna ni champha vawi 30-na ropui taka tlawmngai pawl te, zirlai pawlte leh political party-te huaihawta lawmnaa khuallian tura sawmna kha India prime minister Narendra Modi-a’n a tihhlawhtling lo mai a ni lo a, a chhang duh lo hrim hrim kha a mak khawp mai. India rama congress lal lai, Prime minister Rajiv Gandhi-a hun laia thil thleng pawimawh ber pakhat MNF leh India inremna puala khual liana rawn tan kha a phur lo hle a nih hmel. Kum 2014 a BJP hruai sorkar laipuia lak luh inkhawmah pawh Pi Sonia Gandhi te mitmei veng miah lo a zu tel ve kan CM sawmna hetia Pu Modi-a'n a namnul hi a zia lo khawp mai. Mahse, a sawmtuten lung loah an la zui lem lo a political party hrang hrangten an chilh zui lo hlauh a. Tualchhung politics ngaihven tan chuan tun hnai te hian rorel lai congress party hi an phusa ru viauin tih a hriat awm e. Hun rei tak chhung BJP leh hindu sakhaw chungchang an sawi tawh loh hnuah MKHC hruaituten Yoga an duh lohna nasa taka an lan tir lai velin MPCC president Pu Hawla'n hmarchhak a sakhaw tih bik nei BJP-in hmalak tum dan na takin a khak a nih kha. Hman deuh khan congress hruaitu pakhat chuan CM hian Pu Modi-a lung tihawi loh a hlau deuh nia a hriat thu a sawi a, chutih lai vel chuan NDA sorkar a fak thu chanchinbuah an chhuah nghe nghe. Phai lamah Hindu firfiakten Kristiante an bei fo a, bawngsa khap chungchang an chawilar hle a. Mizorama congress leh tualto party dangte an ngawi veng veng thin kha a mak hle a ni. Tunhnai lawkah Mizorama eptu party lian ber MNF-in BJP thlazar hnuaia tel an tum tih an tichiang ta a, hmarchhaka BJP kaihkuah khawm tualto party inzawmkhawmna NEDA-ah an intat lut fel ta a ni. Chutihlai vel chiah chuan congress-in hmana an vawrh darh tawh hnu lehkha (Kum 1998 a BJP hruaitu BP Acharya, hmarchhak viltu lehkhathawn) a darh ve leh chiah bawk. Engpawhnise, BJP in kua an rawn hreuh dan tur hi a la hriat loh a, MNF nen an insuihzawm ngheh tial tial lai hian congress-in thiam takin thu mu hnu kaitho chungin boruak an siam nghal a ang ber. Kum 2018 hian MNF hian sorkar laipui fuat nen bei ta tak tak se, congress tan a huphurhawm viau thei. Party liante inngur vel karah hian party te zawk chan chang ZNP leh MPC hian 2018 MLA inthlanah hian mal din ai chuan party lian thawhpui a finthlak zawk tih an hre chiang viauin a lang. ZNP hian thalai (a bikin vote nei thar tir leh kum 20 bawr vel) zingah boruak siam viau thin mahse mipui nawlpui, politics a intat lut ve lem lote hian tling tura rinkai party lian pahnih an vote thin tih an hre chiang tawh a, mahni a din ai chuan sorkara tel tura party lian (Congress?) nena thawh dun an tum ru a nih hmel a. Chutihlaiin, 2014 MP election-a an UDF hmingpu a eptu party 8 thawkho kha an darh leh der tawh a, a khaipa ber MNF party hi AMC inthlanah an mal din a, chumai ni loin BJP kaihhruai party hrang hrang thawhhona NDA an inhnim phum thuk zel avangin (NDA-ah hian) ZNP an lang tial tial thung. Chutiang boruak karah chuan chief minister-in ZNP president-te nupa chaweiah a sawm a, langsar takin CM bungalow panin engemaw chen kein an kal a. Hmana a velh ba dawisa kil turin a kal anga ngaih loh theih a ni lo. Mahse, thawhhona bul tan hi a har lo a, a tawp thlen erawh a buaithlak fo thin. Kum 2 chuang hun a la awm avangin thil a la danglam thei a, hetia inhel ru reng chung hian inthlan dawn hnaiah an inthen leh thut thei a. Chutiang a nih chuan party te zawk ZNP hi an kut chi lo hawi lel thei ang. Thawhpui tur dap nan chuan a la hma viau a, mal din tura thutlukna siam nan pawh a la hma tho. MNF hian municipal inthlan kha an dinhmun enchinna atana an ti a, a malin an bei a, an chet that tak phian avang khan mal din an châk ta deuh niin a lang a. Lehlamah chuan thawhhonaah hian bial inchuhna boruak leh vuivai thawmin buaina a thlen theih avangin an sim tawh pawh a ni thei a. Vai ram lama an thawhhona hlawm lian NDA boruak hmanga invawrh chhuah an tum a ni thei a. NEDA hmangin India rama party lian ber ni mek, Mizorama te tak te la ni rih BJP nena la thawkho turah an inngaih avangin tualto party dangte lakah an inla itawm duh rih lo pawh a ni thei bawk. Mahse, tun dinhmunah chuan Mizorama BJP hruaitute hi MNF nen an inlungrual thei ang em? tih hi zawhna awm thei tak a ni rih. Kum sawm kal ta a din, corruption donaa ke pen nasa tak, an thahnemngaihna avanga mipui rin hlawh tak PRISM pawh politics khelmualah sawi rik an hlawh tan. Party thenkhat mit timin tur tawk leh thenkhatte it tur tawkin an kalphung an her danglam a, hmuh theiin an insingsa tan mek a. Hruaitu thar leh mi thar eng emaw zatin an bawm tan avangin rorel lai congress party phei chu an phawklek deuh ni ngei tur a ni. Pu Hawla meuh pawhin vawi hnih aia tam PRISM beihna rawngkai tawngkam a nei tawh. Mi thenkhat politics lam hawia intuk khawm tan sawi tur dang pawh an awm mek bawk a, hetia kalphung thar duha insehmur an awm hian rorel lai party tan a pawi thei ber awm e. Kum 2008 MLA inthlanah kha chuan sorkar kalphunga lungawi lo inhawrkhawmte kha congress party-in an hmang tangkai thiam ber a nih kha.