Congress party kaihhruai sorkar ngelnghet tak mai, MLA 32 lai nei kan hrawn mek laiin kar kal Thawhlehni khan Minister zinga pakhatin amah puhna hrang hrang vangin minister a nihna mai bakah MLA a nihna atanga banna a thehlut thut a, hei hian politics boruak a tisosang thar a, mimal leh party inchirthehna a thleng zui a, titi a siam zui hle a ni. Tunhma atangin rorel lai party hian beih an hlawh thin a, a bikin eptu lam te phei chuan sorkar khalh ngil aiin sorkar chhaih buai hi an tuipui zawk emaw tih tur a ni a, media lam pawhin an chetsualna lai an tuipui fo thin, chu chu democracy kalphung pangngai ve reng a ni. Chuvangin, tun ministry-a department pawimawh tak tak enkawltu leh party chhungah pawh huhang nei pha minister ban chungchang leh a kaihhnawih thilte hi politics ngaihven deuh chin tan chuan a hmuhnawm a, kan rama thil thleng ngai lo a nih avang ngawt pawh hian sawi zui a hlawh lo thei lo. Minister banna theh luh ni a MNYF leh ZNP lamin hemi chungchanga press conference an koh te, politics boruak lo sosang chho ta hluai te, a hnu lawk a chief minister-in press conference a koh chungchang te, he thila mawhphurhtu a ngaih digital daily pakhat Scroll.in leh ECI a zualkotu chungchangte kan sawi zui ta luai luai a. A bikin social media lamah an pute hriat lem lohin thalai rual party mi leh sate an inhnial nasa hle a, tawngkam pawh an duhtui lo viau thin a, mimal chanchin chhe lai ber ber thlenga inphawrhsak ching an awm bakah phuahchawp leh rinthu belh ching pawh an tam khawp mai. Tunlai politics inchirhthehna kara thil veiawm tak mai ni ta chu Mizo thalai zinga social media lar ber pahnih Facebook leh Whatsapp group hmangtute hian hawihhawmna te, mimal inzahderna te hi kan zir thar leh a ngai ta hle tih hi a ni. Mipui vantlang hriata na tak taka kan politician thankin tawhte an inbeih thinna ang chi hi a aia uchuak mahin social media lamah thalaiten an seng lut mek a, hei hian thangthar rilruah inhuatna leh inbeih chakna a tuh mek a ni. Kan hnam hmabak han thlirin chu chu corruption tlukin kan la chhiatpui thei. Lehlam zawnga ngaihtuah chuan mi diklo ten hremna an tuar ngai lo lutuk hian thalai vengva tak tak khawvel hmun danga thil thleng hmu reng thinte rilru hi a chawk tho a tih theih tho bawk ang. Mahse, engemaw hleka inbei vak vak thinte mizia hi thangtharte hi chuan la lo hram ila, thu dik leh dik lo thliar hrang chungin fim taka thil kalphung thlir hi tum ta zawk ila, kan inhnial a nih pawhin nu ve but lo ila, ram hnuk khawih thil a nih loh chuan mimal chanchin chhe ber thleng a phawrh kher hi a tul lem lo thin. Chuti a nih loh chuan social media-a inawmtlei thalai rualte leh thangtharte hian he ram hi inhuatna ramah kan siam mai ang tih a hlauhawm. Chutihlaiin, thuneitute zinga mipui chanai chhuhsak ching te, mi depde leh rinawm lo te, hnam pawikhawihtute, kut tling lo a sum la lut te an awm chuan ram leh hnam hmangaihna vang tal pawhin kan beih a, kan hnawl ngam zel erawh a hun ta khawp mai. Zep rual lohin tunlai politics inlumlet velah hian media thiltihtheihna a lo lang a tih loh theih loh a. Mizoram political history-in bung thar a kai a, a kaitirtu chu media-ah pawh electronic media, chutah pawh chuan digital media hi a ni. Kan ramah print & visual media ten hma an sawn nasa a, a inhmang te pawh thalai lehkhatiam changkang tak tak an ni tawh a. Chutihlaiin, tun thil bikah hi chuan social media nghawng nat zia lo lang ta hi phat rual a ni lo. Social media hi tunlaiah chuan ngaihthah ngawt theih a ni tawh lo a, milar te, ram hruaitu te, politician te pawhin an hmang tangkai hle a ni tih te pawh hre thar ila. July 11,2015 a sorkar thuchhuahah pawh khan chief minister-in website bakah official twitter profile (@CmMizoram) leh facebook page a nei thu tarlan a ni a, zawhna zawt duh tan mobile no 9248-006-202 ah SMS a thawn theih tawh bawk. Tunlai khawvel leh social media hi a inzawm nghet tlat ti zawng pawhin a sawi theih ang. June thla tawp lama digital daily pakhat Scroll.in thuchhuah lo darh hluaina pawh kha social media hi a ni a, he chanchinbu hi internet a chhuah a ni a, twitter leh facebook page nei tel bawk a ni a, 2013 kum tir a chhuah tan chauh kha a ni nghe nghe. A tawi zawnga sawi chuan he an thuchhuah kal zel hian office of profit chungchang te a hring a, kum hmasa lama Assemby session zawhna leh chhanna te her lum leh a ni ta zel a, a nghawng a na chho ta tial tial a. Minister hialin a ban phah ta a ni. Hei hian party chhung a nghawng dan tur te, MNYF hotupa a kan kai dan te, 2013 MLA inthlan a chief minister sum hman dan (day to day account of expenditure a lang lo sum hman a awm leh awm loh te), Election Commission hmalak dan tur te leh a behbawm dang te chu rin dan leh ngaihdan piahlam sawi thui tur a awm vak rih lo a. Thil pawimawh tak chu dan leh hrai, ngaih pawimawh nachang hriat hi a ngai tawh hle tih hi a ni. A bikin politician-te phei chu an fimkhur zual a ngai ta hle mai, kan Mizona leh rilru sual pu lo a kan inhriatthiam mai mai thinna piah lamah hian dan hi a lo lal ber tih hi kan hriat thar a tul ta khawp mai. Hmannia MNF party inthlan ni a Returning Officer Dr. R.Ramthara, Pachhunga University College-a thawkin, "Thalaite hian social media an hmang nasa a, fb, whatsapp velah thil an inthawn a, an chhiar nasa a. Thingtlang hla taka thilthleng leh politician-te thusawi pawh chawplehchilhin hmun hrang hranga miten an chhiar thei nghal a. Thalaiten an ngaihtheih loh deuh mai chu DAWT hi a ni, dawt thu hi an hua a, an hriat chuan an bei vak zel," tih kha party tina hruaitute leh party worker-te pawh hian an hriat a tul khawp mai.