Kum bul atang khan chhiatna, tualthihna, pawikhawihna rapthlak pui puiin min deng chho mawlh mawlh mai a. Chutiang karah chuan tunhnai lawk (March 28, 2015) khan Manipur ramri bul hnaia hel pawlten MLA te leh anmahni vengtute an lo lambunnaa Mizoram police pathum an kah hlum chanchin rapthlak takin min deng leh a, kha thil thleng rapthlak tak khan tun thlengin min la chiah a, titihona leh social media lamah rilru na leh thinrim ang thawm a la reh tak tak thei lo. Thihna tuartu chhungkuate an khawngaihthlak tak zet a, hliam tuarte an lainatawm a, sorkar tan a tlawmthlak a, mipui tan a thinrimthlak tak zet a ni. Kar a lo vei a, boruak sa zual pawh a dai tan ta deuh a, ngaihtuahna fim pawh kan hmang thei tan ta bawk a, ngaihdan tlema zawng sawi ve ila a tha awm e. Pawikhawihtu hel pawl hi kan dem tlang vek a, inrikrap mai duh tawk lo a mi pathum lai an kap hlum hi a thinrim thlak tak zet a ni. He inbeihnaah hian thil hriatthiam har tak tak a awm nual mai, hel pawlte chettlatna hmuna VIP pathum kalte venhimna chungchang ngawt pawh hi sawi zui tur a tam anga, home department kalphung thlengin siamthat ngai sawi tur a awm anga, eng vanga MLA te kha lo lambun nge an nih, him pialin an kalsan leh mai si a, tih te pawh hi ngaihtuah fe tham a tling ang, mahse chuti lam chu sawi zui lo ila. A pawimawh ta ber chu hel pawlten buaina an siam zel tawh loh nan hmalak a ngai tih hi a ni, khawthlang lamah a khat tawkin helho an che leh thin bawk a, mipuiin sorkar hmalak dan kan thlir thup e. Ram ral muang a an chhal thin a hetiang thil a thleng ta mai hi thuneitute tan inenletna tur a awm tih a chiang a, eng hel pawl mah hi tawngkaa vau daih theih an ni ngai lo a, a chhe ber huama ralthuam nena chhuak an nih miau avangin ram hruaitute inhrosak vanga zawr nghal mai tur chi an ni lo tih pawh hriat a tha awm e. Home minister hian Mizoramah hel an awm loh thu a sawi thin a, HPC(D) te pawh hi “Dan pawna hnawl pawh an ni lo a, keini chuan fapa awm tha duh lo ang chauhah kan ngai a, hel pawla puan hi kan phal lo a ni,” tiin a sawi. Hei hi August 26, 2011 a Congress Bhavan-a Political Session-a a sawi a ni. Kan thenawm hmarchhak state hrang hrangten hel pawlte vangin harsatna an tawk nasa hle a, kan hmu vek a ni. Hel awm lo a an chhal kan ramah pawh hian hel pawlte chetna - inrukbo, inkahna, inrikrapna, pawisa khawn, etc., a thleng fo thin, zep thu a cheng lo. A chang chuan political party-ten inchirhthehna atan hel chungchang hi an hmang fo bawk, an inpuhna thenkhat hi chu a dik mai thei. Engpawhnise, heng a behbawm thilte hi dah thaa buaina chinfel dan hi zawn vat a hun a ni. Mizote hi hnam tlem te kan nih avangin hel pawlte pawikhawihna vuak hawt a, a chi ang zawng a inbeih a, (HPC (D) thiltih avanga) Hmar hnam pumpui dem zawnga sawi ching tlat te hi an demawm tak zet. Kan ram hruaituten lungrual taka “Zofate inpum khatna daltu chu engmah tih nilo rawh se” tih resolution an pass tak hnuah phei hi chuan tlawmngai pawl leh politician-te pawh an fimkhur a ngai zual awm e. Tunlaia titi luah ber pakhat MPSC chungchang pawh hi han sawi leh ta ila. Public Service Commission hi sorkar hnathawk latu a ni a, chairman leh member dinhmun pawimawh zia leh hna zahawm tak, mi rintlak leh mi thiam bikte awmna tur a nihzia chu sawi thui ngai loin kan hre sa vek. Chutiang a nih avang chuan sorkar pawhin MPSC chairman leh member turte hi thlei bik nei lo tur mi rintlak leh rinawm, mithiam an ruat ngei ngei tur a ni. Chutihlaiin, politician ni a kan lo hriat reng thin chu tlem lai deuh khan member-ah an ruat thut a, chu bawk chu tunhnai mai khan MPSC Chairman atan sorkarin a ruat thar leh a nih kha. Chumai a ni lo, chairman thar hi a pian kum dik tak chungchangah inhnialna a awm leh ta nghal. Zirlai pawl puhna hi a dik a nih a, a pian kum dik lo zawk hmanga he hna zahawm tak hi a luah lui reng a nih chuan amah leh MPSC ah rinna nghat ngam lo an tam maithei a ni. Tunhma atang tawh khan sorkar hian MPSC hi sorkar enkawl corporation (PSU) ang velah hian a ngai emaw tih mai turin chairman leh member atan hian a tling tur mi tha ai chuan politics thil a an hamthatna tur leh an duhsak zawngte (An sephung laihpui?) ruat an ching khawp mai. Tuna chairman leh member thar pahnih an ruat danah pawh hian tehfungah hian kohhran hi a an dah pawimawh ber a ni maithei, commission thatna tur thlir loin politics a an thatpuina tur chauh an thlir niin a ngaih loh theih loh. Sorkar hnathawk lian latu tur an nih avangin politician leh pastor ai chuan sorkar hna lak dan kalhmang hria, sorkar hnaa dinhmun pawimawh lo chelh tawh, mithiam mai bakah mi dik leh rinawm, kohhran/pawl/party a awn lam nei lo tura ngaihte zawng chhuakin dah ta se he sorkar hian mipui rin a kai zawk ngei ang. Kohhran hi pawn lam atanga sorkar khalh ngil tur a ni a, Mizoramah chuan politics kal sual tur vengtu pawimawh tak ang pawhin a ngaih theih awm e. Mahse, kan political party-te hian kohhran leh tlawmngai pawl liante hi politics-a hamthatna tur zawnga hman an tum leh thin a, chutiang bawkin zirlai pawlte pawh chhaih buai an ching khawp mai. Tunlai a pastor tang lai hlawh tam zawk hlawh tur leh sorkar a dinhmun sang tak luah tura an sawm chhuah dan pawh hi chik taka thir chuan a fel lo deuh chu a ni, an insawi anga pastor an duh a nih chuan kohhranah thlen mai awm tak a nia. Dan zamsa bawhchhe miah lo hian dik lo tak leh fing kherek takin a kal theih tih tunlaia kan titi atang hian a hriat theih awm e.