Mipui nawlpui hian thil hi kan hre rei vak lo a, thil thleng liantham deuh leh ram hruaitute thusawi langsar deuh te, sorkar thil tum pawimawh tak takte hi a tirah sawi luih luih mah ila boruak dangin a rawn tlakbuak a, hun a kal deuh hnuah kan theihnghilh hmin der thin a. Tun tum chu tunlai thil leh thil kal tawh thenkhat han sawi kual mai mai ila a tha awm e. Kum 1991-a India economy kalphung siamthat a nih hnu kum 25 chhunga chhiahlak dan phung siamthat lian ber a thleng dawn ta. Nilaini khan Rajya Sabha-ah hun rei tak chhung tangkhang tawh chhiah lak dan thar The Goods and Services Tax (GST) Bill chu pass a ni ta hlawl mai a. Na taka inbei thin party lianten inlungrual tlang taka he bill an pawm tlan theih avang ngawt pawh hian GST hi tha thawkhat viau turah ngai phawt ila kan tisual awm lo e. CST awmzia leh a nih phung te, tuna bungraw chhiahlak dan VAT/CENVAT aia a that zawkna te hi sawi tur a tam a. Tunah hian sumdawnna leh a behbawm thila state sorkar chhiahlakna VAT hi bithliah siamsa hmanga bungraw man atanga chhiah lak dan a ni a, bungraw hlutna a pun dan (a man san dan) mil zela lak belh zel a ni thin. Entirnan, bungraw siamchhuaktuin chhiah a pe a, wholesale-a zuartuin a pe leh a, Wholesaler hnen atanga la chhawngtu dawrkaiin a pe leh bawk a. Chutiang chuan state dang atanga lo lut leh tual chhunga siam bungruate hi an thlen chin zelah chhiah lak a ni thin avangin a man pawh a sang tial tial lo thei lo a ni. GST-ah pawh hetiang tho hian a siam chhuaktu atanga a zuar chhawng zeltu hnen atangin chhiah lak tur chu a ni tho a; mahse, VAT nen a danglamna chu a hma lama chhiah an lo pek tawh zat kha paih zel tur a ni thung. Chutiang a nih a nih avang chuan VAT hmanga chhiah lak aiin GST hmanga lak hunah thil man a tlahniam tura ngaih a ni. GST hi kalpui tak tak a nih hunah chuan sorkar laipui leh state sorkarin bungrua leh thil dang (Goods and services) a chhiah an lak zawng zawng hi infinkhawm tir vek tur a ni a : central GST leh state GST chauh a awm tawh dawn a ni. Mahse, kan rama sumdawngte hian chhiah tihpun vanga thil man tihsan an chin viau lai hian chhiah tihhniam vanga thil man tihtlawm erawh an harsat viau a, thuneitute an chet loh phei chuan GST vang hian thil man hi a tlawm phah ngut lo mai thei a ni. Thil dangah han pakai ila, Mizoram a medical college din chungchang hi kumin chhoah hian sawi lan a ni ta fo mai a, mahse, tun thleng a sorkar hmalakna chin han ngaihtuah hian politics inbeihna velah hian a zuzi mai ang tih pawh a hlauhawm thei dawn dawn. Kum 2013 October thla khan Prime Minister-hoa National Development Council thutkhawmah Chief Minister Pu Lalthanhawla hian Mizorama medical college din a tul thu leh chumi atana sum ruahman a tul thu a sawi a. Medical college din tur hian kan sorkar pawh hian hma a la ve viau a, chak zawka bawhzui turin Advisory Committee a din a, committee peng dangte pawh din a ni bawk. Sorkar hmalakna hian thil pawi tak a thlen pakhat chu medical college atana Falkawn Referral Hospital buatsaih leh Aizawl Civil Hospital suihtet tum chhuanlam a (Aizawl Civil Hospital) ram zau tak Dawrpui khawtlang an pe hi a ni. A mawhphurtute hi khuareiah an la inchhirin a rinawm. Kum 2014 June thla khan Health Minister-hoa advisory committee meeting chuan August 2015-ah medical college hi class tan hman beisei thu leh department pathum - anatomy, biochemistry leh physiology-a bul tan a, batch hmasa berah zirlai 100 tal admit theih tum a nih thu te an sawi a, a tak erawh a thleng ta lo a. Kumin kum tir lamah khan Aizawl civil hospital bungrua leh a thawkte Falkawn referral hospital-a engemaw zat an sawn phei a. February thla khan health minister-in Mizoram Institute of Medical Education & Research (MIMER) din tum chu tihhlawhtlin ngei an tum thu leh zirtirtu tur pawh department tinah Mizo ngei an awm theih tur thu te a sawi leh ta chauh a. Budget-ah pawh a lang ta lo nghe nghe a, kumin chuan a thu a sawi bak a taka hmalakna a awm dawn lo tih a lang thei awm e. Minister-in MIMER din tum hi sorkar laipui ta tur ni loin, Mizoram state sorkar ta tur a nih thu a sawi hi chu ngaihtuah chian chi a ni. Thla hmasa (July) mai khan minister-in State Referal Hospital-a medical college din a nih theih nan July 2016-ah Ministry of Health & Family Welfare-ah application thehluh leh a nih thu leh kum 2016 tawp lama Medical Council of India (MCI) atanga inspection team lo hmachhawn turin inbuatsaihna kalpui mek a nih thu a sawi a. Chumai a ni lo a, medical college leh Mizoram State Cancer Institute changtlung tak neih a nih theih nan Indo Global Health Consortium (IGHC) thawhpui a tum thu pawh a sawi a nih kha. Engpawh nise, nakinah medical college tha tak din turin sorkar hi i beisei phawt ang. Nimin khan Olympic Games chu Rio de Janeiro-ah tan a ni ta a. Kan la hre hlawm anga London Olympics 2012-ah khan kan thenawm, Manipur atangin India aiawha tel thei an awm nual a, chu chu thalaite fuihphurna leh politics ball atana hman a remchang hle ni tur a ni, kum 2013 khan sorkarin kumin Olympics-a Mizo thalai an tel ve theihna tura hmalakna lian Vision Olympics 2016 a hawng hluai a nih kha. Sports Minister phei chuan Olympic 2016-ah India ram aiawhin Mizo thalai a tam thei ang ber tel thei tura inbuatsaih a tul thute a sawi a nih kha. Vision 2016 hnuaiah hian sport discipline pakua thlan a ni a, chungte chu - archery, boxing, badminton, hockey, shooting, weightlifting, table tennis, taekwondo leh judo-te a ni. Kum 2014 (November thlaa pharh) budget speech-ah pawh khan, “2016 Olympic lo awm turah Mizoram atanga Olympic Contingent intirh ngei beisei a ni,” tiin Finance Minister-in a sawi a nih kha. Mahse, infiamna lama beiseina sang tak min siamsaktu leh ram hmasawnna hnuk thil tam tak aia sports lam uar zawk maha ngaih kan sorkar hmalakna hi a hlawhtling ta chiah lo a nih hmel, Olympics 2016-ah hian Mizo nula/tlangval an tel dawn loin a lang si a. Thalaite hi fuihpawrhtu an nuam hle a, boruakin a zir phei chuan inbawlphawn hluah pawh a awl thin. Kan ram hmasawnna thapui thalaite hian infiamna leh a behbawm vela inbawlphawn hluah ai chuan hna nei lote tana eizawnna siamsak te, thiamna/theihna tipung zawnga hmalakna (Skill development) te hi an mamawh zawk.