Zawhna: Ka pu, hengte – uisa, bawng soup, purunsen leh sawhthing (adt) hian mipa serh ti khawng turin a tangkai viau in an sawi a, tak tak nge rilru lam zawk? Tak tak ni ta se enge a chhan ni ang?.

Chhanna: Mipa sazu khawng chungchang hi zawhna ka dawng ngun khawp mai a, ziah pawh kan ziak ve ta fo a, harsatna nei kan tam tial tial te pawh a ni mahna. Tin, mipa tan hian han sawi nuam a ni lova, doctor te han pan meuh pawh hi tam tak chuan an hreh thin. Tlangval leh la valai tak mai hetiang harsatna nei te tan phei chuan kan mipa tawk lova inhriatna rilru te a awm thei a, chungte avang chuan midang hrilh emaw doctor te han pan hreh an awm fo thin a ni. Engpawhnise, hetiang harsatna nei te hian doctor pan hreh loh a tha tih kan sawi hmasa phawt ange.

Mipa sazu fuk/khawng (erection) lo thlen dan hi a complex khawp mai a. Mipa sazu chhung ah hian tube pahnih a awm a, a chhung hi a inphan tuak bawk a. A zawi lai chuan heng tube pahnih hi a thep ti mai ila. Tisa chakna a lo chhuah khan mipa sazu chawmtu thisen zam kal tlangin thisen a rawn in pump tam ta a, chu chuan tube pahnih hi a rawn hnawh khat a, a lo fuk ta thin a ni. Mahse he mechanism hi lo thleng tur chuan tisa chakna signal kal kawng thazam (nerve) khan hna a thawh that a ngaih le bawk.

Thisen kal kual (blood circulation) tha a pawimawh hle a, chumi atan chuan thisen zam kha a him that a pawimawh. Chutiangin sazu chawmtu nerve te hi an him dam that a pawimawh a, signal a kal tlang that a pawimawh hle. Heng thil chi hnih – circulation leh nerve conduction te hi sazu khawng nana pawimawh em em te chu an ni a, hrisel tha ah chuan harsatna a awm lo tura ngaih a ni. Mahse taksa chak lo te, zuk leh hmuam bakah ruihtheih thil ti nasa (a bik takin zu in nasa) ah te hian sazu khawng tha thei lo, khawng rei thei lo (erectile dysfunction) hi a awm duh hle a. Zunthlum leh thisen sang nei te hian an nei duh hle bawk.

Tuna i rawn sawi uisa, bawng soup, purunsen leh sawhthing bakah hian thil dang eng eng emaw te pawh sazu ti khawng tha thei anga ngaihna a lian viau. Mahse a nihna takah chuan heng te hian a pui hran lo tlat thung. Taksa a hrisel loh chuan emaw, zuk leh hmuam insum chuang si loh chuan heng te hi ei in eng ang mah ila, mi a pui chuang hauh lovang. Kan nunphung lam zawkah thlak danglam ngai a awm chuan (kan tarlan tak) chu zawk chu thlak danglam tum ila, chu chuan mi a pui fe zawk.

Tunlai hian mipa sazu khawng thatna damdawi/ cream/hmanrua eng eng emaw hi social media lamah an zuar fo mai. A then te chu a lo tangkai pawh a awm ani mahna, mahse hriat chian loh thil reng reng chu hman loh a tha ber a, kan hmang duh anih pawhin doctor te rawn hmasak a tha hle. I rawn sawi uisa leh a dangte hi chu le ei leh in lamah nutrition tha petu ani hlawm ngei anga, a bik takin purunsen leh sawhthing te hian kan taksa a bal chambang paih kawngah a pui ngei bawk ang (antioxidant ti te pawhin a sawi theih awm e). Mahse heng ka nei vang hian sazu a khawng rei phah kher dawn lo ani tih kan hre dawn nia.

Sazu fuk/khawng tha tur chuan hrisel that a pawimawh a, zuk leh hmuam insum te, ei leh in uluk te, taksa sawizawi tam te, zan mut that te a pawimawh hle. Hei bakah hian pornography (blue film) lam en tam te hian an neih phah duh hle a, insum a pawimawh tel ngei bawk a ni.